Не е точно дека кулата на Водно предизвикува болести кај луѓето
Во објавата сосема паушално, без никаква експертиза и аргументација се тврди дека откако е поставена кулата на Водно „се мултиплицирале состојби и болести кај луѓето“. Тоа не е потврдено од ниедна домашна или странска здравствена организација. Кулата во моментов е зграда, има само бетон и железо, така што не може да разболи никого
Во објавата сосема паушално, без никаква експертиза и аргументација се тврди дека откако е поставена кулата на Водно „се мултиплицирале состојби и болести кај луѓето“. Тоа не е потврдено од ниедна домашна или странска здравствена организација. Кулата во моментов е зграда, има само бетон и железо, така што не може да разболи никого
Рецензираме објава на социјалната мрежа Фејсбук во која пишува:
Кога пишував за Ајкулата Скопска сите ми се подсмевавте!!! порака; Скопје е под опсада со антената на Водно. Откако ја поставија се мултиплицираа состојби и болести кај луѓето.
Објавата се однесува на кулата на Водно (фотографија овде) која во објавата се нарекува „ајкула“. „Вистиномер“ се обрати кај експерт од Агенцијата за електронски комуникации за проверка на наводите изнесени во објавата.
Претседателот на Комисијата за електронски комуникации во Агенцијата за електронски комуникации, професор Орце Симов, за „Вистиномер“ изјави дека кулата во моментот е само градежен објект.
Таа кула во моментов е само градежен објект, од материјал каков што имаат илјадници објекти низ Скопје. Дека многу луѓе се разболеле од тоа е сосема неточно и неиздржано. На врвот на Водно во моментот има десетина антенски системи, сите тие ќе се демонтираат и монтираат на таа кула. И тогаш кога ќе се монтира нема да има штетно зрачење како што нема ни сега, изјави за „Вистиномер“ професор Симов.
Во објавата што ја рецензираме, пак, сосема паушално, без никаква експертиза, ниту аргументација се тврди дека „откако е поставена кулата се мултиплицирале состојби и болести кај луѓето“. Тоа не е потврдено од ниедна домашна или странска здравствена организација. Кулата во моментов е зграда, има само бетон и железо, така што не може да разболува никого.
Оваа кула (телекомуникациската кула на Водно) е еден од најголемите инфраструктурни проекти во Скопје изминатите 10 години. Таа требаше да се пушти во употреба во октомври 2025 година, но рокот беше пролонгиран поради довршување на некои дополнителни процедури. Таа почна со изградба во 2013 година и е еден од највисоките објекти во земјава со висина од 155 метри.
Кулата има бетонско јадро, со висина од 115 метри, на него има челична решетка од 27 метри височина, на која операторите ќе ги монтираат своите антенски системи и на врвот на решетката Македонска радиодифузија ќе монтира антена од 15 метри.
Објектот дополнително има и 4 платформи од по 200 квадратни метри, од кои четвртата е највисока и ќе биде достапна за туристите со пристап од 2 лифта. Се планира таа да прави 1 круг од 360 степени за еден час.
Инаку, на социјалните мрежи особено во текот на пандемијата со ковид-19 се ширеа теории на заговор, конспирации и дезинформации со кои се правеше обид да се внесе страв и несигурност кај населението, а кои се однесуваа на наводните негативни ефекти од 5Г мрежата врз граѓаните. Вистиномер повеќепати ги дебанкираше таквите дезинформации.
Поради сите горенаведени факти објавата што ја рецензираме ја оценуваме како невистина.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар