Кликбејт објава дезинформира за пожар во центарот на Скопје

Во склоп на објавата има фотографија од пожар, а во првиот коментар под линкот, има напис со наслов „Вонредно Македонија, голем пожар во моментов во центарот на Скопје“.

Но, кога ќе се пристапи на линкот, тој води до страница за продажба на мало и на големо на производи од кинеско потекло. Станува збор за класична клик-бејт објава која што злоупотребува и дезинформира со цел да донесе поголем број на кликови и сообраќај на странска страница со цел профит.

Наслови како „Страшен пожар“, „Никој не го очекуваше ова“ или „Погледнете што се случи“, намерно се формулирани за да предизвикаат страв и љубопитност кај читателите. Но наместо вистински информации, линкот води кон сосема неочекувано место – онлајн продавница со стоки произведени во Кина.

Овој тип манипулација ја користи човечката емоција за брзо привлекување внимание. Пожарите се сериозни и често трагични настани, па затоа луѓето природно сакаат да се информираат. Токму таа потреба за информираност се злоупотребува. Зад сензационалниот наслов не се крие вест, туку маркетиншка замка со цел да се зголеми посетеноста и продажбата на производи без никаква поврзаност со настанот. Кога ваквите практики стануваат секојдневие, читателите сè потешко разликуваат реални вести од манипулативна содржина. Дополнително, се релативизира сериозноста на вистинските трагедии, кои се користат како алатка за профит.

Клик-бејтот носи краткорочна добивка за продавачите, но долгорочно ја нарушува информативната култура и јавната доверба.

Особено честа клик-бејт техника е злоупотребата на зборот „вонредно“. Овој збор веднаш создава чувство на опасност, итност и сериозност, па корисниците инстинктивно кликнуваат очекувајќи важна информација што директно ги засега. Наместо реална вонредна состојба или итно соопштение, често следува нерелевантна содржина, реклама или линк што нема никаква врска со настанот, при што стравот и вниманието на публиката се користат како мамка.

На 3 јануари 2025 година кога е објавена дезинформацијата, во ниеден релевантен медиум во Република Северна Македонија нема објава за никаков пожар во централното градско подрачје.

Поради сите горенаведени факти објавата што ја рецензираме ја оценуваме како невистина.