Дали приливот на украински бегалци во Европа предизвика бран на криминал

Ги обработивме официјалните статистички податоци и го пресметавме бројот на осомничени на 100.000 жители: меѓу државјаните на земјата, странците во целина и украинските државјани. Во Полска, Чешка и Германија, земјите што примија најголем број украински бегалци, статистиката покажува дека нивното учество во криминалот во некои случаи е малку повисоко, а во други малку пониско од она кај локалното население, покажува анализата на Белорускиот истражувачки центар 

 

Ги проверивме статистиките и полициските извештаи.

Приливот на бегалци од Украина, медиумски експонираните кривични дела и прекршоците во кои се вклучени украински државјани, често предизвикуваат негативни реакции кон новодојденците во европските земји. Ова ги засилува стравувањата дека зголемената миграција ќе доведе до пораст на криминалот. Ваквите заклучоци најчесто се темелат врз селективно избрани статистички податоци, изјави на политичари или дискусии за сензационални инциденти во кои учествувале украински државјани. Во исто време, се изнесуваат и спротивни ставови: Украинците често се опишуваат како мигранти кои повеќе ги почитуваат законите од другите доселенички групи. За да ги провериме двете хипотези без пристрасност, ги анализиравме најновите податоци на Евростат за 2023 година, статистиките на националните институции и полициските извештаи.

Што покажуваат фактите и бројките

Во секоја земја има луѓе што вршат кривични дела, па не е разумно да се очекува која било група целосно да биде без криминал. Поважно е да се утврди како стапката на криминал кај украинските бегалци се споредува со онаа кај граѓаните на земјите домаќини.

Ги обработивме официјалните статистички податоци и го пресметавме бројот на осомничени на 100.000 жители: меѓу државјаните на земјата, странците во целина и украинските државјани. Ова ни овозможи да ги споредиме стапките на криминал кај секоја од овие групи.

Во Полска, Чешка и Германија, земјите што примија најголем број украински бегалци, статистиката покажува дека нивното учество во криминалот во некои случаи е малку повисоко, а во други малку пониско од она кај локалното население.

Германија

Според податоците на Сојузното министерство за внатрешни работи на Германија за 2024 година, украинските државјани извршуваат помалку кривични дела од просекот за странците. Во статистиките почесто се појавуваат осомничени од Сирија, Турција и Романија. На прво место се Сиријците, кои сочинуваат околу 5% од сите осомничени (без оглед на државјанството), додека Украинците учествуваат со околу 2,5%.

Ова делумно се објаснува со фактот што меѓу украинските бегалци има повеќе жени и деца, додека мигрантите од други региони претежно се мажи, група која статистички почесто е поврзана со извршување кривични дела.

Во исто време, стапката на криминал меѓу Украинците е повисока отколку кај германските државјани. На секои 100.000 носители на украински пасош има повеќе од 4.000 лица осомничени за прекршување на законот, во споредба со помалку од 2.000 меѓу германските државјани.

Република Чешка

Во Чешка, Украинците се сметаат за една од групите што најмногу ги почитуваат законите.

Иако сочинуваат околу 5% од населението на земјата, тие учествуваат со само 3% од вкупниот број осомничени лица.

Во апсолутни бројки, Украинците навистина се најбројни меѓу странските сторители на прекршоци и кривични дела, но тоа се должи на нивниот голем број во населението. Кога бројот на украински државјани се споредува со бројот на прекршоците, има околу 450 осомничени на 100.000 жители.

За споредба, кај сите странци оваа бројка е приближно двојно повисока, а кај чешките државјани е околу 1,5 пати повисока.

Ова покажува дека Украинците го прекршуваат законот дури и поретко од самите Чеси.

Полска

Од околу 1,5 милиони Украинци кои официјално живеат во Полска, помалку од 10.000 имале проблеми со полицијата во 2023 година, односно помалку од 1%.

За споредба, кај грузиските државјани оваа бројка изнесува околу 10%.

Уделот на сторители на прекршоци и кривични дела меѓу Украинците е понизок отколку меѓу Полјаците, а значително понизок и од просекот за сите странски државјани.

Според полициските податоци за 2023 година, најчест прекршок меѓу мигрантите е управување возило под дејство на алкохол.

Заклучок

Во сите три земји, стапката на криминал меѓу Украинците е пониска од просекот за странските државјани.
Во Чешка и Полска, Украинците го прекршуваат законот поретко од локалното население.

Во Германија, оваа стапка е повисока отколку кај германските државјани.

Извор: Has the influx of Ukrainian refugees to Europe sparked a crime wave

 

Овој напис е изработен во 2026 година за проектот Prebunking at Scale, со поддршка од Европската мрежа за стандарди во проверката на факти (European Fact-Checking Standards Network).

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар