Не постојат глобалисти чијашто цел е населението да се намали на 500 милиони
Кога статистиката покажува дека населението расте, а не се намалува – тоа ја поткопува тезата дека некој работи на намалување на човештвото.
Лесно е да се создадат тврдења без силна поддршка од податоци – оние кои би сакале да веруваат дека постои „таен план“ можат да ги користат бројките на погрешен начин или да ги толкуваат селективно. Истовремено, има реални и комплексни глобални прашања, како растот на населението во одредени области, притисокот врз ресурсите, климатските промени, нееднаквоста, но тие не се доказ за заговор како што често се прикажува. Тие се јавни, транспарентни теми. Кога статистиката покажува дека населението расте, а не се намалува, тоа ја поткопува тезата дека некој работи на намалување на човештвото
Анализираме објава на социјалната мрежа Фејсбук која вели:
Целта на глобалистите е да бидеме 500 милиони , затоа се купени сите влади министерства школство медицина све што не ви е јасно овдека?
Идејата дека „глобалистите“ имаат цел да го намалат светското население на 500 милиони и дека владите, образованието и медицината се „купени“ – е теорија на заговор, а не поткрепен факт.
Нема докази, односно ниту еден доверлив извор (научен, новинарски или официјален) не покажал дека постои глобален план за масовно намалување на населението.
Често оваа бројка (500 милиони) се поврзува со таканаречените Georgia Guidestones, споменик подигнат во САД во 1980-тите со натписи за „одржување на човештвото под 500 милиони во рамнотежа со природата“. Но тоа била изјава на поединец, не официјален документ или план.
Глобалните институции не се монолитни. Владите, научните организации и медицинските системи имаат различни интереси и политики. Идејата дека сите се „купени“ од некаква единствена сила е нереална во пракса.
Ваквите тврдења често се шират на социјални мрежи без проверка, со цел да создадат недоверба кон науката и институциите. Секако, постојат реални глобални проблеми – како контрола на ресурси, климатски промени, економска нееднаквост – но тие се јавни и сложени, а не тајна завера.
Светското население расте, не се намалува, што е уште еден доказ дека не постојат никакви глобалисти кои ја намалуваат популацијата. Во моментов (2025) има повеќе од 8 милијарди луѓе на планетата. Според Обединетите Нации, до 2050 година бројот ќе се зголеми на околу 9,7 милијарди. Според United Nations Department of Economic and Social Affairs (UN DESA), население во светот во 2024 година изнесувало околу 8,2 милијарди луѓе. Проекциите покажуваат дека населението ќе продолжи да расте уште неколку децении и ќе достигне можен врв од околу 10,3 милијарди во средината на 2080-тите.
Тоа значи дека тврдењето „целта на глобалистите е да бидеме само 500 милиони“ не одговара на реалноста – населението не се намалува драстично, напротив, сè уште расте, иако побавно.
Растот на населението бил најбрз во вториот дел на 20-ти век, но од тогаш годишната стапка на раст значително опаднала.
Причини за успорување на растот се неколку: пад на фертилитетот (просечен број на деца по жена), подобрување на образованието, здравството, пристапот до контрацепција.
Лесно е да се создадат тврдења без силна поддршка од податоци – оние кои би сакале да веруваат дека постои „таен план“ можат да ги користат бројките на погрешен начин или да ги толкуваат селективно. Истовремено, има реални и комплексни глобални прашања, како растот на населението во одредени области, притисокот врз ресурсите, климатските промени, нееднаквоста, но тие не се доказ за заговор како што се често прикажува. Тие се јавни, транспарентни теми. Кога статистиката покажува дека населението расте, а не се намалува – тоа ја поткопува тезата дека некој работи на намалување на човештвото.
Теоријата на заговор за некакви си сатанисти, на некоја длабока држава и за некаков план за депопулација е добро позната теорија за која Вистиномер има пишувано во повеќе наврати и истата е производ на движењето Кју Анон. Според оваа теорија, една мала недефинирана група на политичари раководат со светот и му мислат лошо на мноштвото од населението, заговараат депопулација, се бават со педофилија.
Во контекст на ова е и теоријата на заговор за „златната милијарда“ за која Вистиномер исто така има пишувано. Според неа, некоја светската елита сака да ги приграби ресурсите и богатството само за себе, а останатите жители на планетата да бидат препуштени на сиромаштија и глад.
Оваа заговорничка теорија е често застапувана во говорите на рускиот претседател Владимир Путин, но и од други високи функционери на Кремљ, како линија за напад на Западот додека се одвива војната во Украина.
Од сето погоре можеме да заклучиме дека објавата што ја анализираме е невистина.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар