Прислушувани разговори – сет 26: Тргување со гласови

 

Дел од тајните криминали на ВМРО-ДПМНЕ во Гостивар се разоткриваат во овој комплет „бомби“. Покрај тоа слушаме и за тоа како Мијалков и Јанкулоска ги нарекуваат Албанците, како ВМРО-ДПМНЕ составила лоша листа за локалните избори во Гостивар во 2013 година. Од устите на албански политичари од ДУИ слушаме какви им се зделките со коалицискиот партнер ВМРО-ДПМНЕ.

 

 

Разговорите од овој сет во голем обем се однесуваат на Гостивар и на махинациите на ВМРО-ДПМНЕ што го засегаат овој град. Во првиот разговор Влатко Чинговски, директор на ЕЛЕМ, бара од Александар Левковски, директор на ХЕЦ Гостивар, да обезбеди возило за партиските потреби на Општинскиот комитет (ОК) на ВМРО-ДПМНЕ во Гостивар за време на пописот. Возилото може да биде секакво, и со ознаки на ЕЛЕМ и без ознаки, дури и возило на обезбедувачите… Тука станува јасно дека ВМРО-ДПМНЕ ги злоупотребува државните средства за партиски цели.

 

ВРАБОТУВАЈТЕ САМО НАШИ!

Од вториот разговор дознаваме за партиски вработувања што се вршат во ХЕЦ „Маврово“, како што појасни на прес-конференцијата Благојче Трпески, претседател на ОО на СДСМ – Гостивар. Се вработуваат луѓе по партиска директива – „не оти се убави“, па дури и кога нема каде да работат. Во третиот разговор, помеѓу Влатко Чинговски и Онер Јакупоски, директор на Националниот парк Маврово, се открива како за претседателот на ОК на ВМРО-ДПМНЕ во Дебар се бара подобро работно место, ама има и потсетување од кое „ниво“ треба да стаса наредба за партиски вработувања.

Потоа го слушаме и разговорот на Никола Груевски и Миле Јанакиески, во кој Груевски налага да се најде начин Радио Гостивар да го земе некој од Унијата на млади сили (УМС) на ВМРО-ДПМНЕ.

 

„АМАН – ПОВЕЌЕ АЛБАНЦИ ОД МАКЕДОНЦИ!“

Следуваат два разговори помеѓу Влатко Чинговски и Сашо Аќимовски, пратеник и претседател на ОК на ВМРО-ДПМНЕ во Гостивар. Во првиот разговор слушаме како се „конкурира“ и како се врши приемот на партиски кадри на ВМРО-ДПМНЕ, за која, пак, слушаме дека преговара и „дели квоти“ со ДУИ. Тоа досега и до ангажирање волонтери во државните институции. Патем, списокот со избраните на институциите им го доставува ВМРО-ДПМНЕ – не е дозволено изборот да се изврши во самата институција.  Во следниот разговор, Аќимовски се жали што на списокот за примени волонтери во подрачните единици на ЕЛЕМ во Гостивар има повеќе Албанци од Македонци и дека тоа ќе биде пропаст за градот. Чинговски признава дека било договорено со ДУИ од 150 луѓе 28 да бидат од ДУИ. На крајот од разговорот, Чинговски ја разоткрива целата вистина – дека ангажманот на волонтерите е само за предизборниот период и дека потоа никој од нив нема да биде вработен.

 

„ИНДИЈАНСКО ДИВО ПЛЕМЕ“

Во разговорот што следува, помеѓу Гордана Јанкулоска и Сашо Мијалков, слушаме како министерката зборува за „Индијанци“ и „диво племе“ кога зборува за Албанци.

Потоа се слушаат три разговори поврзани со локалните избори. Првиот разговор е помеѓу Антонио Милошоски и Дарко Димитриески, поранешен пратеник на ВМРО-ДПМНЕ од Гостивар. Тој кажува дека изборната листа на советници од ВМРО-ДПМНЕ не е добра и дека на неа нема луѓе со авторитет.   Во вториот разговор на истите соговорници  дознаваме како за време на локалните избори 2013 година, членовите на ВМРО-ДПМНЕ добиле наредба од Скопје, пренесена преку ОК на ВМРО-ДПМНЕ во Гостивар, да гласаат за кандидатот на ДУИ, актуелниот градоначалник на Гостивар, Невзат Бејта. Според Димитриески, Руфи Османи реално бил фаворит на локалните избори.

Во следниот разговор, кој е на албански јазик, Фатмир Бесими од ДУИ го потврдува пазарењето со ВМРО-ДПМНЕ членовите на ВМРО-ДПМНЕ да гласаат за кандидатите на ДУИ во Тетово и Гостивар. Бесими вели и дека ако за Тетово ВМРО-ДПМНЕ направело договор со ДПА, таа албанска партија би ја земала власта во градот. Слушаме и дека имало договор ДУИ да „даде гласови“ за ВМРО-ДПМНЕ во Карпош и Велес.

 

ПОТКУСУРУВАЊЕ НА БРАНИТЕЛИТЕ ЗА ТРАМПА

Потоа следуваат осум разговори коишто ги разоткриваат манипулациите на ВМРО-ДПМНЕ околу Законот за бранителите, кој не се донесе.  Во првиот разговор, помеѓу Никола Груевски и Силвана Бонева, Груевски кажува идеја која му текнала кога си легнал – дури се скарани со ДУИ да го пуштат Законот за бранители во собраниска процедура. Потоа дознаваме дека мотивот за таквиот потег е тој закон всушност да не биде донесен, а тој момент да се „чува“ за пазарење со ДУИ. „Ќе го паркираме и ќе чекаме момент кога ќе им треба на нив некоја битна работа, која што итака и така ќе треба да ја исполниме…“ вели Груевски.

Во следниот разговор, на Груевски и Јанкулоска, таа кажува дека поднесувањето на предлог-законот во Собранието повеќе е „ефект во јавноста“, а Груевски калкулира колкаво покачување да се направи во финансискиот дел, за со тоа да се постигне остра реакција и спротивставување од СДСМ. Со други зборови, да се прави сѐ само предлог-законот на ВМРО-ДПМНЕ да не биде изгласан. Потоа во третиот разговор, Јанкулоска заклучува дека може да се случи и Законот да помине во Собранието, па што предлага консултација кај Трајко Вељаноски. Слушаме и дека било реално остварливо законот да помине, поради поддршката на СДСМ и други помали партии, но тоа не е планот на ВМРО-ДПМНЕ.

Во следните два разговора, помеѓу Сашо Мијалков и Муса Џафери, се разоткрива договорот помеѓу ВМРО-ДПМНЕ и ДУИ законот да се поднесе, но никогаш да не се донесе.

 

ВО „СИТЕЛ“ ЗБУНЕТИ

Потоа го слушаме разговорот на сопственикот на телевизија Сител и нејзиниот главен уредник, во кој и двајцата се зачудени од постапките на ВМРО-ДПМНЕ да го повлече законот и потоа да го пушти во итна постапка. Слушаме и дека обајцата се убедени дека тоа што се прави со поставувањето на споменици нема никаков ефект, односно никому не му се прави ќеф. Потоа Латас му се јавува на Мартин Протуѓер, а тој го убедува дека „сѐ е под контрола“ и дека законот „нема да дојде до гласање“. Од тоа што го кажува Протуѓер гледаме дека повлекувањето на законот од собраниска процедура и повторното поднесување по итна постапка всушност е дел од манипулацијата на ВМРО-ДПМНЕ, за да се спречи можноста СДСМ да го поднесе истиот закон по итна постапка. Потоа Латас му се јавува на Горан Иванов да му каже оти од Протуѓер добил уверување дека работата е „под контрола“. Сепак, вели дека го јаде некоја јанѕа…

 

Сите „бомби“ се тука.

 

Прес конференција на Благојче Трпески, претседател на ОО СДСМ – Гостивар, во Гостивар, 25.04.2015

 

 

По оваа прес-конференција, ВМРО-ДПМНЕ реагираше со соопштение за јавноста, кое може да го прочитате тука.

 

Разговор помеѓу Александар Лефкоски и Влатко Чингоски

ВЧ: За друго нешто те барам..
АЛ: Има барање од највисоко ниво…..да се обезбеди возило за попис значи, најди некоја методологија да се обезбеди, не мора да знае тој другиот директор, дали е наше или некое шо не е брендирано, дали некое од овие што се обезбедувачи шо работат, ваму, таму, најди некое некое возило, и кажи му на Саше, Саше ево ти возило на терен, имаш на располагање за време на пописот.
Ал: До 15-ти, така директоре?
ВЧ: да да До 15ти, додека заврши пописот.
АЛ:Договорено,
ВЧ: Ако има нешто проблеми, ќе ми јавиш, ама гледај…
АЛ: Сигурно нема да има, ќе се слушнам сега со Сашо и нема никаков проблем да има.
ВЧ: Е така, кажи му директорот ми се јави, ќе ви обезбедам тука возило и ќе ви го дадам на располагање, нормално како што ќе ви го дадам така да ми го вратите, да нема некои проблеми таму.
АЛ: Сигурно, не ја ќе им го даам со мој шофер. Нема да им го даам тие да го користат.
ВЧ: доброо
ВЧ: Се што ќе ви треба, тука ви е, како ваше да ви е.15 дена, додека пописот ви е на располгање.
Е така..
АЛ: Ради сигурност, ја ќе го даам со мој шофер, некој наш човек сигурно шо ќе биде наш.
ВЧ: Да некој шо немал возило, да не знае и овој другиов, знаеш.
АЛ: Готово, директоре, договорено.
ВЧ: е така…Поздрав Александар, пријатно..
АЛ: Пријатно

 

Разговор помеѓу Александар Лефкоски и Владо Чингоски

ВЧ: Имате таму една девојка, Александра Заковска.
АЛ: Да.
ВЧ: Зорица, Зорица.
АЛ: Да, да.
ВЧ: Од Тетово.
АЛ: Да.
ВЧ: Шо е проблемот со нејзе?
АЛ: Па нема проблем, не знам сеа за што станува проблем со неа.
ВЧ: Па не знам, тука ми се луѓето од Тетово, се жалат, она секој ден оди со плачење дома, ниту има место за сместување, ниту за седење, не ја третираат исто како да е жива. Што е работата? Таа не е случајно таму дојдена, ниту па ја сум ја пуштил затоа што била убава или најдобра. Таа требало да биде таму и треба да си ја прифатите како таква. Саше рекол, немал место за нејзе. Кој е тој Саше да кажува дали има место, дали нема место.
АЛ: Не, вака сега, ја да ви кажам каква е ситуацијата.
ВЧ: Кажи. Ајде да знам и јас за да можам да си преземам и јас мерки.
АЛ: Значи, објективно ќе ви кажам како е. Како кажал Саше, не знам.
ВЧ: Добро.
АЛ: Значи, таа е примена таму и како што е примена, е примена. Е сега, во канцелариите таму што ги имаме постојните, значи, просторно немаме можност да ја сместиме. Ја најдов некое компромисно решение, е стаена во библиотеката.
ВЧ: Добро, во библиотеката, ама што работи таму?
АЛ: Си има таа, адаптирана е, таму има биро, све како што треба да биде сместено.
ВЧ: Добор.
АЛ: И таму си е. Сеа, реакцијата нејзина, колку што знам ја, е дека не добива доволно работа, меѓутоа, таа е примена на место кај што се две. Значи, место за водење на даноци, такво е местото, не знам точно.
ВЧ: Мхм.
АЛ: Е сега, колку има работа, тие толку ја делат работата, значи. Не можеме ние…
ВЧ: Најдете и нешто друго работа. Не е битно, што може она да работи со средно, дајте и нешто друго.

 

Разговор помеѓу Онер Јакупоски и Влатко Чингоски

ВЧ: Ало
ДД: Повели те слушам
ВЧ: Види вака прво сакам да те прашам за еден телефон од овој од градоначалникот не градоначалникот, директорот на националниот пар Галичица Зоки ама најдов, се снајдов во меѓувреме, го чув чоекот…
ОЈ: Добро…
ВЧ: Ти се знајш со него така?
ОЈ: Да бе…
ВЧ: Добро дете ми изгледа вака не знам сеа, наш е така, партиски?
ОЈ: Наш е да, да да наш е…
ВЧ: Наш…добро, се чув, фала ти за бројот, го најдов…Е сега ми најави нешто Веле утре…во вторник состанок со него, Веле Ѓорѓиевски
ОЈ: Да да…
ВЧ: Знајш за шо е таа работа? Не успеав да го прашам него шо е работава…
ОЈ: Бевме заедно ние во Парламент, бевме претходно…бевме кај Кире Божиновски, во врска со пописов само меѓудругото се отвори нешто во врска со Шпиље…
ВЧ: Добро…
ОЈ: …за претседателов на општинскиов Дебар некако таму да влезе пошо ваму кај шо е ниту е функционален ниту партијата ниту комитетот може да функционира, тоа е маката…
ВЧ: Каде е тој? Каде е сеа тој?
ОЈ: Тој е во Македонија пат на секцијата во Дебар ама таа е толку утепана работа што буквално губи на рејтинг и партијата и тој како човек како претседател не може ништо да помогне, патиштата се во лоша состојба, знаеш Македонија пат како е…
ВЧ: Да, да, а шо е по струка?
ОЈ: Дипломиран економист
ВЧ: Економист, добро…абе види знаеш како е со вработувањава…
ОЈ: Знам, знам…се јасно ми е
ВЧ: Додека не се објасни од некое друго ниво не се донеси одлука, не може да се реши тоа прашање…
ОЈ: Да..абе види сеа, добро е да поразговараме на таа тема зошто и членовиве што се на кадрова новиве беа тука..вика да напраите средба со Чинго па известете не зошто и Кире бараше некаква информација околу таа работа…
ВЧ: Добро де добро важи, ќе се видиме ние во вторник…
ОЈ: …да се напраи тоа пошто после ние имаме и за Студеничани, Долнени, Пласница….за пописов некои агенди и така
ВЧ: Така, добро, добро значи ќе се видиме ние тогаш во вторник а за ова завршив работа така да нема проблем…

 

Разговор помеѓу Миле Јанакиески и Никола Груевски

НГ: Миле?
МЈ: Да, да, Ве слушам.
НГ: А бе Радио Гостивар….
МЈ: Добро.
НГ: Ти се јавил еднаш Мане, да го земе некој наш, да видиме.
МЈ: А бе Претседателе, зборувавме и на Влада. Значи таму требаше стечај да покрени Горан Трајковски на Влада еднашка…
НГ: Чекај да те уклуачм, да слуша и Мане, да не прераскажувам, ајде, кажи сега.
МЈ: Значи таму главен доверител беше Управа за јавни приходи…
НГ: Добро.
МЈ: И бидејќи вработените во РТ Гостивар и тие побаруваат од Радио Гостивар не може да покренат стечај, зошто веќе треба да се плати, и Вие еднаш му рековте на Горан Трајковски, сега треба да проверам до каде е, да покрени стечај. И во стечајна постапка или да се купи или да се поништи или да се ликвидира, па да го отворат ново. Значи во стечај мора да оди таа фирма. На луѓето му е најбитно да си ги земат парите.
НГ: А да се даде на Унија на млади, нешто, на некој човек да го работи?
МЈ: Ама многу долгови има таму. Ако сака некој нека го земе, ама тоа не е профитабилно. Постои сега радиото, таму има еден вработен само…
НГ: Ама не е за профит. Работава е да го работи.
МЈ: Нека го работи Претседателе, ама има само еден вработен таму, сега. И нема ни опрема, ни ништо. Значи, на времето ставиле некоја антена, ама има многу долгови. Значи има кон Управа за јавни приходи, има плати, има здравствено, има ПИОМ. Ако имаме некој човек што може да го работи, нека го работи сега. Ама, Мане тогаш бараше да оди во стечај.
НГ: Е зашто не отиде во стечај сега?
МЈ: Па не знам Горан што направил, да видам, Горан што направил.
НГ: Е па ај види, па јави се.
МЈ: Важи.
НГ: Да го разбуричкаме ова и да го убрзаме.
МЈ: Ќе Ви пишам одма.
НГ: Или пиши, или јави ми се одма, тука сме ние во канцеларија.
МЈ: Ајде.

 

Разговор помеѓу Сашо Акимоски и Владо Чингоски

СА: Aло?
ВЧ: Саше.
СА: Молим директоре.
ВЧ: А бе Саше, видете вака сега. Значи вашите неажурности немој на мене да ги…——-. Јас постапив онака како што ми беше кажано од генералниот секретар. Собери ги сите пријавени, достави ги до кадровска, Стојче ќе си ја заврши работата, ќе ти даде пречистен текст кои да влезат. Јас тоа го направив. Не може сега…
СА: Ама како може Стојче без нас да не праша таму кој…
ВЧ: Тоа не знам јас. Јас тоа не знам. Јас од Стојче добив официјален документ во кој што пишува: тие што се со зелено се наши членови и тие треба, по можност да влезат. Таму кај што немаме бележано изберете вие по, да речам, по квалитет, по оценки што имаат и ставете ги.
СА: Ама директоре вака, јас му реков на Стојче треба да ни дадат кои се наши, кои се од ДУИ, ние не можеме да решаваме. Зошто едно е да се решава во Кавадарци, друго е да се решава во Гостивар.
ВЧ: Тоа што е со ДУИ, јас ќе го решавам. Значи јас знам колку места тие можат да добијат и колку они…
СА: Ама ние не знаеме кои се наши места, како да дадам име. На пример, електроинжењер еден, и ако е од ДУИ како да дадам јас име?
ВЧ: Ама немат од ДУИ. Они што ќе дадат ќе видам јас, ќе ги ставам таму кај што можам да ги ставам, нема што да им дадам нив електроинжењери. Електроинжењери си имаме ставено наши, Филип е ставен ако те интресира точно, Тодоровски.
СА: Ама не…
ВЧ: Од кај вас.
СА: Добро тој Филип Тодоровски, меѓутоа другите имиња, хаос ќе биде во комитетот. Јас еве, значи…
ВЧ: Е па тоа е твој предлог, не е мој.
СА: Ама не, не. Јас не сум го направил, јас немам ниедно име…
ВЧ: Два месеци е конкурсот. Ама два месеци е Саше конкурсот за волонтери, тебе денеска ти текна да прашаш? Кога стигна списокот во Гостивар?
СА: Ама, јас не Ве онадам Вас него тие што Ви дале. Не може, ние немаме дадено ни едно име и сега…
ВЧ: Ама јас како можам да работам? Може да работам врз основа на информации. Информациите се дадени до сите подружници, до сите директори. Од сите се добиени назад повратни…
СА: Мхм.
ВЧ: Мислам од општинските комитети, пардон, не директори, него општинските комитети, врз основа на нив направивме избори. Јас си викнав комисија од 7 члена, како магари им дадовме таа комисија да го потпишат готовиот список, и сега јас да ги враќам назад!?
СА: Директоре ова мора да се сопре во Гостивар, значи нема шанси да пројде…
ВЧ Не може да се сопре. Таму е дадено, види го ти кај Александар. Ако има некој сериозне проблем, ќе разговараме, ама не можам да го сопрам, како да го сопрам?
СА: Не бе, Александар не смее да потпише тоа. Како смее тоа да потпише? Јас во понеделник сега ми закажаа прием кај шефот. Нема теоретски шанси, па ја таму…да ме утепаат во Гостивар мене. Што да правам? Не мора да бидам ни претседтел…
ВЧ: Е па што не си ја заврши работата ти?
СА: Не морам ни да бидам…како јас бе директоре? Тоа Стојче го има направено…
ВЧ: Е па така фино. Ти си во Маврово…
СА: Јас!?
ВЧ: Знаеш дека има конкурс, знаеш кои се пријавени! Ќе ги направиш, ќе кажеш кој треба да помине, кој не! Кој сакаш да ти го направи тоа!?
СА: Ама директоре, мене не ми е дадено, значи за овие и овие решавај. Треба да знам за кои места, значи има таму по образование…
ВЧ: Ама што да ти дадеме? Ти си во ХЕЦ Маврово, вработен си. Знаеш дека има конкурс објавен, ќе си прашаш кои се пријавиле на тој конкурс. Списокот ќе си го земеш од горе, ќе си провериш!
СА: Не ми го даваше правничката списокот, го побаравме, вели не смеам да давам…
ВЧ: Ама која правничка!? Горе од кадровска ќе си го земиш! Јас цел список на кадровска го дадов.
СА: Никој нас, ништо не ни дава. Значи…
ВЧ: Е па сега не знам дали ви дава или не ви дава. Јас не можам да се бларима пред луѓето. Досега беше ова дадено, сега ќе ви дадам друг список. Како можам да ги натерам луѓето да потпишуваат друг список?

 

Разговор помеѓу Сашо Акимоски и Владо Чингоски

СА: Ало?
ВЧ: Кај си бе Саше?
СА: Еве бе директоре со Мартин, што да правиме.
ВЧ: Кај си?
СА: Со Мартин викам, што да правиме.
ВЧ: Со Мартин?
СА: Па цела ноќ расправаме за овие работи што беше, за ова..
ВЧ: Е па јас знам дека ќе се расправате. Кога не можиш да речиш дека тоа е завршена работа, ќе се расправаш. Него, мене ми треба што поскоро да ми дадеш, зошто не можам да чекам. Тоа морам да го објавам. Можат сите луѓе во исто време да дојдат.
СА: Директоре има таму…
ВЧ: На тебе се чека, ти се чекаш.
СА: Не, добро. Ама таму има сега еден проблем. Овие нашиве, никако вика, нема теоретски шанси, повеќе има Албанци од Македонци, тоа е вика пропаст за Македонците во Гостивар. И сакаат да одат кај Кире, секретарот.
ВЧ: Пропаст е зошто сте 25% таму.
СА: Ама не смееме да дозволиме, верувајте. Еве јас душа немам, со седативи сум. Цела ноќ до 2 саатот…
ВЧ: Е па не дозволувајте, тогаш нема да има избор за Маврово и готово. Вие слушајте бе луѓе! Што сакате? Преку леб, погача сакате?
СА: Директоре…
ВЧ: Тоа е вистината, тоа е вистината!
СА: Не смееме сега…
ВЧ: Таму има повеќе Албанци, него што има Македонци. И мора да има повеќе од нив. Не може да глаам Албанци во Битола и во Тиквеш, кај што нема!
СА: Ама не смееме сега пред избори, ова е…
ВЧ: Ама јас морам да клаам 30, договорени се. Кај да ги стаам? Кај да ги најдам другите?
СА: Не, мораме за 2-3 да намалиме и ќе биде добро.
ВЧ: Не можам да намалам. Не можам да намалам, тоа договорете се со ДУИ. Толку се. 28 му дадов од 150 луѓе. И веќе нема смисол. Тие бараа 40, јас ги намалив на 28.
СА: Ама ова е пропаст за Гостивар, сега пред избори.
ВЧ Нека е пропаст. Нека е пропаст. Вие не можете да прајте, не можете да прајте рејтинг врз основа на мене бе!
СА: Не, ние…не знам, значи овие сакаат да одат до кај, до кај генералниот…
ВЧ: Нека одат кај сакаат. Дај ми ти мене список, денеска до 3 саатот да имам список, да го реализирам тоа, зошто јас не можам да чекам.
СА: Ама они ми даваат список со 15 души.
ВЧ: Нема 15! Кажи му дека има 7. Нека си изберат кои 7 и нека ги дадат. И ова е волонтери бе луѓе! Што мислите бе вие, вработување ли е ова? Ниеден нема да вработам бе, ниеден нема да оди волонтер. Ќе ги стаам само Албанците, ниеден Македонец нема да помине. Јас ви кажувам. Па вие одете кај сакате!
СА: Ама…
ВЧ: Волонтери се бе овие! 4.000 денари ќе земаат, 5 месеци и после ќе си одат дома! Што мислите вие, ќе ги вработиме? Нема вработување, разберете!

 

Разговор помеѓу Гордана Јанкулоска и Сашо Мијалков

ГЈ: Ало, ало
СМ: Горде, што праиш?
ГЈ: Добро, еве, си работам. Ти шо праиш?
СМ: Шо се тие проблеми од сабајле бе?
ГЈ: А бе, ги решивме конечно. Индијанци, шо се. Што да ти кажувам. Индијанци.
СМ: Индијанци, а. Мене ме бараа уште во 9 сабајле.
ГЈ: Па, за тоа те бараа, ама ја знаеш, синоќа ми се јави мене Муса. Значи, да не знаат како треба, ќе речеш ок, наш пропуст е. И му кажав. Викам, Муса, по закон, за таква работа мора да има заклучок или одлука на Влада. У конкретниов случај треба заклучок. Оти викам, еве, Србите доаѓаа на Зебрењак, имаше заклучок на Влада. Бугарите транзитираат за во Тирана…
СМ: А, што ги кошта да се запази процедурата?
ГЈ: А, диво племе бе Сашо. И после, ајде, се најде…Ја викам, не можам да ги пуштам, знаеш, од кај ги знам бе. Утре ќе отидат у Слупчане, таму венци, ова, она, ќе речат, чекајте бе, како влезе војскава, плус, не знам, ќе му речеш нека влезе еден, ќе влезат десет души, знаеш. Со нив никогаш не си на чисто. Во целава ситуација може тензија да се направи. Ко да пропаднал у земја. Сабајле, пак почнаа да досаѓаат.
СМ: Јас зборев со него вчеа у 12 и пол ноќеска. Шо не ми кажа он.
ГЈ: И не ти кажа?
СМ: У 12 и пол ноќеска, 20 до 1 беше.
ГЈ: Е, а јас зборев со него пред 10. Тогаш се прибрав дома, и он ми зазвони и одма му се јавив. И му објаснив како е, не, не, и сабајле пак му објаснив. Викам, луѓе не може вака. Не може некој си Селвер таму да ни праќа писмо на МВР, пуштете ги тие и тие. Од кај знам кој е Селвер.
СМ: Од кај е тој?
ГЈ: Од кај знам, некој од Министерство за одбрана. Значи, ако веќе некој стои зад тоа, треба да е началник на Генералштаб…
СМ: Од нашето Министерство?
ГЈ: Не, не, од нивното, од Одбрана. Знаеш, треба овластено лице да потпише, не може Селвер или Кенан, или не знам кој.

 

Разговор помеѓу Антонио Милошоски и Дарко Димитриески

ДД: Ало
АМ: Антонио е на телефон, што праиш добар си?
ДД: Еее шо праиш Антонио?
АМ: Здраво живо…добар да ти кажам, за Гостивар ги гледав ова листиве предложени што се за советници…
ДД: Да…
АМ: …кандидати, а зошто нема пишано овде кој е носител, кој е предлог за носител?
ДД: Па имаме дадено ние Антонио предлог за носител, 7 души беа дадени…
АМ: Аха, ама…
ДД: Да… Заедно сите и рекоа ќе ни кажат од Скопје кој да биди носител …
АМ: Аха, аха…а кај е таа листа, не ја знаеме…
ДД: Па не знам каде е ја имаше доставено…
АМ: Не ни е нас во овие документиве…во овие документиве шо се за советници, таа посебно да не е пратена некаде… ама еве од Сашо…не, не не…добро ај ќе го барам Сашо, добро, добро…
ДД: Да, да, пред 7 дена ја дадовме…ние вчера имаше состанок ова листава што е тука, се напраи ја бев горе на промоција, знам кои се стаени тука така…
АМ: Да…
ДД: …меѓутоа имаме друга листа…
АМ: А листата инаку добра како ти изгледа?
ДД: Па, можеше многу подобро да се направи…многу, многу подобра можеше да се направи…
АМ: Кој е Љубомир Ристовски на 4 место што е невработен?
ДД: Види сеа… тој е претседател на унија на млади сили што мислам дека не треба да биде на толку високо место зашо ние во Гостивар толку советници ваџаме… што можат да повлечат и луѓе, што можат да се спротивстават и на албанциве тука и политика што се..
АМ: Мхм..
ДД: Иначе шо се вика и третиот е тотално анонимус…
АМ: Горан Давидовски…
ДД: …ее така, анонимус е тој од месен комитет Дудлок е анонимус и втората е од жените а тука замисли Антонио не е стаена претседатлката на унија на жени, не ја стаиле на листа ја стаиле таа Тода Крстеска, таа не е толку лоша али се разбира дека оваа што е на жени требе да биде, не таа…
АМ: Мхм…добро…
ДД: Значи многу, многу подобра листа моеше да се напрајт али тоа е тоа…

 

Разговор помеѓу Дарко Димитриески и Антонио Милошоски

ДД: Ало
АМ: Дарко, здраво живо.
ДД: еј здраво
АМ: Добро утро. Добар си?
ДД: Добар, добар.
АМ: Што сакав да речам..Што би била нашата добивка од тоа што би го поддржале?
ДД: ЕЕЕ што би било.. Овдека значи, ние правевме муабет скоро целиот општински комитет, неформално, ова ….значи сите се сложуваме дека тоа е добро и за Гостивар, и за нас тука на централно ниво.
АМ: Да
ДД: Меѓутоа вчера, тие ми се јавија да го подржиме Бејта, уствари…Тоа доцна навечер беше, дванаесет и пол беше саатот.
АМ: А кој Нино Тодоров, Кире или кој?
ДД: Кире, Кире му се јавил на претседателот, тој ми се јави мене , во… треба да се видиме и ќе треба да му дадете подршка на Бејта, така било договорено на централно ниво.
АМ: Да не е нешто врзано со Куманово, да не е врзано со нешто друго?
ДД: Сигурно, сигурно е нешто врзано. Прво, рекоа колку гласа може да обезбедите вие? И ние им кажавме, она што е наше, колку гласа, кој знае колку гласа овдека би можело да им дадеш. Меѓутоа им кажав некоја бројка кој бајаги од 3500 до 4500 гласа може ќе им обезбедиме. Сега тоа е, колку ќе испадне тоа е друго прашање, затоа шо луѓево…
АМ: А таму колку е разликата? Тесно е така?
ДД: 600 гласа
АМ: 600 гласа за Руфи, така?
ДД: За Руфи, со тоа што Руфи беше едно четири пет дена во Швајцарија, Австрија и Италија беше и се врати завчера и има најава дека ќе дојде ….за негова поддршка и мислам дека, мое мислење е дека Турците тука многу ќе гласаат за Руфи.
АМ:аха
ДД: Да, затоа што беше и градоначалникот тука на Истанбул, двајцата градоначалници на Турција беа пред неполн месец тука во Гостивар, и му дадоа така некоја поддршка и Турците мислам ќе гласаат и плус ДПА тука ќе му даде поддршка на Руфи, а ДПА имаше 3000 гласа тука во Гостивар.
АМ: Значи може да испадне ние и да го подржиме Бејта и пак да изгубиме.
ДД: Да да може да изгубиме
АМ: Џабе ќе ни биде поддршката
ДД: Бадијала ќе ни биде и ….
АМ: да,да

 

Разговор на Фатмир Бесими со соговорник

С: Ало
Ф.Б. Ало
С: Што правите? Славите?
ФБ: Славиме ние. Вие што правите?
С: Бев во Тетово, и сега дојдов дома.
ФБ: Во Тетово имаше нешто? Помина ли гужвата?
С: Имаше гужва малку во центар…коли се вртеа…луѓе, и така
ФБ: Таму во Четврток ќе биде.
С: Да во четврток.
ФБ: Вечерва бевме во Гостивар. Имаше многу народ.
С: Завршивте?
ФБ: Да завршивме, завршивме…тие продолжија со коли, ама ние излеговме.
С: Како се случи ова?
ФБ: Е ајде де…чуда се случуваат.
С: Знаеш ли во Куманово како испадна?
ФБ: Во Куманово изгледа СДСМ победиле.
С: А не е фер.
ФБ: Зошто?
С: Сме испаднале предавници.
ФБ: Не предавници…ние толку, 2000 гласа…тие бара 1500 ние им дадовме 2000 наши гласови.
С: Така ли. Е па тогаш е ОК.
ФБ: Не сме се посрамотиле ние. Тие се прекалкулирале.
С: Е па ОК. Супер…бидејќи тие ни помогнаа многу во Тетово и Гостивар.
ФБ: Да. Посебно во Гостивар. И во Тетово помогнаа. Да се врзеа со ДПА ќе не заебаа.
С: Во Тетово?
ФБ: Да се врзеа со ДПА…
С: Да, да можеа да не заебат.
ФБ: И да ги извадеа…колку има во прв круг…7000, да извадеа 5000 ќе не победеа.
С: Да, да со 5000 ќе не победеа…
ФБ: Да. А овде имало многу ефект..
С: Имало, имало
ФБ: Важно фунционирало…ние сме им дале на некои места, каде што со наши гласови поминаа нивните…во Карпош, во Велес…
С: Така ли?
ФБ: Да, да
С: Супер.
ФБ: Имало ефект и во Јегуновце, но за нас беа многу важни овие два града.
С: Голема работа сме направиле.
ФБ: Така да…добро е.
С: Го исчистивме овој од Гостивар…тој дефинитивно лидер неможе да биде…можеше само проблеми да прави.
ФБ: Да бе, штета правеше…барем вака сега…
С: Да.
ФБ: Знаеш ли кој најповќе се радувал што овој изгубил?
С: Да?
ФБ: Знаеш кој? Изет.
С: Да, да има шанси да се радувал.
ФБ: Си вели…овој ме извади да изгубам, изгуби и сам.
С: Да. Има многу шанси бидејќи изет ионака веќе одлучил да се врати на Универзитет…така да сигурно му било драго.
ФБ: Да.
С: Одиш накај дома сега?
ФБ: Да, сега одам.
С: Ок. АЈде
ФБ: Ајде.

 

Разговор помеѓу Силвана Бонева и Никола Груевски

НГ: Силвана!
СБ: Ало, повелете Претседателе.
НГ: А бе синоќа ја, на Извршен не ми текна, ама после вечерта кога си легнав ми текна една идеја.
СБ: Да.
НГ: Сега дур сме ние скарани со овие, со ДУИ…
СБ: Мхм.
НГ: Да си го пуштиме денес Законот за бранителите у Парламент, пратеничката група. Аааа…секој ќе не разбере, таква е ситуацијата. Они многу ни го повредија достоинството на Македонците, на бранителите и така натаму. А…
СБ: Да не ни…в ред, в ред.
НГ: Ќе дојде до гласање, ќе го паркираме. И ќе чекаме момент кога ќе им треба на нив некоја битна работа, која што и така и така ќе треба да ја исполниме и тогаш ова. Ќе речеме: добро, ама вие, тоа да речеме после година-две, изгласајте ни го ова.
СБ: Мхм. А они што ќе пуштат овој, закон за…
НГ: У старт ќе им го одбиеме, у старт.
СБ: Ќе го фрлиме право.
НГ: У старт гласање против, без многу расправа гласање против. Без многу да се плукаме…
СБ: Не, в ред, да…
НГ: Пратеничката група нема да го поддржи овој закон, бам-бам и у старт. Они ќе го пуштат, ние ќе си гласаме против.
СБ: В ред е за Законот за бранителите, само да не ни се закочат у моментот ни се тие што треба да преговараме за нив. Оти ептен ќе стане…
НГ: Нема да се закочат.
СБ: Нема да се закочат?
НГ: Од понеделник ќе се смируваме.
СБ: Од понеделник ќе се смируваме, така ли?
НГ: Ќе се смируваме од понеделник.
СБ: Е тогај…
НГ: Вторник, среда, четврток негде ќе дојде Али, зошто, како, вака, така…
СБ: Аха.
НГ: …крив е оној, овој, знаеш како иде тоа.

 

Разговор помеѓу Гордана Јанкулоска и Никола Груевски

НГ: Ало.
ГЈ: Ало, да.
НГ: Горде,
ГЈ: Да.
НГ: Овој за бранителите Влатко со Билјана го доработуваат сега.
ГЈ: Мхм.
НГ: Ќе го пуштиме.
ГЈ: Добро, јас Ви го пратив и сза да видите кај све интервенирале, мислам брзо се прави…
НГ: Кај финансискиот дел, она што ние сме го прифатиле, малце ќе качиме, едно 20-30%, да, оти ЕС-ДЕ-ЕС на тоа ќе ни се нафрли знаеш.
ГЈ: Да де да, мислам тоа е.
НГ: Они ќе речат сега ќе ве оставиме да испоентирате вие, неее и… ќе не тепаат на тоа. Така да 20-30% ќе качиме, 90% законот нема да се усвои…
ГЈ: Да де да.
НГ: 10% ако се усвои, малку повеќе пари…
ГЈ: Повеќе за ефект во јавноста. Јас сега мислам, немаше време од сабајле, искрено да Ви кажам, сум ја заборавила и содржинава, ха, ха, поминаа од тогаш 4 години. Ама нели таму имаме станбено обезбедување колку им следува, и сега ми падна вака мисла на памет, можда некако со „Купи куќа, купи стан“ можевме да го врземе, ама нема толку време… НГ: Нема време.
ГЈ: …да го размислиме, да го разработиме. Оти тогаш нам тогаш ни на крај памет не ни паѓаше дека таков проект ќе имаме.
НГ: Да де да.
ГЈ: Но како и да е, мислам тоа што политички ни е за поентирање ќе си се постигне ефектот.
НГ: Не е лошо Влатко кога ќе го спреми Влатко да ти го пушти, со Билјана кога ќе го спремат, да го видиш.
ГЈ: Важи, важи ќе се чујам јас, ќе се договориме.

 

Разговор помеѓу Гордана Јанкулоска и Влатко Илиевски

ГЈ: Пошто нели сега ќе се крати во Собрание, во основа тој Закон не се носи ни со Бадентер, ни со 2/3. Значи може да помине. Меѓутоа, што има една зафркација. Законот со тој назив што ми го кажуваш и што си го носи, не е предвиден во листата на закони што се носат со Бадентер. Нели во тој посебниот закон…
ВИ: Аха.
ГЈ: …за Комитетот за односи меѓу заедниците. Таму се наведени точно кои закони.
ВИ: Така, така.
ГЈ: Е сега, ако се менуваат законите што не се донесени со Бадентер, значи без Бадентер се менуваат. Не знам ова како ќе се третира, зошто е нов закон со ист назив. По мене, штом не е на листата, не треба Бадентер за тој закон.
ВИ: А бе ние, ја реков да оди у редовна постапка, така да…
ГЈ: Не, добро, ама ние да си го антиципираме тоа, оти реално, може ќе треба и со Трајко Вељаноски да направиме една консултација, оти реално може да се случи и да помине законот. Пошто гледај, нашиве би го гласале ниели, мора наш да го поднесе…
ВИ: ЕС-ДЕ-ЕС ќе го гласа.
ГЈ: ЕС-ДЕ-ЕС ќе го гласа, дури и бадентер може да се озбезбеди со нашиве етнички заедници и со едничките заедници од ЕС-ДЕ-ЕС. А мислам дека не треба бадентер по таа логика. Оти законот таксативно, овој за Комитетот за односи меѓу заедниците вика дека измените и дополнувањата на тој, на тие, тие, тие таксативно набројани закони ќе се носат со Бадентер и истотака ќе се применува и принципот на Бадентер врз основа на одлука на Комитетот за сите идни закони што се однесуваат на употребата на јазици, образование, лични документи, симболи и така натаму.
ВИ: Ај добро, ќе…сега го пишувам ова образложението на законот. Ај ќе збориме после.

 

Разговор помеѓу Муса Џафери и Сашо Мијалков

МЏ: Е здраво.
СМ: Здраво Муса, како си?
МЏ: Добар, добар. Вие?
СМ: Добар, еве и ја. Ова е завршена работа, повлечено, пуштено пак и така. Па…
МЏ: А бе, јас читав ова, нели ќе барате и дискусииве во комисија да бидат по скратена постапка, тоа ќе биде потешко.
СМ: Нема да биде, не се секирај, ќе биде исто се. И затоа ти се јавувам да отидеме кај Трајко, ако можеме вечер. За да се издоговориме за сите детали.
МЏ: Па кога можеме?
СМ: Па еве 9.30-10, можеш? Вечер.
МЏ: Значи 9.30, океј можам.
СМ: Е така, измеѓу 9.30 и 10, сега ја ќе му јавам дека ние тоа време ќе дојдеме.
МЏ: Ај ќе ми пишете порака точно кога.
СМ: Да, да, да. Важно тоа време 9.30-10.
МЏ: Пошто имам некои состаноци.
СМ: Е така, ајде.
МЏ: Океј. Чао.
СМ: Чао.

 

Разговор помеѓу Муса Џафери и Сашо Мијалков

МЏ: Ало?
СМ: Муса,
МЏ: Да.
СМ: Еве јас возам натаму.
МЏ: Ние сме кај пријателот.
СМ: Таму си? Еве јас доаѓам, таму сум за…
МЏ: Го зедов и овој координаторот, мојот, пошто не ги памтам, Талат…
СМ: Значи за 5 минути ќе бидам кај Трајко.
МЏ: Океј, океј.
СМ: Ајде.

 

Разговор помеѓу Драган Павловиќ Латас и Горан Иванов

ДПЛ: Повели директоре.
ГИ: Што правиш?
ДПЛ: Ништо, на интернет нешто, гледам ова, гледам она.
ГИ: Ааа. А бе јас сега се уклучив па гледам…
ДПЛ: Што?
ГИ: Овие го повлекле Законов, по итна постапка ќе го пуштаат.
ДПЛ: Кој закон?
ГИ: За бранители.
ДПЛ: Е ова ми е ново. Што значи сега тоа по итна постапка у однос на ова?
ГИ: Па тоа значи ограничување на дискусии, по брза постапка да се носи. Да се прескокнат некои…
ДПЛ: Не знам, јас сега се чув со Мартин, не ми кажа ништо за тоа. Сега се чув, пред 10 минути.
ГИ: Значи стварно не ми се јасни, тие, овие, лудачки национални испади.
ДПЛ: Ха, ха.
ГИ: Не, нема логика стварно. Таман го заборавивме, значи јас им забранив да го кај нас третираат, и гледав по сајтови, тие нивните чат-пат ќе спомнат…
ДПЛ: Да, да.
ГИ: …умре тоа више како тема.
ДПЛ: Така е.
ГИ: И —– беше ова што нашрави глупост со Бранко. Сега пак го враќаме, го актуелизираме, стварно не можам да сватам што е.
ДПЛ: Јас сега се чув со Мартин, дека се договориле со овој, три споменика ќе ставеле на, како се вика…на овој у Чаир. Еден македонски војвода, еден турски, еден албански. Тоа вака ми делуеше дека нешто се договарало, преговарало. Ај да зборнам па ќе ти јавам, пошто ова е ново.
ГИ: А бе што ти е, споменици голем к..р, стотици ги има на другава страна. Кој приметува споменик, дали е шиптарски, така ли?
ДПЛ: Да. Ма и 15 да турат македонски нема на никој ќејф да му направиш. Ништо ново не е тоа. Ај да видам, чекај да го прашам човекот, чекај малце.

 

Разговор помеѓу Драган Павловиќ Латас и Мартин Протуѓер

МП: Ало.
ДПЛ: Ало.
МП: А?
ДПЛ: Сега кажи ми што значи ова по хитна постапка што ќе иде законот бе?
МП: Тоа значи првата фаза се, се, се скока.
ДПЛ: Како?
МП: Тоа значи дека првата фаза се скока.
ДПЛ: Добро.
МП: И ја укинуваме оваа фаза да молчат по амандмани и вовдеуваме правила, да се, како на пленарка 10 минути да се збори.
ДПЛ: Добро, ама кога ќе дојде до гласање овој нема да ти го изгласа и после?
МП: Еее, нема да дојде до гласање.
ДПЛ: Како?
МП: Нема да дојде до гласање.
ДПЛ: Сигурен си?
МП: 100% Зошто…
ДПЛ: Зошто…
МП: Они за еден амандман, за еден амандман ќе се збори 140 минути.
ДПЛ: Сега?
МП: Не, не по нови правила. По ова новово што го правиме. Они максимум ќе ги користат, сигурно…ја претпоставувам сега дека максимум ќе ги користат опциите да саботираат.
ДПЛ: Добро.
МП: И ќе поднесат миљарда амандмани.
ДПЛ: Добро, а сега…ама зошто по итна постапка? Он тоа може да го прави у редовна постапка.
МП: Не, не, не. Не може во редовна зошто не може да се одглави од првата постапка. Го пуштивме во редовна два месеци, видовме како е.
ДПЛ: А не може да се одглави од Комисија мислиш?
МП: Да, не може да искочи од Комисија. А сега автоматски кога ќе се изгласа да оди по итна постапка…
ДПЛ: Аха.
МП: Тогаш се, тогаш првата фаза се скока и директно се оди на амандманска фаза. Разбираш?
ДПЛ: Добро, ама вика у смисла, тебе што ти смета ако стои у Комисија, што губиш ти?
МП: Губам затоа што сите мислат дека е договорено и дека ја има сеуште оваа опција која ЕС-ДЕЕС можеше да ни ја предложи во наредната недела, можеше да рече ние го даваме истиот закон по итна постапка. Разбираш?
ДПЛ: Аха, аха да те стави на чистина.
МП: Да, да, да. Е вака ние го правиме тоа.
ДПЛ: Добро, ваљда знаеш што правиш, у пичку мајчину.
МП: Не се секирај бе сега ти.
ДПЛ: Да не се доведеме у ситуација да се закрвиме без потреба, ме разбираш.
МП: Не се секирај море, што би рекол Миле.
ДПЛ: Добро, добро. Добро ајде.
МП: Да. Само да се држиме принципиелно. Си сакаме да се изгласа, тоа е. Утре прес ќе имаме, ќе тераме и така.
ДПЛ: Добро, добро. Да не ја претераме работата.
МП: ДУИ што ќе прави е нивна работа. Ја мислам дека ќе биде океј.
ДПЛ: Како?
МП: ДУИ што ќе прави е нивна работа. Ја мислам дека ќе биде се океј и не треба да се секираш.
ДПЛ: Па е подобро да се координираш, да има некоја логика, разбираш. Оти ако иде секој по свое нема да ја постигнеме. Тоа е заебано.
МП: Не се секирај, не се секирај.
ДПЛ: Добро.
МП: Ха, ха.
ДПЛ: Ајде, ајде.
МП: Чао, чао.

 

Разговор помеѓу Драган Павловиќ Латас и Горан Иванов

ДПЛ: Завршив.
ГИ: Што вика?
ДПЛ: Под контрола, под контрола било тоа. Така се…така одлучиле, зошто ваму ЕС-ДЕ-ЕС можел да им предложи пошто не можел да помине законот, они да дадат исти таков закон по итна постапка.
ГИ: А, и?
ДПЛ: Па вака било боље пошто они ќе дале многу амандмани и тоа немало да помине.
ГИ: Аха.
ДПЛ: Ја му викам под контрола ли е? „Не се секирај“. Што да ти кажам.
ГИ: Што му викаш?
ДПЛ: Дали е под контрола, да не се деси проблем? Мораш да се договараш ако сакаш да се работи заедно, дури и да не се сакаш мораш да работиш и да збориш.
ГИ: Ааа, и?
ДПЛ: „Под контрола е, под контрола е.“ Добро му викам.
ГИ: Тебе како ти личи?
ДПЛ: Па ми личи дека знааат што прават, ама пак ме јаде некоја јанѕа онака. Како да ти кажам, беспотребно кога, кога се тера.
ГИ: А бе, кога—-
ДПЛ: Ха, ха.
ГИ: А нели му викаш дека умре целава работа?
ДПЛ: Не, не дојдов до таму. Пошто бевме за тоа кој е планот и…а бе ја треба да знам бе Горан нешто, пичка му матер, сфаќаш? Од тоа идам. Тоа не може без ништо да е, знам —-има. Тоа се кажуе, зошто јас сум изненаден што сум го видел, не сум ни го знаел ова. Така да ќе видиме.
ГИ: Ех…
ДПЛ: А ти кај го прочита тоа? Јас не сум го ни видел тоа.
ГИ: Сите го даваат.
ДПЛ: Не, не сум го ни видел уопште, ни по интернет.
ГИ: Сите, на time ова е прво.
ДПЛ: Аха. Ај ќе видиме што ќе биде, јебига. Ваљда знаат што прават. Тоа делуваше за ЕС-ДЕ-ЕС да не…сума сумарум, вака ќе се влечело, ЕС-ДЕ-ЕС ќе го влечеле намерно и онда они ќе предложеле: луѓе ова не иде вака, дајте по итна постапка да се донесе.
ГИ: Мхм.
ДПЛ: Као, така немало да биде под контрола. Е така директоре, тоа е.
ГИ: Пичку мајчину.
ДПЛ: Па ќе видиме.
ГИ: Значи не си до крај убеден дека е договорено?
ДПЛ: Па вака ми личи, разбираш, сега искрено да ти кажам. Значи вака не мислам дека ќе се деси некој проблем, ама не гледам зошто би се правеле циркузи од истата логика што ти го збориш, се завршило-се завршило. Ама, ваљда има логика па и тоа ЕС-ДЕ-ЕС да не го предложи по итна постапка и да ја земат они иницијативата околку сето ова. Значи ЕС-ДЕ-ЕС да го предложи, ДУИ може да даде 100 амандмани, ако гледаш така.
ГИ: Да.
ДПЛ: Што го спречува?
ГИ: Да де.
ДПЛ: Ама ваљда вака се држи иницијативата под контрола претпоставувам.
ГИ: Ах, пичку мајчину.
ДПЛ: Ха, ха. Да не бидеш раат тоа се вика.
ГИ: Леле, леле.
ДПЛ: А кога тоа ќе се решава? Оваа недела?
ГИ: Кое?
ДПЛ: Да се мењава статусот.
ГИ: Па сигурно одма.
ДПЛ: Е па ќе почекаме да го видиме, да видиме.
ГИ: Сега пак ќе се дигне горе по телевизии, по ова, по она, у п…у. А беше издишано, ова со Бранко што поднесе, го издишаа.
ДПЛ: Да, многу вакво помина, без, без никаков ефект.
ГИ: Добро шефе.
ДПЛ: Не се секирај, ако има нешто ќе ти кажам. Ќе се распрашам и лево-десно по пратенициве нивни.
ГИ: Мхм.
ДПЛ: Ќе ти кажам.
ГИ: Можеш Сашо да го прашаш.
ДПЛ: Првин да ги прашаме пратенициве што треба да го одработат, да видиме што им е кажано. Да видиме како им е кажано, да разберам.
ГИ: Ајде.
ДПЛ: Ќе прашам. Ајде ќе се видиме.


Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy) и Балканскиот фонд за демократија (BTD – The Balkan Trust for Democracy), иницијатива која поддржува демократија, добро владеење и евро-атлантски интеграции во Југо-источна Европа. Содржината на рецензијата е одговорност на авторот и не ги одразува ставовите на Метаморфозис, NED или BTD.

Напишете коментар

Вашата адреса за е-пошта нема да биде објавена. Задолжителните полиња се означени со *