Хилари Клинтон нема изјавено „ние ја креиравме Ал-Каеда“

Наспроти изнесеното во објавата, не постојат официјални документи на Централната разузнавачка агенција (ЦИА) во кои се признава дека таа ја создала терористичката организација Ал-Каеда. Странски проверувачи на факти пишуваат дека видеото споделено во објавата во кое зборува Клинтон е од 2009 година и во ниеден момент во говорот таа не тврди „ние ја креиравме Ал Каеда“

Рецензираме објава на социјалната мрежа Фејсбук во која се споделува видеоматеријал на кој зборува Хилари Клинтон и пишува:

Наспроти изнесеното, не постојат официјални документи на Централната разузнавачка агенција (ЦИА) во кои се признава дека таа ја создала терористичката организација Ал-Каеда. ЦИА има декласифицирани документи поврзани со Ал-Каеда и нападите на 11 септември 2001, вклучувајќи интерни извештаи за тоа како агенцијата ја следела и проценувала заканата од Ал-Каеда и како реагирала пред нападите. Овие документи не тврдат дека ЦИА ја создала Ал-Каеда. Владата на САД, вклучувајќи ја ЦИА и Извештајот на Комисијата за 11 септември, ја класифицира Ал-Каеда како терористичка мрежа предводена од Осама бин Ладен, која се развила независно и ги извршила нападите во 2001 година.

За време на војната меѓу СССР и Авганистан во осумдесеттите години од минатиот век, САД – вклучувајќи ја ЦИА – спроведувале Операција „Циклон“, тајна програма за финансирање и вооружување на авганистанските муџахедини кои се бореле против Советскиот Сојуз. Поддршката главно одела преку пакистанската разузнавачка служба (ISI). Но, нема јавно објавени „документи на ЦИА каде тие признаваат дека ја создале Ал-Каеда“. Не постојат докази за директно создавање, обука или спонзорство на Ал-Каеда од страна на ЦИА, ниту дека „групата била формално или намерно создадена од американските разузнавачки служби“.

Како што пишуваат проверувачите на факти на „Сноупс“, видеото споделено во објавата во кое зборува Клинтон е од 2009 година и во ниеден момент во говорот таа не тврди „ние ја креиравме Ал Каеда“. И проверувачите на факти на „Вокс Украина“ го повторуваат истото.

Во снимката Клинтон вели:

Имаме историја на влегување внатре и излегување од Пакистан. Да се потсетиме дека луѓето против кои се бориме денес ги финансиравме пред 20 години. И го правевме тоа зашто бевме „заглавени“ во оваа борба со Советскиот Сојуз. Тие го нападнаа Авганистан, а ние не сакавме да дојде до тоа да ја контролираат Централна Азија. И се фативме за работа. И токму претседателот Реган, во партнерство со Конгресот предводен од Демократите, рече: „Знаете што? Звучи како прилично добра идеја. Ајде да се справиме со ИСИ и пакистанската војска и да одиме да ги регрутираме овие муџахедини. И тоа е одлично. Ајде да натераме некои да дојдат од Саудиска Арабија и други места увезувајќи го нивниот вахабистички вид на ислам, за да можеме да го победиме Советскиот Сојуз.“ И погодете што? Тие се повлекоа. Изгубија милијарди долари, а тоа доведе до распад на Советскиот Сојуз. Значи, постои многу силен аргумент дека не била лоша инвестиција да се уништи Советскиот Сојуз, но да бидеме внимателни што сееме бидејќи ние ќе жнееме. Потоа го напуштивме Пакистан. Рековме: „Добро, во ред. Вие справувајте се со стингерите што ги оставивме низ целата ваша земја. Вие справувајте се со мините што се по должината на границата. И, патем, не сакаме да имаме никаква врска со вас. Всушност, ве санкционираме.“ Значи, престанавме да се справуваме со пакистанската војска и со ИСИ, и сега надоместуваме многу изгубено време.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар