Фотографија креирана со вештачка интелигенција се шири во контекст на конфликтот Иран-Израел

 

Фотографијата што е споделена во објавата е генерирана со вештачка интелигенција и не претставува вистинска фотографија од воздушен напад од Иран кон Израел и пробивање на „железната купола“. Кога „Вистиномер“ ја постави фотографијата во алатка за детекција на фотографии креирани со помош на вештачка интелигенција, резултатите кои ги добивме се дека таа е 90 проценти креирана со ВИ

 

Рецензираме објава на социјалната мрежа Фејсбук во која се споделува фотографија и пишува:

хазаро/американската “железна купола”

Фотографијата што е споделена во објавата е генерирана со вештачка интелигенција (ВИ) и не претставува вистинска фотографија од воздушен напад од Иран кон Израел и пробивање на „железната купола“.

 Израелската канцеларија за економија и култура во Тајпеј изјави дека немало сериозен пожар во Тел Авив како што е прикажано на онлајн сликата, и дека ова не е вистинска фотографија. Ниту меѓународните новински агенции ниту мејнстрим медиумите не ја цитираа онлајн фотографијата. Покрај тоа, кулата прикажана на онлајн сликата е слична на Магнетната кула што се наоѓа во центарот на Тел Авив, веднаш до зградата на штабот на Израелските одбранбени сили; но според извештаите на меѓународните медиуми, Магнетната кула не била погодена од проектил и не се запалила, пишуваат проверувачите на факти од Тајван.

Со голо око, може да се види дека на врвот на една од зградите на онлајн сликата се појавува неприродна кружна структура.

Понатамошното откривање преку повеќе алатки за идентификација на фотографии со вештачка интелигенција покажа дека фотографијата е креирана со помош на вештачка интелигенција.

На 13 јуни, Израел изврши воздушен напад врз Техеран, Иран, а Иран потоа започна силен контранапад со ракети. Ситуацијата на Блискиот Исток продолжува да ескалира. Но, фотографијата од објавата што ја рецензираме не е фотографија после бомбардирање на Тел Авив, главниот град на Израел, туку е креирана со ВИ. Кога „Вистиномер“ ја постави фотографијата во алатка за детекција на фотографии креирани со помош на вештачка интелигенција (Sightengine), резултатите кои ги добивме се дека таа е 90 проценти креирана со АИ (ВИ).

Понатамошниот преглед на видеата и фотографиите направени од Би-Би-Си и Асошиејтед прес откри дека навистина имало сцени и перспективи слични на оние на фотографијата, што кружеле онлајн, но во тој момент немало полна месечина на небото, а по паѓањето на ракетите се гледал само чад, а не се запалил никаков жесток оган.

Инаку „железната купола“ (iron dome) претставува најпознат израелски ракетен штит, дизајниран за пресретнување ракети со краток дострел, како и гранати и минофрлачи на дострел меѓу 4 километри и 7 километри од местото на лансирање.

Поради сите горенаведени факти објавата што ја рецензираме ја оценуваме како објава со видоизменета содржина (altered content).

 

 

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар