Две дезинформации за едно исто видео: Вакцините и понатаму се безбедни за децата
За едно исто видео, во една објава пишува дека станува збор за настан во Мексико, додека пак во другата за Бразил. Како и да е, преку ова видеo споделено од неколку корисници на Фејсбук се прави обид да се дезинформира јавноста. Причините за смртта на детето, кое се гледа во споделеното видео во кое се тврди дека тоа умрело како последица од вакцината, уште се непознати и се истражуваат од страна на одговорните институции како и од Центарот за контрола и превенција на болестите.
Експертите апелираат да не се крева паника и да се продолжи со вакцинација, пишува Порталб.мк.
Во видеата објавени од корисниците на Фејсбук има доста контрадикторни елементи, еднаш се вели дека детето починало неколку секунди по примање на втората доза од вакцината, а потоа се вели дека починало по пет минути, едното во Бразил а во другото во Мексико.
Бразил… 13 годишно момче почина неколку секунди по примање на втората доза. Немам зборови!Кој ќе одговара сега?! Државата? Биг Фарма? Лекарот? Нееее, никој! Никој не одговара!!!!, пишува aвторот на првото објавено видео.
Неколку дена по објавувањето на оваа видео, истото, но со други дезинформации, е објавено од друг корисник на социјалните мрежи.
Мексико, умира по 5 минути по вакцинација, напишал авторот на објавеното видео.
Но, што е вистина?
Центарот за контрола и превенција на болестите во САД ги истражува околностите под кои починало 13 годишното момче во видеото кое е објавено од неколку корисници на социјалните мрежи кои без никаква основа дошле до заклучок дека причина за смртта била вакцината на Фајзер.
Овој тинејџер почина неколку дена по примање на втората доза на вакцината против Ковид-19. Меѓутоа, причината за смртта на овој млад човек се уште не е позната и лекарите апелираат до родителите и младите да не се плашат бидејќи нема простор за такво нешто. Милиони дози вакцини против коронавирусот се администрирани ширум светот без никакви негативни ефекти.
Повторуваме дека здравствените институции уште не ја соопштиле причината за смртта на 13 годишното момче.
Неофицијално, според еден локален медиум, младиот Вевертон починал 44 дена по примањето на втората доза од вакцината како последица на срцев удар, но вистинските причини за неговата смрт се уште се истражуваат.
Вакцините се безбедни за децата и адолесцентите
Пред да ги одобрат вакцините против Ковид-19 за употреба кај децата, научниците извршиле неколку клинички испитувања за сигурноста, ефикасноста и ефективноста на истите. ФДА веќе дала одобрение за итна употреба на вакцината на Фајзер за децата од 5 до 15 години, и целосно одобрение за употреба кај младите над 16 години. Повеќе околу ова можете да прочитате тука.
Придобивките од вакцината ги надминуваат сите можни ризици.
Експертите апелираат на што побрза вакцинација на сите деца кои имаат можност да се вакцинираат.
Безбедноста на вакцините против Ковид-19 се следи преку мошне строга и интензивна програма за следење, една од најстрогите во историјата на САД.
Вакцина, Вакцинација, Фото: Министерство за здравство на Косово
Неколку дополнителни информации
• Вашето дете истовремено може да прими вакцина против Ковид-19 и некоја друга вакцина
• Несаканите ефекти се ретки или скоро непостоечки
• Пријавени се случаи на миокардитис (воспаление на срцевиот мускул) и перикардитис (воспаление на надворешната обвивка на срцето) по вакцинацијата со Фајзер Бионтек против Ковид-19 кај деца на возраст од 12-17 години. Овие реакции се ретки, и според една студија, ризикот од миокардитис по втората доза на Фајзер Бионтек во првата недела по вакцинацијата беше околу 54 случаи на милион дози администрирани кај момчињата на возраст од 12-17 години.
• Тешка алергиска реакција, како што е анафилакса, може да се појави после било која вакцина, вклучително и вакцините против Ковид-19, но тоа се многу ретки случаи.
• Вашето дете не може да добие Ковид-19 од било која вакцина против Ковид-19, вклучувајќи ја и вакцината на Фајзер Бионтек. Повеќе за тоа како функционираат вакцините mRNA можете да прочитате тука.
• Нема докази дека вакцините против Ковид-19 предизвикуваат проблеми со плодноста.
Иако децата полесно го прележуваат Ковид-19 во споредба со постарите, овој вирус има потенцијал сериозно да ги зарази и децата и да доведе до нивна хоспитализација па и смрт.
Иако децата се помалку изложени на ризик од заразување, тие сепак можат да:
• Се заразат со вирусот Корона
• Да развијат потешка клиничка слика
• Да имаат долгорочни последици од вирусот
• Да ги заразат другите
Можните несакани ефекти
Болка во раката, црвенило или отекување на раката. Вашето дете исто така може да чувствува и замор, главоболка, треска.
Имунитетот на децата
Децата кои се заразуваат со коронавирус ретко развиваат тешка форма на болеста. Во повеќето случаи, инфекцијата поминува како блага настинка.
На нашиот имунолошки систем му требаат рецептори кои препознаваат одредени модели за да се борат со вирусна инфекција од самиот почеток. Овие рецептори овозможуваат телото да произведува интерферон. Ова е првата линија на одбрана од вирусите, рече Роланд Ејлс.
Тој е раководител на Одделот за дигитално здравје во Берлинскиот Институт за здравје во Универзитетската болница Шарите:
Откривме дека децата многу поефикасно ги препознаваат овие модели од возрасните и потоа кај нив се активизира имунолошкиот систем.
Но, децата со коморбидитети се поранливи на коронавирусот од тие без придружни болести. Децата кои се заразуваат со коронавирусот може да развијат и сериозни компликации како мултисистемски воспалителен синдром, што е состојба во која воспалителни процеси настануваат во различни делови од телото, вклучувајќи го срцето, белите дробови, бубрезите, мозокот, кожата, очите или гастроинтестиналниот тракт.
Вакцинацијата влијае и врз општата заштита
Друга причина за вакцинација на децата, според Кавсар Талат, е постигнувањето на колективен имунитет. Ова всушност е и целта на целото општество како начин за спречување на ширењето на вирусот.
Освен преку формите на болеста, Ковид-19 преку карантините, изолацијата и затворањето на училиштата има и психолошко влијание кај децата. Сега веќе две години од почетокот на пандемијата со Ковид-19 психолошкиот и физичкиот развој на децата е нарушен речиси насекаде во светот. Вакцинацијата е најдобар начин за враќање на животот во нормала, рече Талат.
Во Северна Македонија вакцинацијата на децата против корона вирусот започна на 19 јули годинава и досега не се пријавени тешки несакани ефекти кај децата, потврдија за Порталб здравствените институции.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар