Ковид-19 не е измислено сценарио

На социјалните мрежи продолжува да се негува тврдењето дека Ковид-19 е измислено сценарио и дека не станува збор за вистинско вирусно заболување. Една од формите со кои се шири оваа теорија на заговор е цитирањето на кинеска научничка која ги потврдува горенаведените тврдења. Меѓутоа, таа  во научните академски кругови е позната како контроверзна личност финансирана од сомнителни извори. Глобалната научна фела ги отфрли тврдењата дека Ковид-19 е измислено сценарио, пишува Порталб.мк.

Содржината што ја рецензираме носи наслов: Не зачуди кинеската научничка, доста е веќе, Ковид е само едно сценарио кое… Всушност, оваа содржина е споделена и во минатото на социјалните мрежи и одвреме-навреме повторно се ажурира од конспирациски кругови или непрофесионални портали кои имаат за цел да соберат што повеќе кликнувања со наслови и сензационални содржини.

Иако лажните тврдења на оваа содржина се побиени од Вистиномер.мк а објавите се избришани од социјалните мрежи, оваа конспирација продолжува да се споделува онлајн и повторно да се објавува од други интернет адреси. Во изминатите денови оваа содржина беше објавена на Фејсбук страницата  „Рубикон“.

За кратко време објавата е споделена околу 100 пати од други корисници на „Фејсбук“ и собрала над 250 коментари. Во голем број коментари има остар говор на омраза кон лекарите и медицинските сестри, Светската здравствена организација како и Кина и кинескиот народ.

 

Во содржината што ја рецензираме се тврди дека „Содржината тврди дека кинеската научничка Ли Менг Јан открила дека коронавирусот е произведен во лабораторија“. Сепак, за ова тврдење не се приложени дополнителни факти или научни податоци кои би ја поддржале оваа теорија.

Ли Менг Јан е позната на светската јавност по своите публикации и интервјуа во кои тврди дека САРС-КоВ-2 е создаден во лабораторија на кинеската влада. Овие публикации беа широко критикувани од научната фела.

Од септември 2020 година до март 2021 година, Јан напиша серија од четири прелиминарни истражувачки трудови, тврдејќи дека САРС-КоВ-2 не се појавил природно, туку бил произведен во лабораторија. Истражувањето (кое не поминало низ процес на научна рецензија) беше објавено на платформата Зенодо, виртуелен простор со отворен пристап во кој што секој може да го објави своето истражување.

Јан изјави дека доказите од генетскиот инженеринг биле цензурирани во научните списанија, наводно како дел од „заговор да се потиснат информациите на оваа тема“. Сепак, други научници ширум светот се спротивставија на валидноста на истражувањето на Јан, засновано на лоши методи на истражување, прикривање на финансирањето на истражувањето, употреба на псевдоними за коавтори во четирите истражувачки трудови. Научната фела, исто така, откри дека трудовите никогаш не биле доставени на ниедно научно списание за рецензија. Виролозите ја нарекоа работата на Јан „ненаучна“, „ѓубре“ и напишана за да шири „политичка пропаганда“.

Истражувањето за вистинитоста на теоријата на Јан откри дека таа била поддржана од политичка организација поврзана со Стив Банон, поранешниот стратег на Доналд Трамп, организација која никогаш претходно не објавувала научни или медицински истражувања. Криењето на финансискиот извор на истражувањето беше опишано како грешка во етичката транспарентност од страна на доктор Адам Лоринг, особено кога се објавува „нешто што во суштина се конспирациски теории кои не се засновани на факти“.

Друг поддржувач на Јан е кинескиот милијардер Гуо Венгуи, кој е непријател на кинеската влада и од 2018 година живее во САД.

Во април 2020 година, Јан побегнала во Соединетите држави. Според американските медиуми, Јан не избегала од Кина, туку тоа е игра на Стив Банон и Гуо Венгуи, кои имале за цел да ги зголемат антикинеските чувства и да го оттргнат вниманието на јавноста од темата како администрацијата на Трамп се соочувала со пандемијата на Ковид- 19 и за возврат да влијаат на соборувањето на кинеската влада. Американските медиуми објавија дека Гуо и Банон договориле Јан да лета од Кина во САД во прва класа, и обезбедиле сместување, ја обучувале за настапи во медиумите и и договориле интервјуа со конзервативни медиумски водители како Лу Добс и Такер Карлсон.

Извор на информацијата: Вашингтон Пост