„Играње твист“ со процедурата за верификација на мандатите

Чудно е како се извртуваат прашања од областа на политичкиот систем, независно од она што стои во Уставот или што постои како практика 30 години во плуралистичкиот амбиент. Последен таков обид е оној на професорката Гордана Силјановска-Давкова, која усвоените мандати на пратениците ги толкува во стилот „тази верификација не е верификација“, со цел да се прават правни опструкции за изборот на идната Влада

Пишува: Љубомир КОСТОВСКИ

Непосредно по прекинот на првата седница од Собранието на РСМ во новиот состав со пратениците избрани на последните парламентарни избори, се јавија толкувања дека извршената верификација на мандатите сѐ уште не е во сила, бидејќи седницата не го докрајчила својот дневен ред, иако точката со верификација на мандатите е помината. Една од оние кои говореа во прилог на таквото толкување на споменатата седница е професорката Гордана Силјановска Давкова, инаку избрана пратеничка од редовите на ВМРО ДПМНЕ и претходно носител на листата на оваа партија во првата изборна единица.

Правниците не се согласуваат дека Собранието е конституирано. Професорката Гордана Сиљановска, која од вчера е и пратеник, вели дека за ова реагирала и по вчерашната седница, прашувајќи зошто се прекинува работата пред третата точка? Добила одговор дека така решиле на координацијата што ја имале претходно координаторите од претходниот состав, затоа што заклучиле дека немаат 61 глас ! Но, и самата координација вели, е спорна, затоа што координатори се избираат откако ќе се изберат пратенички групи.

За Сиљановска, вистинска среќа е што Џафери е и пратеник, инаку нема да можеше да седи во претседавачкото столче, затоа што во деловникот стои дека, тој кој ја свикал седницата, претседава со неа до изборот на претседател и потпретседатели.

[Извор: Телма – датум: 05.08.2020]

ОБРАЗЛОЖЕНИЕ:

Се чини дека во земјава владее кусо помнење за некои блиски настани со вакви ситуации, кои беа дури и предраматични:

Овие ставови се целосно спротивни на она што го направи ВМРО-ДПМНЕ по изборите во 2016 година. Тогаш, исто така, не беше избран претседател на Собранието, а сепак тогашниот претседател на државата Ѓорге Иванов му го додели мандатот за составување влада на Никола Груевски. По мачните сцени пред седиштето на ДИК и прегласувањето во Теарце, конститутивната седница на тоа Собрание се одржа на 30 декември 2016 година. Претседател на Собранието не беше избран, ниту беше формирано владино мнозинство. Па, сепак, наспроти она што сега го тврди Каракамишева, претседателот Иванов му го додели мандатот за составување влада на Никола Груевски на 9 јануари 2017 година. Тој во наредните 20 дена не успеа да состави влада, а на крајот на февруари Зоран Заев со 67 потписи отиде кај Иванов да му гарантира дека тој има владино мнозинство. Но конститутивната седница, траеше и наредните месеци сѐ до крвавиот упад на 27 април. (Независен.мк)

Прашањето на верификацијата на мандатите на пратениците го смета за готово и професорот од Правниот факултет, Борче Давидковски.

Тој, во изјава за Канал 5 (пренесена од порталот Либертас), вели:

…рокот за мандатот истекува на 14 август в петок … нема дилеми дека Собранието е конституирано и со тоа претседателот на државата е должен во рок од 10 дена да го даде мандатот

Во изјава за „Вистиномер“, пак, и судијката Маргарита Николовска –  Цаца, поранешен член на Судот за човекови права од Стразбур и сегашен член на Уставниот суд на БиХ, исто така, повтори дека штом точката на дневниот ред во Собранието за верификација на мандатите е завршена, присутните станале членови на Парламентот и истиот веќе има нов, признаен состав. Во хрониката на собранискиот живот и онака се започнуваат и прекинуваат многу седници, но усвоените заклучоци, закони и други завршени точки се сметаат за готови, не се повторуваат и ако треба се објавуваат во „Службен весник“.

Оттаму, изјавата на професорката Силјановска-Давкова, ја оценуваме како недоследна.

ИЗВОРИ:

• Телма (05.08.2020): Пратениците седнаа во пратеничките клупи, но дали Собранието беше конституирано? [Проверено на 13.08.2020]
• Независен весник (05.08.2020): За експертите на ВМРО-ДПМНЕ рокот за формирање влада не е почнат [Проверено на 13.08.2020]
• Либератс (09.08.2020): Во кабинетот на Пендаровски нема допис од Џафери дека собранието е конституирано [Проверено на 13.08.2020]

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар