За една година реконструирани 3.600 метри од водоводната мрежа во Виница

Фото: opstinavinica.gov.mk

 

Комплетна реконструкција на водоводната мрежа, замена на старите азбестни цевки со нови полиетиленски.

[Извор: Изборна програма на Ивица Димитров за локалните избори 2017-2021 – „Живот во Виница за сите“ (стр.18) , датум: октомври 2017]

 

ОБРАЗЛОЖЕНИЕ:

Градоначалникот на Општина Виница, Ивица Димитров за локалните избори (октомври 2017 г.),  вети реконструкција на водоводната мрежа, замена на старите азбестни цевки со нови полиетиленски. Споменатото  ветување е дел од  предизборната програма на Димитров „Живот во Виница за сите“ , дадено во рамките на еден поширок проект за подобрување на водоснабдувањето на Виница (стр18), со рок на исполнување две години (2108 -2020) и неговата реализација е во тек.

На почетокот на февруари оваа година (2018) медиумите информираа дека започнува втората фаза од реконструцијата на водоводната мрежа и замена на постојните азбестни цевки со нови полиетиленски. Тогаш беше пренесена и изјава на градоначалникот Димитров во која тој вели:

Во 2018 стартуваме со еден од покрупните проекти, со реконструкција на водоводната мрежа во градот Виница. Предвидената должина за замена на азбестните цевки е 3960 метри, а е финансиран од Европската инвестициона Банка, Министерството за транспорт и врски и општина Виница. Овој проект ќе почне да се одвива уште овој месец, се очекува изборот на надзорот. Како најдобар изведувач е избрана фирмата „Коп-инженеринг“, а вредноста на проектот е 6,5 милиони денари . (Димитров)

Да напоменеме дека со првата етапа од овој проект, пред речиси пет години во Виница се променети водоводни цевки со должина од 4.367 метри.

На  07.11.2018 година градоначалникот Димитров презентирајќи го отчетот за работењето на локалната самоуправа во изминатиот едногодишен период, меѓу другото ги изнесе и следните податоци

Во изминатава година извршивме целосна промена на водоводните азбестни цевки со полиетиленски на 12 улици со вкупна должина од 3698 метри. Во овој проект вложивме околу 6, 5 милиони денари. Со помош на Министерството за транспорт и врски кое вложи 14 милиони денари, го подобривме квалитетот на јавната водоводна мрежа во Виница, а во иднина планирано е проширување на филтер станицата во градот на која треба да се приклучат сите 180 водомери од с.Лески на градскиот водовод. (Димитров)

Деновиве   „Вистиномер“, се обрати во Општина Виница и побара појаснување за тоа дали е завршен целиот процес на реконструкција на водоводната мрежа, односно дали е  направена промена на азбестните цевки со полиетиленски на  вкупната водоводна мрежа во Виница. Од кабинетот на градоначалникот Димитров ни одговорија дека:

Во текот на 2018 година е реконструирана водоводна мрежа во должина од 3.600 метри должни, а за реконструкција остануваат околу 3.800 метри должни, за кои е планирано да се завршат во 2019 и 2020 година

Имајќи ги предвид горенаведените информации објавени во медиумите и на веб-страницата на Општина Виница, како и одговорот од кабинетот на градоначалникот Димитров, ова изборно ветување според методологијата на „Вистиномер“  добива оценка „во тек“.

 

ИЗВОРИ:

Оцени: Оливера Војновска

 


Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy) и Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States), иницијатива која поддржува демократија, добро владеење и евро-атлантски интеграции во Југо-источна Европа. Содржината на рецензијата е одговорност на авторот и не ги одразува ставовите на Метаморфозис, National Endowment for Democracy, The Balkan Trust for Democracy, проект на Германскиот Маршалов фонд на САД, или нивните партнери.