Не е вистина дека Зеленски повикал на капитулација – лиферувано и избришано „дип фејк“ видео

На ТВ Украина 24 беше објавено видео, во кое наводно, претседателот Володомир Зеленски повикува на демилитаризација и најавува капитулација на државата. Видето е лажно, а тоа го потврдија неколку релевантни извори, меѓу кои и ТВ Украина 24, а и самиот претседател Зеленски. Според телевизијата, станува збор за хакерски напад

 

 

Телевизијата Украина 24 беше мета на хакерски напад со цел ширење руска поропаганда. На 16 март на споменатата телевизија беше објавено видео, во кое наводно, претседателот на Украина, Володомир Зеленски повикува на демилитаризација, поточно да се разоружаат војската и населението. Исто така, во лажното видео беше посочено дека Зеленски најавува капитулација на државата.

Видето беше лажно, а истото го потврдија неколку релевантни извори, меѓу кои и ТВ Украина 24, а и самиот претседател Володомир Зеленски кој демантираше преку видео снимка.

Во лажното видео, кое подоцна беше избришано, наводно Зеленски изјавува:

Како прв обид сакав да го вратам Донбас, но тоа не успеа. Беше само полошо. Многу полошо. Повеќе од јасно е дека нема иднина  барем нема за мене. Одлучив да се збогувам од вас. Апелирам до сите да го положите оружјето и да се вратите на вашите семејства.

Од ТВ Украина 24 веднаш се огласија, тврдејќи дека станува збор за хакерски напад.

Ова е лага, пријатели, постојано предупредуваме за ова. Никој нема да се откаже. Особено во услови кога армијата на Руската Федерација трпи порази во битките со украинската армија“, напишаа од ТВ Украина 24 на „Телеграм“.

Според телевизијата, станува збор за лажно видео, направено од руски хакери.

По објавувањето на видеото, преку нова снимка се обрати и украинскиот преседател Зеленски. Тој го оквалификува лажното видео како провокација на Руската Федерација.

И од Службата за безбедносни протоколи на „Мета“- во чија сопственост се социјалните мрежи Инстаграм и Фејсбук, потврдија дека се работи за лажно „дип фејк“ видео кое брзо се рашило на социјалните мрежи.

Раководителот за безбедносна политика во Мета, Натниел Глејшер, на Твитер објави дека лажното видео е избришано, а најверојатно било направено со помош на т.н. „дип фејк“ технологија, нешто што доколку биде потврдено, ќе биде првиот таков инцидент од почетокот на воените дејствија во Украина.

Видеото се појави на компромитирана мрежна станица и се прошири низ Интернет, објави на Твитер Натаниел Глејшер.

По лажното видео со Зеленски, се појави и ново „дип фејк“ видео на рускиот претседател Владимир Путин кој наводно најавува капитулација на Русија.

Поради потврдата од повеќе релевантни фактори, институции и самиот претседател на Украина, Володомир Зеленски, заклучуваме дека станува збор за лажна вест и лажно видео, со цел да се манипулира јавноста.

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар