Дезинформација е дека тепачката во Центар Жупа била за вакцинални сертификати
Од СВР Охрид негираат дека физичката пресметка има врска со вакцините и вакциналните серитфикати или новите мерки на Владата. Оттаму велат дека се работи за тепачка меѓу припадници на две семејства поради нерасчистени односи
Од СВР Охрид негираат дека физичката пресметка има врска со вакцините и вакциналните серитфикати. Оттаму велат дека се работи за тепачка меѓу припадници на две семејства поради нерасчистени односи
Видео од тепачка, за која се тврди дека се случила во Дебар, од синоќа се споделува по социјалните мрежи Фејсбук и Твитер, а денеска е преземено од неколку портали. Корисник на Фејсбук без подетално објаснување, пишува:
Рестрикциите на Венко!
Видео превземено од Твитер.
Еве што се случува,додека тој си шета слободно !
Ова е во Дебар!
Овој пост во моментот на нашата рецензија има 485 споделувања, 7 коментари и 181 реакција.
Истата снимка денеска (23.08.2021) ја реобјавуваат неколку портали, а во една од објавите се тврди дека:
Масовна тепачка избила во слаткарница во Центар Жупа помеѓу две групи на гости, иако според објавувачот на видеото на социјалните мрежи се работи за наводно недоразбирање поради вакциналните сертификати.
Во една од објавите на Фејсбук, пак, пренесувајќи го видеото се додава дека се случила тепачка „меѓу вакцинирани и невакцинирани“.
СПОДЕЛЕТЕ
Тепачка на вакцинирани и невакцинирани во Дебар !!
Затоа што немаат КОВИД-СЕРТИФИКАТ луѓето не ги пуштаат во локален кафич. Тоа го направија рестрикциите, да почне народот еден со друг да се тепа по улици.
ОСТАВКА ВЕНКО!
СТОП за фашистичките мерки!
Го поделивте народот на вакцинирани и невакцинирани срам да ви е.
Од СВР Охрид негираат дека физичката пресметка има врска со вакцините и вакциналните серитфикати.
Настанот се случил меѓу припадници на две семејства поради нерасчистени односи. Ние немаме такви информации дека причината се вакциналните сертификати, изјави Стефан Димоски, портпарол на СВР Охрид за „Вистиномер.“
Охридската полиција уште во петокот во полицискиот билтен информираше за настанот.
На 19.08. околу 22.00 часот, пред угостителски објект во Центар Жупа, нарушен бил јавниот ред и мир со физичка пpecметка помеѓу Б.А.(3) , З.А.(35), Ш.Л.(26) и Б.К.(30), сите од Дебар, од една страна и О.Д.(32), Ш.Д.(33), О.Д. (18) и Е.Д.(19), сите од селото Голем Папрадник, општина Центар Жупа, од друга страна, соопшти СВР Охрид.
Едно обично пребарување на интернет со еден клик води во веста на МКД.мк со наслов: „Иселеници кои работеле во Италија, се испотепале пред кафеана во Центар Жупа“ . Текстот пренесувајќи го делот од редовниот билтен на МВР, во петокот (20.08.2021) информираше за физичка пресметка, за која напиша дека е поради нерасчистени сметки.
Според очевидци пак станува збор за иселеници кои живеат и работат во Италија а сега се на одмор во родниот крај, а причина нерасчистени сметки од онаму каде што живеат и работат, се вели во написот.
Во случајов, повеќе дигитални медиуми, користејќи го моментот на изострена реторика на социјалните медиуми, без никаква новинарска проверка пласираат дезинформација, која уште повеќе го зголемува раздорот во јавноста, кој постои околу вакцините и новите мерки на Владата. Според Кодексот на новинари, авторите на овие текстови биле должни да ја проверат информацијата, односно веродостојноста на тврдењата пласирани во виралното видео.
Новинарот треба да објавува точни, проверени информации и нема да прикрива суштински податоци и да фалсификува документи. Доколку информацијата не може да се потврди, или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно, стои во членот 1 од Кодексот на новинарите.
![]()
Овој напис е изработен во рамките на Проектот за брзо справување со вакциналните дезинформации, имплементиран од Фондацијата Метаморфозис. Тој е првично објавен во Вистиномер, а e овозможен со поддршка на Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States). Содржината на написот е одговорност на авторот и не секогаш ги одразува ставовите на Метаморфозис, БТД или нивните партнери.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар