Недовршена реконструкцијата на ОУ „Ванчо Прке“ – Штип
Проект: Реконструкција во ОУ „Ванчо Прке“
Целта ни е обезбедување просторни услови за одвивање на квалитетна настава во училиштето. Со реконструкцијата ќе бидат опфатени покривот, прозорците, вратите, подовите, ѕидовите/фасадата и греењето. (Извори на финансирање: Буџет на РМ, Рок: 2015 година)
ОБРАЗЛОЖЕНИЕ
Во изборната програма со која што ја побара довербата на граѓаните на општина Штип на локалните избори во 2013 година, на 20. страница Илчо Захариев вети реконструкција на основното училиште „Ванчо Прке“, кое се наоѓа во поширокиот центар на Штип. Според утврденото, ова ветување на Захариев, кој на изборите победи и стана градоначалник на општина Штип, е делумно исполнето.
Првото споменување на реконструкцијата на ООУ „Ванчо Прке“ во Штип е од 19 август 2014 година, кога телевизијата Ирис известува дека завршила реконструкцијата.
Во Штип заврши реконструкцијата на основното училиште Ванчо Прќе, сега се очекува да стартува и замената на прозорците и вратите во основното училиште Тошо Арсов.
Што точно значи од планираната реконструкција е извршено дознаваме од отчетот на градоначалникот на општина Штип, Илчо Захариев, за периодот 2013 – 2015 година. Во него, на 340 страница, читаме дека е направена
Замена на под и врати во ООУ „Ванчо Прке“
Во Отчетот на ВМРО-ДПМНЕ презентиран на 20 март годинава, на стр. 311 читаме дека е извршена реконструкција на покривот, заменети се прозорци, врати и подови во ОУ „Ванчо Прке“ во Штип.
На средба со ученици од други две основни училишта од Штип, на 28 декември 2015 година, градоначалникот Захариев нагласува дека извршена реконструкција на ОУ Ванчо Прке, но допрва треба да се реконструира фасадата.
Го реконструиравме училиштето „Ванчо Прќе”, но таму претстои проект со Република Бугарија, каде што комплетно треба да направиме нова фасада, која ќе биде максимално енергетски ефикасна за да децата имаат навистина одлични услови во училиштето, рече Захариев.
Бидејќи прелистувањето на делот Настани на веб-сајтот на Општина Штип не откри информација дека е направена реконструкција на фасадата на училиштето, а рокот наведен во ветувањето во изборната програма на Илчо Захариев, односно 2015 година е зад нас, според методологијата на Вистиномер, ветувањето за реконструкција на ОУ „Ванчо Прке“ е делумно исполнето.
ИЗВОРИ
- Изборна програма на ВМРО-ДПМНЕ за локални избори 2013-2017 – Илчо Захариев (стр. 20) [Пристапено: 18.08.2016]
- (19.08.2014) Телевизија Ирис – Училиштата се подготвуват за старт на учебната година [Пристапено: 18.08.2016]
- Отчет на градоначалникот на Штип за периодот 2013 – 2015 (стр. 340) [Пристапено: 18.08.2016]
- (20.03.2016) Отчет на ВМРО-ДПМНЕ: „Отчетно – Проекти, мерки и дела за граѓаните и државата“ (стр. 311) [Пристапено: 18.08.2016]
- (28.12.2015) Телевизија Ирис – Ученици од две штипски училишта во посета на штипскиот градоначалник [Пристапено: 18.08.2016]
- Веб-сајт на Општина Штип – Настани [Пристапено: 18.08.2016]
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
