Не е точно дека со вакцината ќе ве чипуваат

Од 37 секунда во видеото, друг експерт исто така посочува дека чипови во вакцините нема.

Покрај тоа што вакцините се создадени од луѓе кои се во партнерства со академски институции, научници кои го посветиле животот на помагање на луѓето и немаат друг интерес освен тој, исто така има и надворешни тела кои проверуваат што има во вакцините. Во нив членуваат луѓе од заедницата, луѓе кои не работат во компаниите производители и кои повторно немаат интереси. Така што, има многу контролни механизми за да се осигураме дека нема микрочипови или било што опасно за јавноста, вели доктор Мати Хлатшвајо Дејвис, лекар за инфективни болести на Универзитетот Вашингтон, на факултетот за медицина (37 секунда од видеото).

На следниот линк, на официјалната веб страница за вакцинација во Македонија, поставени се упатствата за користење на вакцините во кои што го има и составот на секоја вакцина. Состојките на вакцините се позната и јавна информација и ниедна вакцина не содржи микрочип. Таквата теорија зема залет во конспирациските кругови, поради ангажманот на Бил Гејтс да финансира во вакциналните напори на светско ниво поврзани со ковид 19.

Џејмс Тејбери, професор по филозофија на Универзитетот Јута кој пишува за конспирациските теории, за американската телевизија Еј Би Си, вели:

Тие инвестираа милиони во вакциналните заложби да го подобрат здравјето на луѓето. Бил и Мелинда Гејтс се многу вложени во вакциналните заложби. Тие им доделија грантови на истражувачите за да може тие истражувачи да пронајдат подобар начин да следат колку луѓе се вакцинирани во одредено подрачје, притоа мислејќи најнапред на земјите кои се неразвиени, односно немаат електронски системи односно електронска инфраструктура за да го прават тоа. Значи, како ќе следите кој се вакцинирал, кога немате ни електронска инфраструктура да го правите тоа?”, изјави Тејбери.

Објаснувајќи го психолошкиот ефект на конспирациските теории, тој вели дека тие можат да создадат илузија дека во еден хаотичен свет, каде се случуваат многу чудни, непредвидливи, ужасни работи, како цунами и пандемии кои убиваат милиони луѓе – да изгледа помалку хаотичен.

Целата драма со наводни микрочипови, преку кои, наводно, населението ќе биде следено, нема врска со реалноста. Што, всушност, се случува? Компанијата АпиЏект од САД, размислува за „опционален микрочип“, ама тој ќе биде на етикетата од шприцот и нема да се инјектира при имунизацијата. Важно е да се каже дека овој микрочип е засега наменет само за САД, а не за Македонија, а неговата намена, како што за Ројтерс потврдил портпаролот на фирмата, Стив Хофман, е следната:

1. Да му овозможи на здравствениот работник да верификува дека вакцината и шприцот не се со истечен рок и не се фалсификат.
2. Да потврди дека вакцината во шприцот е искористена.

Здравствениот работник би користел апликација на мобилниот телефон за да ја види оваа информација или да ја внесе во системот. Сето тоа ќе се прави без никакво навлегување во личните податоци за пациентот. Информациите во оваа апликација ќе се однесуваат само на дозите и на шприцевите односно на вакцината, а не на човекот.

Како што може да се види од следниот линк, оваа технологија е сосема опционална и американската влада уште нема ни одлучено дали сака да ја користи или не! Фирмата АпиЏект не ги произведува вакцините, туку само ги полни во своите шприцови, за да бидат достапни за користење. Чипот нема да собира лични податоци ниту податоци за тоа кој ја примил дозата, туку ќе му овозможи на здравствениот работник да знае кога дозата е со истечен рок и дали е фалсификат. Оттука, како невистинита ја оценуваме информацијата изнесена во постот кој го рецензираме, дека со вакцинацијата ќе ве чипуваат.

Вакцината не содржи чип ниту пак со неа на било каков начин може да се следат вашите активности.