Вистиномер на конференцијата POINT во Сараево
Конференцијата POINT (Политичка одговорност и нови технологии) е регионална конференција на организациите на граѓанското општество од 7 земји од Југоисточна Европа кои интензивно се ангажираат во користењето нови технологии во нивната работа.
Сајтот Вистиномер, ќе биде претставен на конференцијата на 16 февруари, во сесијата за претставување на вакви проекти од Балканот.
Конференцијата ја организира Граѓанското здружение Зошто не (Zašto ne) од Босна и Херцеговина во соработка со CRTA од Србија и Метаморфозис од Македонија. Во организацискиот комитет на конференцијата се и Мјафт од Албанија, CDT, CEMI и MANS од Црна Гора, CCI и 6yka од Босна и Херцеговина, FLOSSK од Косово и центарот CERP од Хрватска.
POINT ќе има пет главни теми кои ќе бидат во фокусот на конференцијата во контекст на употребата на новите технологии: следење на работата на владата и застапување од страна на владата, отвореност на владините и јавните записи, избори и изборен процес, образование, информации и обука, како и мобилизација и организација.
Во текот на трите дена на конференцијата ќе се одржат серија предавања, говори, мултимедијални презентации, трибини, работилници, конференции преку Скајп, филмски проекции, а сето тоа со учество на локални, регионални и глобални активисти на граѓанското општество, медиумски експерти, претставници на медиуми, експерти за нови технологии, програмери, блогери, па дури и претставници на институциите и деловниот сектор. На конференцијата, на еден динамичен начин и со помош на новите технологии и визуелни алатки, како и со активно учество на учесниците на конференцијата и интернет-корисниците ќе се дебатира за избраните прашања, ќе се дефинираат основните проблеми во овие области и ќе се презентираат конкретни примери и искуства користени од граѓанското општество, како и стратегии за делување во овие области.
POINT ќе претставува платформа за граѓанското општество во употребата на нови технологии – има за цел да биде алатка за едукација околу употребата на новите технологии и друштвените мрежи; форум за размена на мислења и искуства; инкубатор за развој на идеи, проекти и стратегии; виртуелен простор за вмрежување и информирање на сите општествено-свесни интернет корисници; и друштвена мрежа за истражување и потрага по партнери и соработници и градење коалиции.
POINT има 4 сегменти:
@POINT во живо – конференција во Арт-киното „Kriterion“ во Сараево – презентации, предавања, мултимедијални содржини, панели, разговори преку Скајп, филмови и дискусии. Три дена конференциска работа со над 50 говорници, презентери и панелисти од БиХ, од регионот, Европа и светот.
@POINT сподели – стратешки состаноци на граѓанските организации во контекст на употребата на нови технологии за различни цели, иницијативи и проекти, како што се корупцијата, интеграцијата во ЕУ, изборите, институциите за надзор, образованието итн.
@POINT преку интернет – освен за учесниците на конференцијата, истата ќе биде отворена и за заедницата на интернет. Сите сесии ќе се емитуваат во живо на веб-сајтот на конференцијата, корисниците ќе можат да ги испраќаат своите прашања преку друштвените мрежи, па дури и да поставуваат прашања за време на презентацијата, да коментираат за сесиите и презентерите и да учествуваат во дискусиите на интернет. Сите презентации, програмата на конференцијата и сите важни врски ќе бидат поставени на веб-локацијата на конференцијата.
@POINT забава – вечерната програма ќе претставува одмор од дневните активности и активизам и ќе понуди нови, свежи таленти од музичката сцена. Вечерната забава исто така ќе се одржи во Арт-киното „Kriterion“ и ќе понуди содржини за сите три ноќи на конференцијата.
Извор: Веб-локација на конференцијата POINT
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
