Шилегов го промовираше проектот „Дрво за секое дете“
ВЕТУВАЊЕ: На скопјани ќе им овозможиме да си засадат дрво за секое новородено дете. Секој граѓанин на Скопје да има сопствено дрво на иднината, што ќе го негува.
[Предизборен митинг на СДСМ во Скопје, 08.10.2017 година]
ОБРАЗЛОЖЕНИЕ:
Ветувањето дека на скопјани ќе им биде овозможено да си засадат дрво за секое новородено дете, е исполнето ветување на градоначалникот на Град Скопје, Петре Шилегов, кое тој го даде за време на предизборната кампања за локалните избори кои се одржаа на 15.10.2017 година.
Проектот „Дрво за секое новородено дете“, Шилегов го промовираше на централниот предизборен митинг на СДСМ кој се одржа во Скопје на 08.10.2017 година.
Овде сакам да ја промовирам најновата мерка, која што свесно не ја запишав во програмата. На скопјани ќе им овозможиме да си засадат дрво за секое новородено дете. Секој скопјанин, секој граѓанин на Скопје да има сопствено дрво на иднината, кое што ќе го негува. Тој што не може да го разбере дрвото, тој не може да ја разбере иднината. Овде се нашите корени, овде е нашето стебло, овде е нашата крошна, нашата убавина, пред која што јас стојам вечерва, рече меѓудругото Шилегов во своето обраќање пред граѓаните.
На 02.04.2018 година, како што јавија дел од медиумите, Шилегов најави дека почнува проектот „Дрво за секое дете“. За таа цел, градоначалникот на град Скопје и претставници на гинеколошките клиники од Скопје потпишаа меморандум за соработка за реализација на овој проект.
Како што ветив во предизборната кампања пред неколку месеци, ja почнуваме реализацијатa на проектот „Дрво за секое дете“. Заедно со ЈП „Паркови и зеленило“ и гинеколошко-акушерските болници, преку овој проект им овозможуваме на нашите сограѓани да засадат дрво во чест на раѓањето на нивното бебе на некој од градските дрвореди, паркови или скверови. На дрвото ќе има плочка каде што ќе го пишува името на детето и датумот на раѓање. Во текот на годините секој што засадил дрво ќе може да го следи неговиот раст заедно со растот на детето, истакна Шилегов, пренесе Макфакс.
Како што појасни градскиот татко, дрвото на новороденчињата ќе биде посадено во сезонска акција на расположива локација по избор на родителите. По напуштање на гинеколошката клиника, родителите ќе треба да го пријават добиениот код на 071/395-395, каде што потоа ќе ги добијат дополнителните информации за овој проект.
Имајќи го предвид сето ова, може да се заклучи дека ветувањето на градоначалникот на Скопје, Петре Шилегов, дека на скопјани ќе им биде овозможено да си засадат дрво за секое новородено дете, е исполнето.
ИЗВОРИ:
- Либертас (08.10.2017) – ЛИ2017/ (ВИДЕО) Шилегов: Го ослободуваме Скопје, секое дете ќе има свое дрво на иднината, ќе живееме во модерен град [Пристапено на 05.04.2018]
- Предизборна програма на Петре Шилегов за локалните избори 2017-2020 – „Живот во Скопје! За сите!“ [Пристапено на 05.04.2018]
- Макфакс (02.04.2018) – Шилегов: Почнува проектот „Дрво за секое дете“ [Пристапено на 05.04.2018]
- Тајм.мк (02.04.2018) – Шилегов: Почнува проектот „Дрво за секое дете“ [Пристапено на 05.04.2018]
Оцени: Ана Анастасовска
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар