АНАЛИЗА: Скопје и Тетово со најголем број на невработени – пазар на труд во 2018-та!

Фото: Alpha Stock Images/Nick Youngson

 

Официјалните статистики на истекот од оваа 2018 година покажаа дека невработеноста на ниво на државата се намалува. Сепак, десетици илјади граѓани и натаму фигурираат како невработени – на листата пасивни или активни баратели на работа. Од вкупниот број на невработени,  според податоците од Агенцијата за вработување, 55 989 се етнички Македонци, потоа 23 054 се етнички Албанци, 3 851 невработен се од турска националност а 5 687 се Роми. Скопје и Тетово предничат според бројот на граѓани кои имаат статус на невработени

 

Пишува Анета Додевска

На истекот од оваа 2018 година, или до почетокот на ноември, според податоците од Агенцијата за вработување на пазарот на труд биле регистрирани  вкупно 182 036 невработени луѓе , од нив 91 485 се регистрирани како “активни баратели на работа“ а останатите 90 551 како “други лица кои бараат работа“. 

“Невработеното лице е должно лично да се јавува во Агенцијата на секои 30 дена и да докаже дека активно барало работа во последниот месец, а постои и ‘друго лице кое бара работа на секои шест месеци’. Невработеното лице (активен барател на работа), учествува во сите програми и мерки за вработување и услуги на пазарот на трудот кои ги спроведува АВРМ. Другото лице кое бара работа (пасивен барател на работа), само се евидентира во АВРМ (не изразило волја да учествува или да му биде понудено вработување и слично) и АВРМ единствено може да му обезбеди информации за состојбата на пазарот на трудот“ – велат од Агенцијата за вработување.

Во споредба со првиот месец од годинава, во октомври вкупниот број на невработени се намалил за 10 066.  Од почетокот на годината до крајот од октомври, од вкупниот број  на луѓе  кои повеќе не се на списокот на невработени, 2707 се вработиле, односно засновале работен однос, 2576 биле административно симнати од евиденција по законски основ, а 774 преминале во пасивни баратели на работа.

Во истиот период на списокот на невработени, се приклучиле нови 5 351 лице кои стекнале право на „невработен“, а од нив, 2 955 по основ на изгубена работа.

 

Скопје и Тетово  со најголем број невработени 

Бројот на невработени различно е распределен по градовите во земјава и според апсолутната евидентирана бројка, предничат Скопје со 14 699 регистрирани невработени и Тетово со 11 134 луѓе. На листата градови со најголем број на невработени се и Куманово, Гостивар, Прилеп.

 

Број на невработени по градови:  

Скопје         14 699

Тетово         11 134

Куманово      9 282

Прилеп         6 626

Гостивар       5 524

Битола          4 780

Но, ова се апсолутни бројки за навработеноста.  Друга слика за состојбата со невработеноста се добива доколку се направи споредба на бројот на невработени во однос на вкупниот број на население во општината, односно градот. Така на пример во Берово се регистрирани 1 224 невработени и во однос на бројот на население ( лица постари од 10 години) излегува дека секој 11- ти жител е невработен. Во Тетово пак споредбените податоци покажуваат дека секој 8-ми е невработен , во Дебар секој 13 – ти, во Куманово и Прилеп секој 11- ти. 

 

Етничка структура на невработените 

Од вкупниот број на невработени – активни баратели на работа ( 91 485), според податоците од Агенцијата за вработување, 55 989 се етнички Македонци, потоа 23 054 се етнички Албанци, 3 851 невработен се од турска националност, а 5 687 се Роми. Вака изгледа процентуалната структура на невработените според етникумот: 

Македонци     61,1%

Албанци         25,2%

Турци               4,2%

Роми                6,2% 

Пропорционално, во градовите во кои доминира мнозинско албанско население има и најголем број на невработени од овој етникум. Така во Тетово регистрирани се 8 002  граѓани од албанска националност со статус на активни невработени, додека бројот на невработени Македонци изнесува 2 703. Во Гостивар бројот на невработени Албанци е 2 713 , во Куманово 3 715 а во Дебар 620. 

Најновите податоци од  Државниот завод за статистика покажаат дека  стапката на невработеност во третото тримесечје од годинава се намалила на 20,8 отсто, за разлика од вториот квартал кога беше 21,1 отсто. На крајот од септември 958.770 лица се  активно работоспособно население во земјава, од нив  759.445 лица се вработени, а 199.325 лица бараат работа.

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy) и Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States), иницијатива која поддржува демократија, добро владеење и евро-атлантски интеграции во Југо-источна Европа. Содржината на рецензијата е одговорност на авторот и не ги одразува ставовите на Метаморфозис, National Endowment for Democracy, The Balkan Trust for Democracy, проект на Германскиот Маршалов фонд на САД, или нивните партнери.