Прислушувани разговори – сет 9: Општина Центар

 

 

Како ВМРО-ДПМНЕ се борело со сите орудија да ја задржи власта во општина Центар слушаме во овој комплет разговори, кои ги презентираше актуелниот градоначалник на оваа општина. Слушаме и за „преспанците“, и за украдени црни вреќи, и за поткуп и за присилување на гласање, како и за блокирање лифтови за да не се гласа… Слушаме и за бришење долгови за тие што ќе пребегнат во редовите на ВМРО-ДПМНЕ, за чистење на трагите, а ги дознаваме и „причините“ за изборниот криминал…

 

Овој, деветти по ред, збир на прислушувани разговори, е првиот обелоденет од друга партија, а не од СДСМ; истовремено, првиот презентиран од човек што не е партиски лидер (иако кратко пред тоа, до почетокот на февруари 2015 година, беше претседател на ЛДП).

Во овој сет се презентирани прислушувани разговори што се однесуваат на општина Центар, местење на изборите поради обидот на ВМРО-ДПМНЕ по секоја цена да ја задржи власта во оваа општина, заради проектот Скопје 2014, но и обиди за поткуп на советници од опозициските партии да преминат во редовите на ВМРО-ДПМНЕ.

 

ЦЕЛА ЗГРАДА ЌЕ ПРЕМЕСТИ…

Првиот разговор меѓу Јанакиески и Мијалков се случува во текот на пребројување на гласовите, при што двајцата се нервираат зошто опозицијата води, па паѓа и закана од Јанакиески дека цела зграда кај „Бристол“ ќе ја премести, луѓето ќе ги затвори, оти не гласале за ВМРО-ДПМНЕ.

Во следниот разговор се слуша како Јанкулоска не знае каде да ги „смести“ фантомските гласачи за општина Центар и смислува како да избегне да одговори на ДИК и да избегне средба со Жерновски, оти „нема шо да кажеш, жив си фатен“ во врска со фантомските гласачи. Потоа слушаме признание од Јанакиески дека лифтови се намерно блокирани за да не може да се симнат постари луѓе да гласаат. Во следниот разговор Јанакиески проверува со заменик-министерот за правда како да се добие избирачкиот список за да се фотокопира и да се види кој од Центар гласал, а кој не, а потоа со претседателот на Совет на Град Скопје договара да се притиска наставниот кадар да обезбеди уште гласови за ВМРО-ДПМНЕ.

 

„ПРЕСПАНЦИТЕ“ ЌЕ ИМ ЗАВРШЕЛЕ РАБОТА

Во разговорите потоа слушаме како Груевски вели дека „преспанците“ ќе им завршеле работа, како нарачува што е можно повеќе неважечки гласачки ливчиња, како изнервиран поради приговорите од опозицијата и поради тоа што губат, прави притисок Владимир Тодоровиќ да не го признае поразот официјално, а Јанакиески вели дека веќе го наложил тоа.

Јанкулоска во разговор во кој се споменува итно поставување на 20 вонгабаритни споменици во Центар, што веќе не може да се реализира, па бара повеќе полицајци да се ангажираат во општина Центар оти „можеби комуњариве ќе искочат“, и бара да се бришат податоци од компјутер во Општина Центар за да се исчистат трагите.

Потоа слушаме како Сашо Мијалков и Миле Јанакиески договараат поткуп на советник од опозицијата со тоа што итно ќе му се легализира куќата, па Јанакиески дури вели дека ВМРО-ДПМНЕ ќе му ги плати трошоците од 200.000, односно како што вели Мијалков, „ќе го частиме.

На крајот слушаме разговор на Мијалков со Драган Павловиќ – Латас,  во кој се зборува за тоа дека треба да се „исчисти“ трагата на она што ВМРО-ДПМНЕ го правело и за тоа како ќе се подготви терен за новоизбраниот градоначалник Жерновски да се заузда, односно да се „стави во машина“. Дополнително, се зборува и за можни преминувања на советници – четири потенцијални – од опозициски партии во ВМРО-ДПМНЕ.

 

Сите „бомби“ се тука.

 

Прес конференција на Андреј Жерновски, градоначалник на Општина Центар, Скопје, 12.03.2015

 

 

По оваа прес-конференција, ВМРО-ДПМНЕ реагираше со соопштение за јавноста, кое може да го прочитате тука.

 

Разговор помеѓу Миле Јанакиевски и Сашо Мијалков

МЈ: Сашо?
СМ: Кажи Миле сега еве тука сум со шефот.
МЈ: На обработени 39 гласачки места.
СМ: Да, колку е тоа посто?
МЈ: Сега ќе ти кажам, 42,4.
СМ: Добро.
МЈ: Ние имаме 7.178, тие имаат 7.391. Значи 120 разлика.
СМ: За нив?
МЈ: Да. 220 извини те лажам.
СМ: 220 за нив?
МЈ: Да . На 42 посто обработени.
СМ: Не ваљда дека ќе изгубиме за два-триста гласа бе п..у материну?
МЈ: Втор круг Сашо. Како што ти реков втор круг ќе има. Претпоставувам дека така ќе биде, илјада и нешто неважечки ливчиња ќе има.
СМ: Ако се докопаме ние до втор круг ќе го пребеме во втор круг. Него, да се докопаме само до втор круг.
МЈ: Море ќе ја преселам онаа зградана што е кај Бристол, мамата ќе им ја е..м.
СМ: А?
МЈ: Цела зграда ќе ја преместам, ќе ги затворам да не излегуваат тие од Бристол.
СМ: Викаш тие?
МЈ: Многу таму разлика ни направија у п…у матер.
СМ: Колку?
МЈ: Ај појди кај Бристол зградите, двете избирачки места, 2852…..190 разлика.

 

Разговор помеѓу Гордана Јанкуловска и Никола Тодоров

ГЈ: Уште една консултација со тебе. Ја на ДИК, она што ми бараа за избирачкиот список, не им го одговарам и сé уште им го немам одговорено за Центар, пошто…
НТ: Тоа што ни го наместија овие, мамето нивно.
ГЈ: Да. Пошто, како и да одговорам, не ни оди у прилог. Ја имам еден одговор округло па на ќоше, ама пак има, они со име и презиме ги бараат луѓево, знаеш. И има едно 50 луѓе за кои стварно, ништо не може да се измисли.
НТ: Хахаха, хахаха
ГЈ: Другиве нешто, ааа ууу, ааа ууу што, а овие мислам нема, шо и да кажеш, жив си фатен, хахаха, хахаха.
НТ:
ГЈ: Да. И сега ја мислам да не им одговорам до крај на избори, ќе им пуштам таму на 8-ми одговор некој, каков што ќе сметаме дека треба. Но има една друга работа. Овој Андреј Жерновски сега интензивно бара прием кај мене да разговарал за избирачкиот список.
НТ: Ти закажи му за 15 април, хахаха.
ГЈ: Не бе, не му закажувам. Јас очекувам он у понеделник да излезе и да каже, барав кај неа прием, или во текот на викендот, ама, пошто понеделник е работен ден, глупо е у недела да излезе за таква работа, ваљда не е толку глуп. А, нормално дека нема да му одговорам назад и ја ќе искомуницирам, или изјава ќе дадам, зависи како ќе ми се падне, или со соопштение, ако нешто друго неам у денот, дека апелираме до сите кандидати да не вршат притисок на МВР, не можеме да бидеме дел од нивната кампања и дрн, дрн.
НТ: МВР е професионална институција и надвор е…
ГЈ: Да, он сам ќе излезе и ќе каже, барав прием кај неа за избирачкиот, и пази, се претставува претседател на Либерална партија.
НТ: Аааа, големиот претседник.
ГЈ: Или, како му се вика, ЛДП. У тоа својство бара. Чекај бе, овакво, ти си кандидат за општина Центар. Ја планирам така, а денес не му одговарам. Денес се јавиле од Кабинетот кај него, не знам кој му е кабинет, жена му, гарант. И денес не му одговарам, а у понеделник ќе му одговорам така, и други кандидати барале средба…
НТ: Ние ќе го нападнеме денес јако, него, за некои станови таму.
ГЈ: Е па, нешто. Нешто, нагазете го, он да се правда.
НТ: Многу јако. Ќе го нагазиме од денеска, до таму негде, вторник, среда ќе биде под постава на паљба.
ГЈ: А, слушај, имам и уште една опција за него, зависи како ќе ми легне тој ден.
НТ: Аха.
Пошто он кажал дека бара средба за избирачкиот список, ја можам да му одговорам дека неговото барање е упатено на надлежната институција, Државна изборна комисија.
НТ: Да, така може.
ГЈ: Само, зависи како ќе ми одговара тој ден. Чим.
НТ: Уствари, знаеш што? Во рамки на проектот „ нема погрешна врата„ го препративме ова…хахаха.
ГЈ: Да, да, да. Нашето барање е препратено на надлежната институција за тоа прашање.
НТ: Да.
ГЈ: Зависи денот како ќе биде, знаеш, тоа е битно. Битно е да сме координирани.
НТ: Ние сеа ќе го запукаме, нема потреба да преземаш чекор, пред он да преземе.
ГЈ: Не, не, не. Ја го чекам он да искочи.
НТ: Кога ќе го запукаме сеа, денеска. Денеска, утре он ќе се правда и недела исто. Понеделник ние втор чекор презимаме. И понеделник и вторник ќе треба да се правда и среда више ќе има финале.
ГЈ: И ќе му збоктиса
НТ: И толку е, толку е.
ГЈ: Толку е више, заврши кампањава.

 

Разговор помеѓу Миле Јанакиески и соговорник

НН: Ало
ГЈ: Ало.
МЈ: Попизделе комуњариве, на нетови, нивниве новинари.
НН: Како?
МЈ: Ова е брука, се допре дното за писмава.
НН: За што?
МЈ: За писмава што ги пуштивме. Фалсификат, кривична, да одговараат…
НН: А, кај го читаш тоа?
МЈ: По фејцбуци, по твитер, оној Саше Аналитико, Мери што го правеше прилогон, администрација, ако ти текнува, на времето.
НН: Ааа, а шо пишуе?
МЈ: Па за писмото. Дека сме го допреле дното, дека луѓето се сведувале на забавно, дека сме фалсификувале потпис, дека е тоа кривично дело.
НН: Како не, кривично дело.
МЈ: Инаку, не работеа лифтовите од сабајле.
НН: Не?
МЈ: Не.
НН: Сега идам тука баш кај мене, да видам што се дешава. Што ќе се дешава брат?
МЈ: Че попиздат овие.
НН: Добро иде сеа?
МЈ: Не знам, че видиме.
НН: Ти кај си?
МЈ: Ама, лифтовиве не работат, хахаха.
НН: Хахаха. Леле, ќе биде циркуз, ќе викаат, ќе умрат.
МЈ: А?
НН: Ќе викаат, ќе умрат.
МЈ: Може да слезат од 15 спрат стариве? Не?
НН: Не бе, какво слегување.
МЈ: А?
НН: Не бе, шо ти е на тебе. Кај мене куливе, еве ги, штама е. Чоек нема надвор. У п…у матер. А, за писмово ако го дале, а добар погодок, значи.
МЈ: Че видиме, лоши се коментарите сеа.

 

Разговор помеѓу Билјана Бришковска и Миле Јанакиески

НН: Ало
ББ: Значи, вака сега. Претседател во Центар е еден морон што работи во Генерален секретаријат. Значи, работи во Генерален секретаријат во одделението на Суле. Така да, може него да го притиснеме и фактички од избирачкиот материјал да го извади избирачкиот список, кадешто е заокружувано кој гласал, кој не гласал, да си го фотокопираме па да му го вратиме назад.
МЈ: Кај работи тој?
ББ: Во Генерален секретаријат. Сега ќе ти…
МЈ: Како се вика?
ББ: Па Коста се вика. Презимето не му го знам точно, меѓутоа работи кај Кире, а шеф му е, мислам овој Суле.
МЈ: Суле?
ББ: Да, Суле бе Суле, Суле.
МЈ: Ај ке зборам.
ББ: Ајде.

 

Разговор на Миле Јанакиески и Ирена Мишева

МЈ: Ирена?
ИМ: Да.
МЈ: Значи те молам, кај сите учителки завртете, кол центарот,
ИМ: Добро
МЈ: Со следнава насока, ви благодариме што излеговте на гласање.
ИМ: Слушам, слушам
МЈ: Ве молиме за конечна победа на ВМРО-ДПМНЕ во Центар да обезбедите уште еден глас за ВМРО-ДПМНЕ.
ИМ: Ок. Ок, сега, ај чао.

 

Разговор помеѓу Миле Јанакиески и Никола Груевски

МЈ: Ало
НГ: Миле, како е?
МЈ: Капиштец има две избирачки места, водиме. Вака сега, на 23 избирачки места обработени.
НГ: Да.
МЈ: А, необработени 43, водиме за 140. Мешано. Значи, само тие кај што… По мое, ќе биде плус минус 600 гласа и можно е да има втор круг оти во просек, општина Центар имала неважечки ливчиња, околу 1.000-1.500…
НГ: Аха, аха. Значи, да ни беа овие преспанциве, ќе завршевме работа?
МЈ: Да.
НГ: Е да. Ок Миле, ајде. Јавувај ти од време на време, каков е резултатот.
МЈ: Важи, важи.
НГ: Ајде.

 

Разговор помеѓу Миле Јанакиевски и Никола Груевски

НГ: Да
МЈ: 51 избирачко место обработено.. губиме за 580 разлика
НГ: Што мислиш ќе има втор круг?
МЈ: Сега ги собирам претседателе неважечкиве. Има доста неважечки секогаш биле над илјада ако продолжиме ваков тренд мислам дека втор круг ќе одиме..
НГ: Е колку има доста? Колку е тоа доста?
МЈ: Меѓу 1.000-1.500 имало по избориве, а има сега во просек по 20 по 30 по избирачко место, така да треба да има околу 700 800 неважечки.. тука ќе биде бројката.
НГ: А колку ни требаат на нас за да има втор круг?
МЈ: Разликата што ќе биди помеѓу СДСМ и ВМРО треба да биди пониска од неважечките
НГ: Ама еве го слушам Сашо он некоја процека праи дека над 1.000 ќе не тепаат у Центар.. могуче ли е тоа?
МЈ: Водно ги изброиле Коце (ама со премиерот зборам), Коце во двете има победено во Водно а тие се големи, 140 таму Коце победил..
НГ: А нашиов овој?
МЈ: Епа сеа го бројат Тодорович, прво Коце го зеле,Советот за Град Скопје и Коце..
НГ: Ама не е истото, не е истото
МЈ: Знам
НГ: Да
МЈ: Тукаа ќе биде, 100 плус минус…
НГ: Знае бе Миле тоа, да пуштиш таму на нашиве што поише неважечки да праат…. ало
МЈ: Да да ве слушам..
НГ: Викам да си пуштел, Сашо вика абер до нашиве таму кај шо може да искрснат неважечки да …
МЈ: Кажано му е, кажано му е, од сабајле му е кажано…
НГ: И записници тие работи за после да може да..
МЈ: Да да има забелешки..
НГ: Да се судиме…
МЈ: Да
НГ: Ајде

 

Разговор помеѓу Никола Груевски и Миле Јанакиески

МЈ: Молам.
НГ: Миле, ќе поднесуваме ли приговори?
МЈ: Има сегде поднесено приговор.
НГ: Ама, има ли основани?
МЈ: Ова што СДС му ги земаше личниве карти, што му ги читаше имињата, надвор гужви што правеа.
НГ: Мхм.
МЈ: Што не е вака.
НГ: И Нано Ружин.
МЈ: Да. И Нано Ружин и Шекеринска дел го правеше тоа, стопираше…
НГ: Добро.
МЈ: Поднесени се. Се слушнав со сите, да поднесуваат. И Нино и јас, се слушнав…
НГ: Како?
МЈ: И Нино и јас, се слушнав, да поднесуваат.
НГ: Да, да. И ја му реков на Нино да поднесуваме, ако не за друго, барем да купиме денови, знаеш. За да си завршиме тука работи што имаме во Центар.
МЈ: Да, добро.
НГ: Тоа е сеа. Направивме сé што можевме.
МЈ: И малку повеќе од тоа.
НГ: Малку повеќе од тоа, да. Убаво кажа.
МЈ: Треба да седниме и да сумираме, тоа е сеа.
НГ: Владо више свесен е дека губи?
МЈ: Во војна има и губитници и победници. А?
НГ: А?
МЈ: Тоа е во војна, некој мора да изгуби, некој да победи, тоа е.
НГ: Владо свесен е дека губи?
МЈ: Па сега се спремаше изјава да даде дека изгуби, ја му реков да не дава изјава, му викам, чекај, од кај знаеш, спремен си е човекот.
НГ: Нема потреба, никој од СДС не даде изјава. Кој дава дека изгубил? Будала. Кажи, еве ти си од СДС, искочи . Утре ќе дадеш, задутре, чекај.
МЈ: Му реков да не даде. Ок
НГ: Стегнете го таму, да не направи таква глупост, оти тогаш…… не ни држи збор.
МЈ: Да, да, му реков, му реков.
НГ: Ок.
МЈ: Ајде, чао.
НГ: Ајде.

 

Разговор помеѓу Гордана Јанкулоска и соговорник

С: Ало
ГЈ: Ристе…
С: Да
ГЈ: Абе со твојов Центар никако да завршиме
С: Сеа со Влатко зборам му вика шо и приговори, Влатко вика ….
ГЈ: Па еве сеа и он ми кажува шо се глупираме
С: Стварно глупости е тоа
ГЈ: Море ја за друго те барам. Имале закажано општина Центар сабајле некои вонгабаритни споменици да местат…
С :Да 20
ГЈ : E и сеа тоа можда ќе беше нормална работа да победевме ама ние не победивме…да му свртиш на Зоран Марковски да се мобилизирани и малку повеќе да има на работа полицајци оти можеби комуњариве да искочат, тоа сабајле ќе биде они ќе спијат ама знаеш како не знаеш шо ќе се деси, да не се бркаме сабајле у 6 уште од вечерва јави му на Зоран Марковски
С: Сеа ќе му се јавам
ГЈ: Ја не ти го знам тој ти е твој вака кадар, иначе ја ќе му свртев…те фати таксират со него.
С: Ќе го барам нема проблем
ГЈ: Барај го па легни си, да…
С: ќе ги внесат сабајле се, сеа баш со Мацко зборуваше дојди вика и да му пуштам човек да му бриши све од хард диск све од компјутер, да чисти се..
ГЈ: Ле ле ле.. нема шо може ќе помагаме сеа тоа е…
С: Тоа е, Маријан е добар човек…
ГЈ: Не бе Маријан е супер
С: Ја викам светлата точка во таа општина
ГЈ: Да си го зееме кај нас Мацко
С: Да да стварно е многу добар Мацко
ГЈ: Не знам он што е по професија
С: Он требаше… ја го прашував сеа кај ќе идеш вика у мирување ми е местото во труд и социјала, таму нели државен советник е…
ГЈ: Таму не му е лошо
С: Не не не е на лошо место тамам работа
ГЈ: Ако не му се свиѓа таму кај нас да го земеме
С: Ќе му кажам, сеа ќе му ѕвонам..
ГЈ: Добро Ристе ај види со ова па белким завршуваме со Центар
С: Толку е сеа… за 4 години… си размислувам сеа со бабана Ларва сегде победивме 2005…
ГЈ: Да бе да, ама тоа е…

 

Разговор помеѓу Миле Јанакиески и Сашо Мијалков

МЈ: Е Саше.
СМ: А бе Миле, се слушаме ли?
МЈ: Да, да. Се губи нешто. Кажи.
СМ: Сеа ме слушаш?
МЈ: Да, да.
СМ: Што?
МЈ: Ало?
СМ: Ме слушаш ли?
МЈ: Да, да, да, да. Кажи.
СМ: Ова сеа што ми го прати, што е? Готово решение?
МЈ: Да, да, решение, само да уплати тоа. Мислам, може ние да му платиме, ама мора отојн да се потпиши, и да му издадеме денеска согласнот.
СМ: Што да му дадете денеска?
МЈ: Согласност дека му е легализирана куќата. Оти, два чекори се. Прво му се издава урбанистичка согласност…
СМ: Значи, што има кај мене сеа денеска? Кој документ го има кај мене?
МЈ: Урбанистичка согласност и пресметка колку пари треба да плати за легализацијата.
СМ: Аха.
МЈ: Тоа кога ќе го плати, врз база на уплатата му се издава решение, односно, објектот дека му е…
СМ: Ок, шо да му речам? Да му речам, тоа ти е од нас.
МЈ: Да.
СМ: И така, за добредојде.
МЈ: Да. И кажи му ние дека ќе му платиме.
СМ: Тоа е ти е од нас, немаш обврска, па сеа ти види, а?
МЈ: Да. И не мора тој да го упалти, оти, околу 200 и нешто илјади се, ние да му платиме, така договори, ама мора да го потпиши налогот, формално правно.
СМ: Колку илјади се?
МЈ: 200 и нешто, 230.
СМ: Е па, како ние ќе му платиме 200 илјади?
МЈ: Не, ама, ако прифати.
СМ: А?
МЈ: Ако прифати.
СМ: Чекај сега, не те разбирам. Шо да му речам ја на него? Ја да му речам, ова ти е готово, прифаќај?
МЈ: Ти му викаш, еве ти го, те частиме легализација на куќата, да си го уплати. Можеш дополнително да му кажеш дека можеме и да му средиме, да му платиме. Тоа е.
СМ: Аха.
МЈ: Ти кај си, на работа си? Ало? Ало?
СМ: Ме слушаш ли?
МЈ: Се губи нешто. Сега ме слушаш?
МЈ: Да, да, кажи.
СМ: Не сум тука, викам, у Грчка, у Грчка дојдов ја.
МЈ: Аааааа. Кога се враќаш?
СМ: Утре најкасно.
МЈ: Е па, сеа не знам како да направиме. Некој да му го даде тоа на рака.
СМ: Јас ќе му кажам на него вака. Кај мене ти е во канцеларија, утре се гледаме ја и ти.
МЈ: Е, така и готово. Ајде.
СМ: Ама, чекај сеа, како сеа. Он шо ако рече, јас не сум спремен да ја прифатам работата, што треба да му кажам тогаш…..или што?
МЈ: Па не знам колку сурови да бидеме, шо да ти кажам.
СМ: Малце е незгодно тоа. У овој случај ако му викаме готово ти е, треба да му кажеме, тоа ти е од нас, те частиме.
МЈ: Ќе го играме после тој и понатаму, јас така мислам, а? Еднаш преминал…
СМ: Мислам така е пофраерски, него да му кажеме, слушај, еве, ако не, ништо. Разбираш?
МЈ: Да.
СМ: Тоа е уценувачки, тоа е лошо.
МЈ: Се согласувам.
СМ: А?
МЈ: Се согласувам.
СМ: Тоа ти е од нас, а ти сеа види.
МЈ: Да, е така.
СМ: За добредојде, а?
МЈ: Да, е така.
СМ: А?
МЈ: Така, така.
СМ: Па, ако нејќеш и не мораш. Еве ти, од нас ти е тоа.
МЈ: Да сме живи и здрави.
СМ: А?
МЈ: Види, му решаваме животно прашање, така да, нема да му биде едноставно.
СМ: Да, да, ок. Ајде
МЈ: Ајде чао.

 

Разговор помеѓу Драган Павловиќ Латас и Сашо Мијалков

ДПЛ: Повели началниче…
СМ: Началниче бе што праиш…
ДПЛ: Еве ништо читам како се вика по интернет нешто…
СМ: А…
ДПЛ: По интернет читам…
СМ: Да што пишуе…
ДПЛ: 45ка сме барале у Центар 20 у Струга прегласување…
СМ: Што 45?
ДПЛ: Као се вика.. приговори
СМ: Мм у Центар 45?
ДПЛ: Така пишуе…
СМ: Не, тоа не знаеме утре ќе знаеме колку ќе фати, имаме основ за сите 46 ама…ама ќе видиме
ДПЛ: Нешо треба да напраиме време е да добиеме малце и да покажеме…
СМ: Ти што мислиш кажи ми…
ДПЛ: Мислам дека треба да даеме…
СМ: Така? Треба да прегласуваме па што биде биде… па и да изгубиме што…
ДПЛ: Па така.. прво 15 дена луѓено да се приберат у општина да се довршат некои работи таму да се потпише записници маписници ти глеаш ќе го фати неспремно по споменици по чуда…
СМ: Аа?
ДПЛ: За 15 дена ќе ги намалиш ќе ги туриш споменициве ќе потпишеш прием ќе ова ќе она, ќе го намалиш ризикот да искача по телевизии да лупа глупости…
СМ: Така бе..
ДПЛ: А можда може и нешто и да се напраи никад не се знае..
СМ: Никад не се знае бе…
ДПЛ: Така бе. А ќе го стаиме ние у машина, полека…
СМ: А?
ДПЛ: Ќе го стаиме у машина бе полека
СМ: Овој?
ДПЛ: Да да да
СМ: Ја мислам да…
ДПЛ: И ја мислам…
СМ: …Советот
ДПЛ: Па види некој и ќе претрча од Советот полека…
СМ: А?
ДПЛ: Ќе претрча некој ја не знам како им е нив составот дали се сите од СДСМ или има и од другиве партии нивни…А? Си го видел ти Советот?
СМ: Има и од тие мислам…Коле нос е таму…
ДПЛ Коле нос? Од која партија е Коле нос бе?
СМ: Па не знам, тој беше…од либерална или од ЛДП
ДПЛ: Либерална сами искочија…
СМ: Од кај Тито.. од ЛДП од ЛДП е.
ДПЛ: Така може така може
СМ: ДА..После таму ти е на Тито една секретарка
ДПЛ: Абе еден ќе најдеме има време полека…
СМ: Не бе има 3-4
ДПЛ: Иии дај Боже, немој не ме радуј хахаххаха
СМ: 4 шо се на трансфер па сека ќе видиме колку ќе упалат…
ДПЛ: Па два бе, упалат ти е доста…
СМ: А?
ДПЛ: Па два да упалат ти е доста
СМ: Па и еден да упали е доста бе…Советот да го напраиме ние и ондак го п…
ДПЛ: Па да бе така…Да да да, без Совет ништо не моеш да напраиш…

 

 


Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy) и Балканскиот фонд за демократија (BTD – The Balkan Trust for Democracy), иницијатива која поддржува демократија, добро владеење и евро-атлантски интеграции во Југо-источна Европа. Содржината на рецензијата е одговорност на авторот и не ги одразува ставовите на Метаморфозис, NED или BTD.

Напишете коментар

Вашата адреса за е-пошта нема да биде објавена. Задолжителните полиња се означени со *