Јакимовски да одлучи – треба или не треба да се водат преговори за името
Изјавата на лидерот на ГРОМ ја оценуваме како недоследна, имајќи ги предвид неговите ставови од минатото по однос на ова прашање. Кога Јакимовски беше дел од СДСМ во 2010 година, тврдеше дека тогашниот премиер, Никола Груевски, морал да најде решение на спорот околу името со цел на Македонија да ѝ се отворат вратите кон ЕУ и НАТО
Лидерот на ГРОМ, Стевче Јакимовски, во дебатната емисија Отворено студио на Телевизија „Нова“, зборувајќи за спорот околу името со Грција и преговорите кои ги води сегашната власт за надминување на овој спор, изјави:
Мислам дека по ова прашање ние Македонците не треба да прифатиме било каков разговор.
[Извор: Јутјуб (40:43), Датум: 29.12.2017 година]
ОБРАЗЛОЖЕНИЕ:
Осврнувајќи се на преговорите за името, Јакимовски истакна дека било некоректно од Албанците што им сугерирале на Македонците да го променат името. Притоа, како што пренесе порталот Курир на 02.01.2018 година, Јакимовски рекол и дека „никој Македонец не треба да прифати да се разговара за промена на името на Република Македонија“.
Ваквата изјава на лидерот на ГРОМ ја оценуваме како недоследна, имајќи ги предвид неговите ставови од минатото по однос на ова прашање. Имено, кога Јакимовски беше дел од СДСМ во 2010 година, тврдеше дека тогашниот премиер, Никола Груевски, морал да најде решение на спорот околу името со цел на Македонија да ѝ се отворат вратите кон ЕУ и НАТО.
Сметаме дека Груевски е на власт, тој е премиер, во историјата на Македонија имал највисок рејтинг и тој највисок рејтинг треба да го искористи за решавање на крупни политички прашања во државата, а едно од нив е прашањето за спорот со името со Грција, што практично треба да ни ги отвори перспективите во НАТО и ЕУ, изјави градоначалникот на општина Карпош, Стевче Јакимовски, во Неделното интервју за „Радио Слободна Европа“, јави Нетпрес.
Ваквата негова изјава, на 26.09.2010 година, ја пренесе и Вечер.
Значи, Јакимовски во 2010 година, како член на СДСМ, партијата која сега е на власт и која ја критикува, сметал дека решение за спорот со името мора да се најде со цел евроатланска интеграција на земјата. Денес, од позиција на опозиционер, како лидер на ГРОМ, тврди дека ниту еден Македонец не требал да прифатат било каков разговор околу името.
Имајќи ги предвид неговите ставови од минатото, може да се заклучи дека неговата изјава за неприфаќање на било какви разговори е недоследна.
ИЗВОРИ:
- Јутјуб (29.12.2017) – Отворено студио: Со Тиранска почнуваме, со каква платформа завршуваме? [Пристапено на 05.01.2018]
- Курир (02.01.2018)- Јакимовски: Некоректно е Албанците да преговараат за промена на името на Република Македонија [Пристапено на 05.01.2018]
- Нетпрес (26.09.2010) – Јакимовски: Поради целокупната лоша состојба потребни се предвремени избори [Пристапено на 05.01.2018]
- Вечер (26.09.2010) – СДСМ чека на Груевски, Љубчо ја засака референцата [Пристапено на 05.01.2018]
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
