Наместо во септември, отворањето на градинката во Куманово пролонгирано за декември
Пренамена на дел од просториите на Пионерскиот дом во Куманово во градинка за дечиња од предучилишна возраст. (Рок за реализација: 20 септември 2017 година)
[Ветување на министерката за труд и социјална политика, Мила Царовска, Датум: 04.08.2017]
ОБРАЗЛОЖЕНИЕ:
Пренамената на дел од просториите на Пионерскиот дом во Куманово во градинка, започна на први август 2017 година, а како што тогаш вети министерката за труд и социјална политика, Мила Царовска, таа ќе биде готова за 45 дена, односно до 20 септември. Преадаптацијата на просторот е завршена, меѓутоа поради проблеми со затоплувањето доцни отворањето на градинката. Со оглед на фактот што рокот за реализација на проектот е поминат пред два месеца и сега се најавува финализација на работите со затоплувањето на градинката и нејзино пуштање во употреба наредниот месец (декември), ветувањето го оценуваме како делумно исполнето.
На 04.08.2017 година, како што пренесоа дел од медиумите, министерката Царовска при посетата на објектот на поранешниот Пионерски дом во Куманово, меѓу другото, изјави:
За реконструкција на овој објект Министерството за труд и социјална политика од Буџетот има издвоено три и пол милиони денари. Изведувачот има договор за 45 дена треба да заврши, на 1 август е започната работата, што значи некаде на 20 септември треба да биде завршено – вели Царовска, пренесе порталот Кумановски муабети.
За реконструкција на објектот предвидени се 2.083.637 денари, а во Буџетот се обезбедени средства и за опремување на градинката во износ од 1.513.202 денари. Реконструкцијата започна на 1 август 2017 година и предвидено е да заврши за 45 дена. Градинката ќе опфати 85 деца, ќе има три занимални и една група јасли, соопшти МТСП, а пренесе Слободен печат.
Сепак, ваквите предвидувања на министерката Царовска не се остварија.
На 21.11.2017 година, порталот Кумановоњуз, јави дека градинката во Пионерскиот дом, наместо во септември, ќе биде готова до крајот на годината, односно декември. Веста утредента ја пренесе и порталот Кумановски муабети.
Поради проблеми со затоплувањето доцни отворањето на градинката во Пионерскиот дом. Иако беше ветено дека ќе биде пуштена во употреба во септември, сега нејзино отворање се најавува до крајот на годината.
„Техничкиот прием е направен треба да се довршат уште некои работи околу затоплувањето, така да надеваме дека до крајот на годината ќе започне со работа“, – изјави директорката Марина Алексовска, јави Кумановоњуз.
Па, имајќи предвид дека доцни целосната реализација на проектот за пренамена на дел од просториите од кумановскиот Пионерски дом во градинка, ветувањето на министерката Царовска го сметаме за делумно исполнето.
ИЗВОРИ:
- Тајм.мк (04.08.2017) – Пионерскиот дом наскоро ќе стане детска градинка [Пристапено на 24.11.2017]
- Слободен печат (04.08.2017) – МТСП: Куманово есенва ќе добие нов објект за градинка [Пристапено на 24.11.2017]
- Кумановски муабети (04.08.2017) – Пионерскиот дом наскоро ќе стане детска градинка (фото+видео) [Пристапено на 24.11.2017]
- Тајм.мк (21.11.2017) – Наместо во септември, градинка во Пионерскиот дом кон крајот на годинава [Пристапено на 24.11.2017]
- Кумановоњуз (21.11.2017) – Градинката во Пионерскиот дом ќе биде готова до крајот на годината [Пристапено на 24.11.2017]
- Кумановски муабети (22.11.2017) – Наместо во септември, градинка во Пионерскиот дом кон крајот на годинава [Пристапено на 24.11.2017]
Оцени: Ана Анастасовска
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
