Измама: Внимавајте, се промовира лажен „чудотворен“ лек за цистит

Очигледно е дека објавата има за цел да ги измами следбениците да нарачаат од „чудотворниот лек“ за цистит и на тој начин да оствари финансиска добивка од оние кои ќе поверуваат во напишаното и ќе бидат доведени во заблуда. Граѓаните мора многу да внимаваат што следат на социјалните мрежи и кому му веруваат, за да не бидат измамени

Анализираме објава на социјалната мрежа Фејсбук која вели:

Гинеколог ми вети нов живот. Се согласив на операција — и ја изгубив можноста да излегувам од дома. Имам 63 години, и ова е мојата приказна.

Ме викаат Билјана, живеам во Скопје. 32 години работев како наставничка — секој ден од 9 до 17 часот бев на нозе. Трчав меѓу клупите, постојано станував, се наведнував. Нозете навечер ми зуеја, но никогаш не се жалев. Тоа беше мојот повик.

Мојот сопруг, Зоран, го изгубив пред 5 години — инфаркт, токму на нашата викендичка. Ќерка ми Елена живее во Виена, ме бара еднаш месечно. Јас останав сама во стар стан во Карпош, на четврти кат без лифт.

Невољата почна кога имав 54 години. Не прво со протекување, туку со циститис. Печење при секое одење во тоалет. Постојан притисок долу, како некој одвнатре да ми го стиска мочниот меур. Ноќе станував три-четири пати. Грчеви во стомакот што ми одеа и во грбот. Матичниот лекар ми препишуваше антибиотици. Една недела пијам — поминува. По две недели — сè се враќа. Пак антибиотици. Пак поминува. Пак се враќа. Така живеев со години — како на темпирана бомба.

Потоа, на 56, почна протекувањето. Прво капка кога ќе кивнев. Потоа при кашлање. Потоа кога само ќе се насмеев. Почнав да носам дневни влошки. Потоа уролошки. Со секоја година стануваше полошо.

На 60 години моето тело конечно ме предаде. Бев во супермаркетот „Веро“, стоев во ред на каса. Мочниот меур ми даде сигнал — и сфатив дека нема да стигнам до тоалет. Ја оставив количката и тргнав да трчам. Не успеав. Таму, меѓу полиците со прашоци и сапуни, почувствував како топлина ми тече по нозете. Жената зад мене ме погледна. Јас гледав во подот. Локва. Моја локва. Си отидов дома без ништо. Целиот пат плачев. Не од болка — од срам.

Тоа вечер се закажав кај најдобриот гинеколог во Скопје. Ми рече дека е од години, ослабени мускули на карличното дно. И дека има операција. Едноставна процедура — се става специјална мрежичка. „90% успех,“ ми рече. „За еден месец ќе живеете нов живот.“

Ме оперираа. Два месеци се опоравував, а потоа… ништо не се смени. Напротив — стана полошо. Сега не само што протекував, туку воопшто не можев да го контролирам процесот. Докторот слегна со раменици: „Технички операцијата е успешна. Мрежичката стои правилно.“ Нему му беше сеедно што јас сум скршена. Тој си ја заврши работата.

Така мојот дом стана мој затвор. Престанав да излегувам. Воопшто. Храна порачував онлајн. Секое кашлање, секоја насмевка ми предизвикуваше паника. И пелените ги порачував онлајн. Дискретна достава. На кутијата пишуваше „хигиенски производи“. Како тоа да ќе измами некого. Трошев 4.000 денари месечно за пелени, влошки, креми против иритација и лекови. Секој месец. Од мојата пензија од 18.000 денари.

И еден ден дојде Елена и ми го кажа она што ми го скрши срцето: „Мамо, најдов добар дом за стари лица. Близу Скопје, чисто, средено. Не можам секој месец да доаѓам од Виена. Ти си сама, никаде не излегуваш, стануваш полошо. Таму има медицински сестри што ќе помогнат со… со хигиената.“

Со хигиената. Моја 37-годишна ќерка ми рече дека треба некој да ме мие.

Ја избркав. Цела ноќ плачев. Се чувствував валкано, старо, како непотребен товар. Размислував да ставам крај на сè. Но нешто ме запре. Седнав пред стариот лаптоп и на Facebook, во група за жени 50+, само напишав: „Жени, како живеете со ова?“

И ми одговорија. Десетици жени. Од Битола, Охрид, Прилеп. Ги пишуваа своите приказни — исти како мојата. И една жена ми прати линк до интервју со некој биохемичар. Тој зборуваше за нова природна формула со растителни екстракти, која не ги маскира само симптомите, туку ја обновува слузницата на мочниот меур и ги зајакнува мускулите одвнатре, отстранувајќи ја вистинската ПРИЧИНА.

Не поверував. Уште едно „чудо“. Но прочитав до крај. Немаше магични ветувања. Имаше научно објаснување како работат состојките. Јас веќе не губев пари — ја губев самата живoт, па решив да ризикувам. Нарачав курс.

Првата недела не почувствував ништо, освен што печењето при мокрење се намали. Втората недела забележав дека ноќе се разбудив само еднаш. Третата недела се фатив себеси како одам од кујна до соба без страв.

По еден месец, првпат по три години, излегов од дома без пелена. Само до продавницата на аголот. Стигнав. Купив леб. Се вратив. Сува. Апсолутно сува. Седнав на стол и заплакав — овој пат од среќа.

Ѝ кажав на соседката, Весна. Таа има 68, ист проблем по операција — инконтиненција и постојан циститис. Престана да оди на кафе, затоа што се плашеше дека нема да издржи да седи. Се плашеше дека ќе почувствуваат мирис. Ѝ го дадов линкот. По две недели ја сретнав на скалите — одеше во театар. Средена, мирна. Ме фати за рака и ми рече: „Билјана, фала ти. Вчера бев во театар. Седев три часа и ниту еднаш не станав.“

Оваа едноставна, природна формула ми го врати она што хирургот не можеше да ми го врати со неговата 90% статистика. Ми го врати достоинството. Повторно шетам во парк. Отидов кај пријателка во Охрид. Дури размислувам да летнам кај Елена во Виена. Не затоа што ме вика, туку затоа што МОЖАМ.

Ако оваа приказна ви е позната, ако сте уморни од болка, срам и живот меѓу четири ѕида — не се откажувајте.

Кликнете на копчето „Дознај повеќе“ подолу за да го прочитате интервјуто со специјалистот што ми го промени животот.

P.S. Пратката доаѓа во непрозирно пакување, без никакви натписи за содржината. Никој, дури ни курирот, нема да знае што има внатре. Знам колку е важно тоа.

Објавата нуди линк до надворешна страница на кој наводно треба да дознаете нешто повеќе за производот што го рекламира и фали и на кој, како што се наведува, треба да го прочитате „интервјуто со специјалистот што ќе ви го промени животот“. Но, на линкот нема никакво интервју со никаков специјалист.

Таму ве пречекува наградна игра во која доколку победите, ќе го добиете „прекрасниот лек“ по ексклузивна цена.

Станува збор за наводен лек против циститис Урофикс. Тој се нуди по цена од 2.980 денари, но вие би го добиле наводно по пониска цена, за 1.490 денари.

Вистиномер го побара овој лек во Централниот регистар на лекови на С. Македонија, но не го најдовме, што значи дека тој не е регистриран и не се продава легално.

Понатаму, доколку на Гугл побарате лек Urofix, ќе видите дека тој се нуди само на сомнителни страници, не од официјални фармацевтски компании, како и на социјалните мрежи.

На Гугл најдовме информација за лек Уорфикс, но во форма на таблети, кој се продава онлајн на страницата Watson.com.ph. Тоа е онлајн продавница/веб-страница на брендот Watsons во Филипини. Watsons е голем синџир продавници за здравје и убавина, дел од глобалната компанија AS Watson Group, една од најголемите во светот во оваа индустрија.

За овој лек пишува дека најчесто се користи за третман на симптоми на зголемена простата (бенигна простатна хиперплазија – BPH) и содржи комбинација од dutasteride (500mcg) и tamsulosin (400mcg). Оваа комбинација помага во намалување на големината на простатата и го олеснува уринирањето, а се издава со рецепт. Постојат и други производи со слично име за инфекции (Cefuroxime) или додатоци во исхраната. Наменет е за мажи со зголемена простата за подобрување на протокот на урина и намалување на потребата од операција.

Пакувањето на овој лек воопшто не соодветствува со пакувањето на лекот што се промовира во објавата што ја анализираме.

Очигледно е дека објавата има за цел да ги измами следбениците да нарачаат од „чудотворниот лек“ за цистит и на тој начин да оствари финансиска добивка од оние кои ќе поверуваат во напишаното и ќе бидат доведени во заблуда. Граѓаните мора многу да внимаваат што следат на социјалните мрежи и кому му веруваат, за да не бидат измамени.

Поради сите горенаведени факти објавата што ја рецензираме ја оценуваме како невистина.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар