Дезинформации за ХААРП, „кемтрејлс“ и наводно незагадени земји во Европа

Тврдењето дека загадувањето во Македонија и регионот е резултат на HAARP и „кемтрејлс“, додека Италија е „чиста земја без такви системи“, е дезинформација без научна основа. Податоците од релевантни научни институции покажуваат дека HAARP е научен истражувачки проект без врска со загадување, „кемтрејлс“ не постојат како реална програма, загадувањето има јасни, мерливи извори и сите земји имаат различни нивоа на аерозагадување

 

Анализираме објава на социјалната мрежа Фејсбук која вели:

Сега ќе направиме споредба со земја каде нема Харп нема кемтрејли и нема горење отпад, да видите што значи затруена земја Македонија и што значи да се дише нормален чист воздух и никој да не умира. Следните избори ако излезете да гласате ќе знаеме дека од вас не бидува народ. Сликите се од Битола Струмица Скопје усје Саранда Хрватска Србија само последните две слики се од земји каде нема и НЕ СМЕЕ ДА ИМА ХАРП. Е сега вие видете како мурти и курти со сѐ дуи, ја имаат дадено земјава курбан. Онкологија одамна нема место.

Објавата споделува и фотографии од небо за кои како што тврди се направени во земјите спомнати во објавата.

Во објавата се тврди дека загадувањето во Македонија е резултат на „ХААРП“ и „кемтрејлс“, дека во други држави (Србија, Албанија, Хрватска) наводно исто постои ХААРП и загадување, а на „последните две слики“ за кои Вистиномер пронајде дека се од Италија – се тврди дека тоа е држава каде „нема ХААРП“ – има чист воздух и „луѓето не умираат“. Ова се користи како доказ за намерно труење и политичка манипулација.

Објавата комбинира повеќе научно неосновани и логички неточни тврдења: дека HAARP е систем за контрола на загадувањето или за контрола на климата, дека „кемтрејлс“ постојат како тајна програма, дека загадувањето зависи од постоење или непостоење на HAARP, дека одредени држави се „чисти“ или „загадени“ поради вакви програми и дека постојат земји каде „луѓето не умираат“.

HAARP (High-frequency Active Auroral Research Program) е научен истражувачки проект кој ја проучува јоносферата, односно горните слоеви на атмосферата.

Според Универзитетот на Алјаска, програмата служи за истражување на природни атмосферски процеси, а не за контрола на временски услови или загадување

Научните анализи и проверени фактички извори не пронаоѓаат докази дека HAARP може да влијае на локалното загадување на воздух или да произведува временски феномени на ниво какво што се тврди во ваквите наративи.

Тврдењето дека авиони намерно прскаат хемикалии („chemtrails“) е широко демантирано од научната заедница и институции како NASA, NOAA и EPA.

Белите траги зад авионите се кондензациски траги (contrails) создадени од водена пареа и мраз на високи надморски височини. Станува збор за природен физички процес поврзан со условите во атмосферата, а не за хемиско прскање. Истражувања и фактички проверки покажуваат дека не постои доказ за тајна глобална програма за „кемтрејлс“.

Објавата тврди и дека Србија, Албанија и Хрватска имаат HAARP и загадување, а дека Италија нема HAARP и затоа има чист воздух.

Ова е неточно по повеќе основи. HAARP не е глобален „мрежен систем“. HAARP е истражувачки објект лоциран во Алјаска и нема никаква оперативна улога во контрола на држави, загадување или клима.

Нема врска меѓу HAARP и квалитетот на воздухот. Загадувањето се мери преку: индустриски емисии, сообраќај, греење, географија и метеорологија.

Светската здравствена организација (СЗО) наведува дека аерозагадувањето е резултат на човечки активности и согорување на фосилни горива, а не на атмосферски „програми“.

Италија и Балканот имаат реално измерено загадување. Податоците од глобалните мониторинг системи покажуваат дека и Италија и земјите од Западен Балкан имаат периоди на високо загадување, зависно од регионот и сезоната.

IQAir глобалниот индекс за квалитет на воздух редовно прикажува варијации и во Италија и во државите од регионот. Тоа значи дека нема „чисти земји без загадување“, туку различни нивоа на ризик.

Објавата прави две клучни манипулации: лажна причинско-последична врска, односно го поврзува HAARP со загадувањето и климата, и селективно споредува фотографии од различни земји како доказ, без метеоролошки и временски контекст. Дополнително, тврдењето дека во „чисти земји луѓето не умираат“ е фактички неточно и биолошки невозможно.

Тврдењето дека загадувањето во Македонија и регионот е резултат на HAARP и „кемтрејлс“, додека Италија е „чиста земја без такви системи“, е дезинформација без научна основа.

Податоците од релевантни научни институции покажуваат дека HAARP е научен истражувачки проект без врска со загадување, „кемтрејлс“ не постојат како реална програма, загадувањето има јасни, мерливи извори и сите земји имаат различни нивоа на аерозагадување.

Затоа, објавата претставува комбинација од конспиративни тврдења и погрешно толкување на фотографии, без валидна научна основа и поради тоа истата ја оценуваме како невистина.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар