Алуминиумот во вакцините не го запира развојот на мозокот и не предизвикува Даунов синдром, аутизам, дијабетес

Врз основа на деталните научни и епидемиолошки докази, можеме да заклучиме оти тврдењето изнесено во објавата, дека вакцините содржат алуминиум во количини кои го запираат развојот на мозокот и предизвикуваат аутизам, дијабетес или Даунов синдром, е неточно. Објавата манипулативно ја користи одлуката на американската администрација за менување на календарот на имунизација за да протне неосновани антивакцинални митови и теории на заговор

 

Анализираме објава на Фејсбук која вели:

Трамп ги намали бројот на вакцини.

Сега има само 11, на препорака…

Македонски доктори и Балканот: до кога ќе го рушите имунитетот и интелигенцијата на нашите деца со вакцини?

Аутизам,шеќер,даунов синдром итн

Вашите деца не ги вакцинирате , нели ? Знаете дека вакцините се отровни ,имаат алуминиум внатре кој го сопира развојот на неврони во мозокот.

Удри по децата на народот ,да земам платичка иначе ќе ме избркаат. Ќе бидете судени ,ако не тука ..од Бог .Таму кантарот нема кој да го мрдне.

Нема борба. Сакате, некете ..вакцините одат во историјата. Лека полека.

Доаѓа паметниот човек на сцената.

Силни промени , бранот доаѓа од САД .

Ќе ми биде драго една докторка да го поднесе предлог законот за тотално укинување на вакцините и сите казни .

Тврдењето дека вакцините содржат алуминиум кој „го сопира развојот на неврони во мозокот“ и предизвикува аутизам, шеќерна болест или Даунов синдром е целосно неточно, научно неодржливо и претставува опасна медицинска дезинформација. Иако објавата користи вистинска политичка вест од САД за да добие на кредибилитет, медицинските тврдења во неа се класични антиваксерски митови.

Точно е дека претседателот на САД, Доналд Трамп, на 10 август 2026 година потпиша уредба насловена како „Gold Standard Childhood Vaccine Recommendations“, со која се предлага препорачаниот федерален календар за детска имунизација да се намали на 11 основни вакцини, како што пренесуваат светските медиуми како Reuters и BBC.

Сепак, оваа одлука не значи тотално укинување на вакцините, туку е политичка насока која веднаш наиде на остри критики од Светската здравствена организација (СЗО) и медицинските здруженија, бидејќи го зголемува ризикот од епидемии. Објавата манипулативно ја користи оваа вест за да протне лажни медицински теории.

Одредени вакцини користат алуминиумски соли како адјуванти (засилувачи). Нивната улога е да го стимулираат имунолошкиот одговор на организмот, со што се овозможува вакцината да биде поефикасна со помала количина на антигени и во помалку дози, појаснуваат од American Academy of Pediatrics (AAP).

Количината на алуминиум во една доза вакцина е екстремно мала (помалку од 1 милиграм). Бебињата во првите неколку месеци од животот внесуваат повеќе алуминиум преку мајчиното млеко или вештачката формула, отколку преку сите примени вакцини заедно.

Алуминиумот од вакцините влегува во мускулното ткиво и постепено, во безбедни количини, се испушта во крвотокот, по што бубрезите комплетно го излачуваат преку урината. Тој не ја преминува крвно-мозочната бариера во количини кои би можеле да го запрат развојот на невроните.

Голема и опсежна студија спроведена во Данска, која анализираше податоци на 1,2 милиони деца во период од 24 години, детално објавена од GAVI (Global Alliance for Vaccines) и CIDRAP, дефинитивно потврди дека изложеноста на алуминиум преку вакцините не е поврзана со невроразвојни нарушувања, астма или други хронични болести.

 

Врската со аутизам, дијабетес и Даунов синдром е медицински невозможна

Даунов синдром е генетско нарушување предизвикано од појава на трета копија на 21-от хромозом (трисомија 21). Оваа хромозомска промена се случува уште при самото зачнување на фетусот во утробата на мајката. Вакцините се примаат месеци и години по раѓањето, што значи дека е биолошки и медицински невозможно вакцина да предизвика Даунов синдром.

Тврдењето дека вакцините предизвикуваат аутизам потекнува од лажираната студија на Ендру Вејкфилд од 1998 година, која одамна е повлечена и отфрлена. Официјалните податоци од CDC (Центарот за контрола и превенција на болести на САД) јасно укажуваат дека не постои никаква поврзаност помеѓу состојбите од аутистичниот спектар и вакцините или нивните состојки.

Ниту една релевантна медицинска студија досега нема докажано дека детските вакцини го оштетуваат панкреасот или предизвикуваат автоимун дијабетес тип 1. Една од најпознатите и најцитираните медицински студии за оваа тема, објавена во престижното списание New England Journal of Medicine, ги анализираше медицинските досиеја на сите деца родени во Данска помеѓу 1990 и 2000 година. Студијата (достапна и на PubMed) опфати над 580.000 деца и дефинитивно заклучи дека нема апсолутно никаква разлика во стапката на појава на дијабетес тип 1 помеѓу вакцинираните и комплетно невакцинираните деца. Студијата ги тестираше вакцините против Pertussis, MMR, Hib, Polio, Дифтерија и Тетанус.

Врз основа на деталните научни и епидемиолошки докази, можеме да заклучиме дека тврдењето изнесено во објавата, дека вакцините содржат алуминиум во количини кои го запираат развојот на мозокот и предизвикуваат аутизам, дијабетес или Даунов синдром, е неточно. Објавата манипулативно ја користи одлуката на американската администрација за менување на календарот на имунизација за да протне неосновани антивакцинални митови и теории на заговор.

Поради тоа, оваа објава ја оценуваме како невистина којашто директно го загрозува јавното здравје и ги доведува граѓаните во заблуда.

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар