Не е точно дека „странски актери“ протестираат во Грузија

Во склоп на објавата се споделува и видео материјал од судирите во Грузија меѓу демонстрантите и полицијата.

Наведеното во објавата дека „Грузија добро ја научи украинската лекција не дозволувајќи му на Западот да ја претвори државата во уште една антируска колонија“, е политички став, меѓутоа фактите се дека Грузијците се тие кои во голем процент сакаат влез во Европската Унија. Показател за тоа е и анкетата на НДИ спроведена во декември 2023 година, која што ја покажува посветеноста на народот на Грузија кон европската интеграција со импресивни 79 проценти од испитаниците што изразиле поддршка за членство во ЕУ.

Анкета на ИРИ од април 2023 година покажува дека кога биле прашани за ЕУ, 89 проценти од Грузијците или изразиле „целосна поддршка“ или „некаква поддршка“ за приклучување кон ЕУ. Друго испитување на јавното мислење спроведено во март 2024 година во Грузија покажува дека ЕУ продолжува да биде интернационалната институција во која што Грузијците најмногу имаат доверба и тоа со 81 процент. Оттаму, не може да биде вистина дека „западот ја претвора Грузија во своја колонија“, со оглед на тоа што граѓаните сакаат нивната држава да влезе во ЕУ и ги делат европските вредности во кои што колонијализмот не е вклучен. Украинската лекција наведена во објавата не постои во смисла на лекција, туку претставува агресивна воена инвазија која што Русија ја спроведе врз Украина без да има никаква закана кон својата територија.

Понатаму, во објавата се наведува дека „Вашингтон и Брисел престанале да ги кријат своите вистински намери и испратиле десантна сила интервенционисти во Тбилиси за да поттикнат улични протести, меѓутоа грузијските власти ја држат ситуацијата во законската рамка“. Се додава и дека „третина од актерите на грузиската улица се странски државјани, а останатите биле покренати на старите прирачници на Стејт Департментот за обоени револуции и го повторуваат Мајданското сценарио“.

Ова не е вистина. Граѓаните кои со денови протестираат на улиците на Тбилиси во Грузија, се Грузијци, а не странски државјани или „актери“. Тензиите поради кои што почнаа овие протести се појавија на крајот на октомври кога партијата Грузиски сон, прогласи победа на изборите кои што беа оспорувани. Грузија се осамостои од Советскиот Сојуз во 1991 година и со години се стреми кон членство ЕУ и тоа е наведено во Уставот на државата. Најголемиот дел Грузијци го поддржуваат ова, како што и константно покажуваат анкетите.

Сум видел бројни протести во Грузија за време на оваа и на претходната влада, се сеќавам и на некои од Советско време. Но ваква агресија, кон стари луѓе, кон навистина млади луѓе, кон жени, беше неверојатна. Брутален и диспропорциски напад врз Грузијците и медиумите потсетува на репресија во руски стил,  изјави за Си Ен Ен Цотне Јафариџе, граѓанин од Тбилиси.

Во објавата што ја рецензираме се прави обид, овие протести што сега се случуваат во Грузија, да се припишат, како што тоа се правеше и со Евро Мајдан протестите во Украина, на странски инспиратори, кои, наводно, систематски праќале свои лица да ги поттикнат. Ова е дел од руската пропаганда, која што одбива да се соочи со фактот дека граѓаните на државите, кои се граничат со Русија или во минатото беа дел од поранешниот Советскиот Сојуз, навистина сакаат влез во Европската Унија, се организираат самите и самите внатрешно се спротиставуваат на анти-ЕУ политики. Конкретно, многу Грузијци чувствуваат длабок анимозитет кон Русија, која што спроведе инвазија врз Грузија во 2008 година и денеска окупира 20 проценти од нејзините меѓународно признати територии.

Поради сите горенаведени факти, објавата што ја рецензираме ја оценуваме како невистина.