На ВМРО-ДПМНЕ и на Трајановски не им тргна со подземните сообраќајници

ИЗГРАДБА НА ТРИ ПОДЗЕМНИ СООБРАЌАЈНИЦИ ВО СКОПЈЕ

Заради конечно решавање на сообраќајниот метеж во главниот град и олеснување на сообраќајот за стотици илјади жители на Скопје, ќе изградиме три подземни сообраќајници, и тоа: 1/ од раскрсница кај Народна банка на Република Македонија до Влада на Република Македонија, 2/ крстосница на две нивоа кај ТЦ Мавровска и Судска палата и 3/ подземна сообраќајница кај Јужен булевар. Проектната документација за реализација на овој проект ќе ја изработи Град Скопје. Носители на овој проект се Градот Скопје, Јавното претпријатие за државни  патишта и Владата на Република Македонија.

Буџет: 90-100 милиони евра

Финансирање:

» За проектот од раскрсница кај Народна банка на Република Македонија до Влада на Република Македонија: Влада 50%, ЈП за државни патишта 40% и Град Скопје 10%;

» За проектот крстосница на две нивоа кај ТЦ Мавровка и Судска палата: Влада 50%, ЈП за државни патишта 40% и Град Скопје 10%;

» За проектот подземна сообраќајница кај Јужен булевар: Град Скопје со фазна градба.

» За проектот од раскрсница кај Народна банка на Република Македонија до Влада на Република Македонија – 2019 година почеток на градба;

» За проектот крстосница на две нивоа кај ТЦ Мавровска и Судска палата – 2020 година почеток на градба;

» За проектот подземна сообраќајница кај Јужен булевар – 2019 година почеток на градба.

ОБРАЗЛОЖЕНИЕ

Партијата ВМРО-ДПМНЕ на 58. страница од најновата програма со која ја бара довербата на гласачите за изборите в недела (11 декември 2016 година), изнесува и „подгреани“ крупни ветувања што се однесуваат на Скопје, односно на решавање на дел од проблемите со сообраќајот во главниот град.

Овие ветувања за две подземни сообраќајници и за крстосница на две нивоа кај НУБ „Свети Климент Охридски“ предизборно се давани двапати претходно, но досега се главно неисполнети. Покрај тоа, интересно е и тоа што во најновите ветувања роковите за почеток на изградба на овие сообраќајници се прилично далеку отсега, односно крајот на 2019 и 2020 година. Тоа можеби може да се сфати и како очекување дека ќе има проблеми за реализацијата, слични како тие што се појавуваа досега, кои ќе ги опишеме накратко подолу.

Ветувањата се давани во изборните програми на Коце Трајановски, кој како кандидат на ВМРО-ДПМНЕ во 2009 и 2013 година се бореше за градоначалнички мандат во Скопје и беше победник на изборите. Но, од ветувањата е реализирано многу, многу малку, како што ќе видиме во овој текст. Потврда за тоа е, впрочем, и најновото ветување во изборната програма на ВМРО-ДПМНЕ за изборите на пратеници.

Во изборната програма на Трајановски за изборите во 2009 година (цитирано ветување, на стр. 50), тој ветува изградба на подземна сообраќајница од Партизанска до Комплекс Банки. Тоа го потврдуваат и два архивирани линка до вести, кои се на агрегаторот на вести Тајм.мк.

10. Проект: Подготовка и почеток на изградба на подземен коридор од„Партизанска“ до комплекс банки

РОК: 2013

Опис на проектот: Градот Скопје, заедно со Владата на РМ ќе направи подготовка и ќе почне со изградба на овој значаен коридор, со кој ќе се подобри сообраќајот во градот.

8. Проек т: Изградба на подземен и надземен сегмент на бул. „Македонија“

РОК: 2012

Опис на проектот: Ќе се направи правна и урбанистичка подготовка, со цел да се создадат услови за изградбата

на оваа делница на булеварот „Македонија“. (зад Т.Ц „Рамстор“)

Во однос на овие две ветувања, распишан е и оглас со траење до 26.02.2010 година, со кој се бараат консултанти, помеѓу другото, и за избор на концесионер за изградба и користење на подземни сообраќајници.

Потоа, гледаме дека се преземени одредени мерки и за двете ветувања, односно во Информативно гласило на Град Скопје бр. 25, на 10 страница читаме дека на 12 март 2012 година е потпишан договор со компанијата „Лимак“од Турција, со кој се предвидува и изградба на подземна сообраќајница кај Јужен булевар. Но, тоа не се реализира во рокот, ниту, пак, во текот на следниот мандат на Трајановски, па го среќаваме како ветување на ВМРО-ДПМНЕ, од програмата за изборите в недела.

На стр. 11 од Информативно гласило на Град Скопје бр. 25, гледаме дека градежниот проект за сообраќајницата и тунелот што ќе се протегаат од раскрсницата на булеварот Илинден со булеварот Гоце Делчев, па под кејот „13 Ноември“ до раскрсницата на булеварите Крсте Мисирков и Кочо Рацин ќе го изработуваат експертите од проектантската куќа ИДОМ, од Шпанија, за што Трајановски потпишал договор.

Инаку, интересна работа за оваа подземна сообраќајница, во контекст на потпишаниот договор со проектантите од Шпанија е тоа што во својата Изборната програма 2011-2015 на ВМРО-ДПМНЕ „Манифест за реформи и развој“ на 75. страница читаме дека е изработена студија и е направен идеен проект, но е потпишан и Меморандум меѓу Владата и Град Скопје за изградба на подземна сообраќајница, а рокот е 2016 година.

…студија за сообраќајниот систем на град Скопје со идејни проекти за сообраќајниците: булевар „СветиКлимент Охридски“ (кај зградата на Владата на РМ) до булеварот „Никола Карев“ („пластичарска улица“) во должинаод 1.050 метри, од кои мост од 180 метри и тунел од 330 метри и подземна сообраќајница од дирекцијата на АДМакедонски пошти до Комплекс банки во должина од 1.500 метри, од кои 900 метри тунел. Со имплементација на стратегијата се очекува конечно олеснување на сообраќајниот метеж во Скопје. Во рамките на овој проект, веќе е потпишан Меморандум за соработка меѓу Владата на РМ и Град Скопје за изградба на подземна сообраќајница од Соборниот храм до Комплексот бнки, во вкупен износ од 30 милиони евра. Во овој износ, Владата ќе учествува со 20 милиони евра, а Градот Скопје со 10 милиони евра. Надлежна институција за спроведување на активностите е Град Скопје во соработка со Министерството за транспорт и врски и Министерството за финансии.

Рок: 2013-2016 година.

Мојот втор градоначалнички мандат, според моето мислење, ќе го одбележи проектот за изградба на подземната сообраќајница што ќе се протега од Комплексот банки до Мостот Гоце Делчев, под кејот на реката Вардар.

Јавниот повик за избор на изведувач за изградба на оваа сообраќајница е во тек, а крајниот рок за доставување на понудите е 10 јуни.

Според повикот, предмет на изградба ќе биде подземна сообраќајница од булеварот Кузман Јосифовски-Питу со раскрсницата со улицата Никола Карев до булеварот Кочо Рацин, од булеварот Кочо Рацин преку кејот 13 Ноември и раскрсницата со булеварот Илинден и булеварот ВМРО, и трасата на сообраќајниот коридор до булеварот Партизански одреди преку булеварот ВМРО и дел од булеварот Илинден. Подземната сообраќајница треба да биде долга 1.300 метри, од кои 900 метри се под земја, а 400 метри над земја. На овој капитален проект работиме веќе неколку години и тој ќе биде вистинска круна на сообраќајните решенија во Скопје.

ИЗВОРИ

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар