Нема докази дека дата-центрите се „објекти за масовен надзор“

Tврдењата дека дата-центрите се „објекти за масовен надзор“, дека 99% од населението ќе биде ставено во „дигитален затвор“ и дека тоа ќе се случи до 2030 година не се поткрепени со официјалните документи и политики

 

Анализираме објава на Фејсбук која вели:

ПРЕСТАНЕТЕ ДА ГИ НАРЕКУВАТЕ „ЦЕНТРИ ЗА ПОДАТОЦИ“, ТИЕ СЕ ОБЈЕКТИ ЗА МАСОВЕН НАДЗОР КОИ ЌЕ НАТЕРААТ 99% ОД НАС ВО ДИГИТАЛЕН ЗАТВОР ДО 2030 ГОДИНА АКО НЕ НАПРАВИМЕ НИШТО.

Тврдењето дека дата-центрите се „објекти за масовен надзор“ и дека 99 отсто од граѓаните ќе бидат ставени во „дигитален затвор“ до 2030 година не е поткрепено со достапни официјални документи. Дата-центар по дефиниција е инфраструктура за сместување и обработка на податоци и информациски системи. Самото постоење или изградба на дата-центар не значи дека тој е наменет за масовно следење на граѓаните. Европската комисија, на пример, дигиталната инфраструктура ја опишува како дел од пошироката дигитална трансформација, со цели поврзани со инфраструктура, дигитални услуги, вештини и бизнис.

Во официјалните цели на ЕУ за 2030 година се зборува за дигитализација на јавните услуги, дигитални вештини, инфраструктура и пристап до дигитална идентификација, но не постои цел според која 99 проценти од населението треба да биде ставено под надзор или да биде принудено да користи единствен дигитален систем, како што тоа го тврди објавата. Напротив, Европската комисија наведува дека целта е до 2030 година граѓаните да имаат пристап до дигитална идентификација, а дигиталниот идентитет е претставен како алатка за пристап до услуги и за контролирано споделување податоци.

Важно е, сепак, да се разликува ризикот од злоупотреба на дигиталните технологии од тврдењето дека таквата злоупотреба е однапред утврдена цел. Собирањето и обработката на големи количества лични податоци навистина отвора прашања за приватност, профилирање, безбедност и надзор. Токму затоа македонскиот Закон за заштита на личните податоци предвидува права како пристап, исправка, бришење, ограничување на обработката, преносливост и приговор, како и посебни обврски при високоризична обработка.

И македонската Агенција за заштита на личните податоци експлицитно препознава дека профилирањето, автоматското носење одлуки и обработката на податоци може да создадат ризици за правата и слободите на граѓаните. Тоа значи дека постои реална тема за јавна дебата: како државата ќе ги користи дигиталните системи, кои податоци ќе се собираат, кој ќе има пристап и какви механизми за контрола ќе постојат. Но, од ова не следи дека секој дата-центар претставува објект за масовен надзор.

Годината 2030 навистина се појавува во европските дигитални политики, но како рок за исполнување на конкретни цели во дигитализацијата. Европската „Digital Decade 2030“ опфаќа четири главни области — дигитални вештини, дигитална инфраструктура, дигитализација на бизнисите и дигитални јавни услуги. Самата временска рамка 2030, според тоа, не е доказ за план за воспоставување „дигитален затвор“.

Исто така, дигиталната идентификација не е исто што и масовен надзор. Европската комисија предвидува дигитален паричник преку кој корисниците ќе можат да се идентификуваат и да споделуваат конкретни податоци, при што официјалниот опис нагласува контрола на корисникот врз тоа кои податоци ги споделува. Тоа не значи дека не постојат ризици или дека системите не треба да бидат контролирани, но тврдењето дека самата дигитална идентификација автоматски претставува „затвор“ не произлегува од официјалната регулаторна рамка.

Значи, тврдењата дека дата-центрите се „објекти за масовен надзор“, дека 99% од населението ќе биде ставено во „дигитален затвор“ и дека тоа ќе се случи до 2030 година не се поткрепени со официјалните документи и политики што ги проверивме.

Поради сето ова, објавата ја оценуваме како невистинита.

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар