Штип доби Мултимедијален центар

vmro-dpmne-logo

Проект: Изградба на мултимедијален центар

За да им излеземе в пресрет на потребите на младите од општината со цел забава, дружење и уметничко творештво, во Општина Штип ќе направиме напори да обезбедиме средства од донатори и да изградиме мултимедијален центар во кој просторот ќе го уредиме со содржини погодни за забава и за креативно развивање на младите. (Извори на финансирање: Донации; Рок: 2014-2017 година)

 

 

ОБРАЗЛОЖЕНИЕ

На 28-та страница од Изборната програма со која настапи пред граѓаните на Штип на локалните избори во 2013 година, Илчо Захариев вети и изградба на Мултимедијален центар во градот. Според тоа што го утврдивме истражувајќи, ова ветување на сегашниот штипски градоначалник е исполнето.

Иако рокот даден во изборната програма е 2017 година, првата потврда дека Мултимедијалниот центар во населбата Суитлак, на местото на поранешното летно кино, е изграден е од средината на декември минатата година.

Општина Штип доби нов Мултимедијален центар, а бугарската општина Гоце Делчев реконструирано Народно читалиште преку Програмата за меѓугранична соработка Македонија-Бугарија, која е финансирана од Фондовите на ЕУ, истакна на денешната завршна прес-конференција градоначалникот на Штип, Илчо Захариев.

Изградбата на Мултимедијалниот центар е наведен како реализиран проект и во отчетот на Захариев за периодот 2013 – 2015, на стр. 276.

Од информацијата објавена на веб-сајтот на општина Штип на 20 јануари годинава дознаваме дека изградбата е почната во 2014 година а најголем дел од финансирањето е од „Вмрежување на мултимедијални центри во прекуграничниот регион-Креатива“ кој е финансиран преку ИПА програмата за прекугранична соработка на ЕУ, кој ги покрива Мултимедијалниот центар на Суитлак во Штип и Народно читалиште во с. Брезница, општина Гоце Делчев, Бугарија. На општина Штип од вкупната сума од ЕУ од 448.000 евра и биле доделени 300.000 евра.

Дека објектот е готов и пуштен во функција читаме и во статија од 16 февруари годинава. Тука дознаваме дека Општината Штип учествувала во изградбата со 186.000 евра свои пари.

Центарот е веќе во функција, а има конференциска и сала за кино и театарски проекции, салони за изложби и слично. Во новата зграда свои канцеларии имаат Кластерот за креативна индустрија, што беше обврска со меѓународниот договор, фестивалот “Макфест” и слични служби на Општината Штип.

Како реализиран проект, Мултимедијалниот центар во Штип е споменат и во телевизиски прилог од 3 јуни година, во кој слушаме дека Општината учествувала со 185.000 евра, дека центарот има кино сала и две простории за состаноци и работилници.

Имајќи ја предвид оваа проверка, може да се констатира  дека ветувањето на Илчо Захариев за Мултимедијален центар во Штип, е исполнето.

 

ИЗВОРИ

 

Оценето од: Сашо Спасоски

 


Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy) и Балканскиот фонд за демократија (BTD – The Balkan Trust for Democracy), иницијатива која поддржува демократија, добро владеење и евро-атлантски интеграции во Југо-источна Европа. Содржината на рецензијата е одговорност на авторот и не ги одразува ставовите на Метаморфозис, NED или BTD.

Напишете коментар

Вашата адреса за е-пошта нема да биде објавена. Задолжителните полиња се означени со *