Не е точно дека Заев и Мицкоски биле „инсталирани“ за премиери од Евреите

Тврдењата дека некакви „ционистички“ или еврејски групи тајно контролираат или поставуваат лидери на Балканот се без основа и претставуваат антисемитска теорија на заговор без никакви докази. Такви приказни често се појавуваат на интернет или во медиуми со сомнителна репутација, но не се поткрепени со никакви проверливи факти. Владите во Северна Македонија се формираат врз основа на домашни политички процеси, коалициски договори и меѓународна дипломатија (особено со ЕУ, НАТО и соседните држави)

Рецензираме објава на социјалната мрежа Фејсбук во која пишува:

Гледајте торковци кој е на сликава. Цело време ви кажува дедо Гоце кој го инсталира црпнатиот манијак од Муртино а вие се правите при очи слепи. П.С. Ако го чекате хидромицкоЛањар да го затвори ќе се изначекате зашто и тој е слуга на евреи ционисти. П.П.С. А вие народе што ги гласате слугите на чедата на сатаната ќе го колнете денот кога сте се родиле страшна ќе биде вашата казна на судот Божји.

Не е точно наведеното во објавата дека Зоран Заев и Христијан Мицкоски кој е погрдно и навредливо наведен во објавата што ја рецензираме биле „инсталирани од Евреи ционисти“. Премиерот Христијан Мицкоски беше избран на демократски избори коишто се одвиваат во Република Северна Македонија, според однапред утврдени правила и со примена на закони, вклучително и со надворешни набљудувачи. На изборите во двата наврати се покажа волјата на граѓаните а кандидатите беа внатрешно-кандидирани без надворешни влијанија.

Фотографијата од Зоран Заев која е споделена во објавата е од неговата посета на Западниот ѕид во Ерусалим, познат и како Ѕид на плачот или на романизиран хебрејски мазик HaKotel HaMa’aravi. Toa е свето место во Ерусалим и едно од најважните религиозни места во јудаизмот. Евреите го сметаат за најсветото место достапно за молитва, бидејќи се наоѓа најблиску до Светињата над светињите, внатрешното светилиште на храмот, кое се наоѓало погоре на Храмовната Гора и не е достапно според сегашните религиозни правила.

Луѓе од целиот свет доаѓаат да се молат, да оставаат писмени молитви во пукнатините меѓу камењата и да одржуваат церемонии како Бар мицва и Бат мицва. Над ѕидот се наоѓа Храмовата Гора, која е свето место и за муслиманите, бидејќи таму се наоѓаат џамијата Ал Акса и Куполата на карпата. Ова го прави местото едно од најчувствителните религиски и политички локации во светот.

Посетата на Заев на оваа локација била на 17 јуни 2020 година.

Премиерот на Македонија Зоран Заев го посети Западниот ѕид заедно со министри и членови на владата од неговата земја. Тој беше пречекан од рабинот Шмуел Рабиновиц кој се молеше со него пред светите камења. „Се молам за успех на луѓето од мојата држава“, рече премиерот и напиша свои молитви во книгата на посетители, пишува на страницата на фондацијата.

Зоран Заев стана претседател на Владата преку низа политички и општествени настани што се случија помеѓу 2015 и 2017 година, по една голема политичка криза. Пред него, земјата речиси една деценија ја водеше Никола Груевски и неговата десничарска партија ВМРО–ДПМНЕ, кои беа обвинети за корупција и авторитарно владеење.

Во 2015 година, Заев јавно објави аудиоснимки (познати како „бомби“) кои наводно покажуваа дека владини функционери – меѓу кои и Груевски – се вмешани во корупција, изборни измами и нелегално прислушкување на илјадници граѓани.

Овие откритија предизвикаа масовни протести и длабока политичка криза. Парламентарните избори се одржаа во декември 2016 година. ВМРО–ДПМНЕ освои малку повеќе пратеници од СДСМ, но не успеа да формира коалиција, бидејќи албанските партии одбија да соработуваат со нив. Заев и СДСМ тогаш формираа коалиција со албанските партии, со што обезбедија парламентарно мнозинство.

Претседателот Ѓорге Иванов првично одби да му го даде мандатот на Заев за состав на влада, тврдејќи дека коалицискиот договор со албанските партии ја загрозува државата. Ова предизвика немири и насилен упад во Собранието на 27 април 2017 година, кога толпа националисти физички нападнаа пратеници. По силен домашен и меѓународен притисок (особено од ЕУ и НАТО), Иванов попушти и му го довери мандатот на Заев. На 31 мај 2017 година, Зоран Заев беше официјално избран за претседател на Владата на Република Македонија.

На ниеден начин посетата на Заев на Западниот ѕид не е „доказ“ дека тој бил инсталиран од ционисти, исто како што тоа не може да се тврди ни за актуелниот премиер Христијан Мицкоски.

Тврдењата дека некакви „ционистички“ или еврејски групи тајно контролираат или поставуваат лидери на Балканот се без основа и претставуваат антисемитска теорија на заговор без никакви докази. Такви приказни често се појавуваат на интернет или во медиуми со сомнителна репутација, но не се поткрепени со никакви проверливи факти. Владите во Северна Македонија се формираат врз основа на домашни политички процеси, коалициски договори и меѓународна дипломатија (особено со ЕУ, НАТО и соседните држави).

Поради сите горенаведени факти објавата што ја рецензираме ја оценуваме како невистина.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар