Нема видеонадзор како сообраќајците контролираат

Само очите на возачите сега ги „снимаат“ сообраќајците. Фото: West Midlands Police

Со овој проект планирано е да се воспостави видеонадзор на местото на кое полициските службеници вршат контрола на возила и возачи. Со тоа ќе се постигне поголема лична безбедност на полициските службеници при вршење на полициските работи, а исто така ќе се спречи можноста од евентуални злоупотреби (примање поткуп, добивање подароци и слично) од страна на иститеБуџет: 12,3 милиони денари,  РОК: 2015 ГОДИНА

 

ОБРАЗЛОЖЕНИЕ:

 

Ветувањето за видеонадзор на местото каде сообраќајците вршат контрола на возила и возачи, кое ВМРО ДПМНЕ го внесе во изборната програма за предвремените парламентарни избори во 2014 година, не е исполнето. Во програмата „Проверено“ на стр. 238, партијата на власт дава ветување дека ваков  видеонадзор ќе се воведе до крајот на 2015 година.

Ова ветување по изборите е внесено и во програмата за работа на Владата во одделот Правда и безбедност. Таму, во делот „Безбеден сообраќај“,  ветувањето е наведено како проект со  рок на реализација – „крајот на минатата година“ (2015).

Воспоставување на видео-надзор на местото каде полициските службеници вршат контрола на возила и возачи (2015)

Опсежното пребарување со пребарувачот Гугл и пребарувањето на македонските агрегатори на вести не доведе до ниту еден напис за тоа дека воопшто е почнато спроведувањето на овој проект, за кој и партијата на власт и Владата наведуваат дека треба да биде готов до крајот на 2015 година.

Според  Член 93а , на страница 31, од Законот за полиција поставен на веб-сајтот на МВР, предвидено е снимање на акциите на полициските службеници, со цел да се обезбеди материјал за начинот на кој се презема конкретно дејствие, за да се осигури легитимно и соодветно постапување на припадниците на Министерството за внатрешни работи при примената на полициските овластувања. Дека тоа се врши при полициски акции во поглед на различни видови криминал и при акциите на специјалните полициски сили, можеме да видиме од видеоматеријалите кои МВР ги објавува на својот Јутјуб канал.

Како и да е, во отсуство на каква и да било информација за набавена и инсталирана соодветна опрема за видеонадзор на полициски службеници при контрола на возилата и возачите, а со оглед дека се изминати речиси два и пол месеца од наведениот краен рок, се смета дека ова ветување е неисполнето.

 

ИЗВОРИ:

•    Изборна програма на ВМРО ДПМНЕ 2014-2018 стр.238 – [Пристапено на 11.03.2016]
•    Програма за работа на Влада – [Пристапено на 11.03.2016]
•    Веб сајт на МВР на РМ – [Пристапено на 11.03.2016]

 

Оценето од: Сашо Спасоски