Нема докази дека ковид вакцините предизвикале илјадници смртни случаи во Македонија

Тврдењето дека притисокот за вакцинација во Северна Македонија довел до „илјадници смртни случаи како последица од вакцините“ е неточно и непоткрепено со достапните научни докази. Ковид-вакцините не биле пуштени во употреба без научна и регулаторна проценка. Нивната безбедност била и останала предмет на континуирано следење од страна на националните и меѓународните регулаторни тела

 

Анализираме објава на социјалната мрежа Фејсбук која вели:

Вршењето на притисок за вакцинација во државниот и приватниот сектор , како и врз постарите сограѓани – без научно потврдени докази дека вакцините против ковид19 се сигурни и не се штетни за здравјето на граѓаните – доведоа до илјадници смртни случаи во Македонија како последица од вакцините.

Единствениот кој ја форсираше оваа доктрина на е бившиот министер за здравство и фронталното членство на Сдс.

Бараме правда !!! Монструмите и масовните убијци треба да лежат затвор !!!

Не е првпат на социјалните мрежи да се шири теорија на заговор дека пандемијата на ковид-19 била лажна, дека вакцините против ковид биле експериментални и непроверени и дека предизвикале илјадници смртни случаи и јавно да се линчуваат и докторите кои јавно апелираа да се спроведува ковид имунизацијата и општо задолжителната вакцинација. Овие доктори се жигосуваат дека се „убијци во бели мантили“, „платеници на фармакомафијата“ и дека „ќе им се суди за геноцид“.

Тврдењето дека вакцините против ковид-19 предизвикале илјадници смртни случаи во Северна Македонија – не е поткрепен со научни или официјални податоци. Не е точно и дека вакцините против ковид не биле научно проверени.

Вистиномер веќе пишуваше дека вакцината на „Фајзер“ има трајно одобрение за употреба, коешто важи неограничено време, односно засекогаш. Добивањето на таквото одобрение за употреба не ги поколеба антивакциналните кругови да продолжат да се расфрлаат со термините ,,експериментална” вакцина за да му наштетат на процесот на имунизација.

Од август 2021 година, вакцината на „Фајзер“ повеќе нема дозвола за употреба во итна состојба, како што имаше дотогаш, туку стана првата вакцина во светот, која доби целосна дозвола за употреба од Американската агенција за храна и лекови.

Вакцината на „Фајзер“ е целосно одобрена за користење кај повозрасни од 16 години. Американската агенција за храна и лекови во својот извештај за трајното одобрение што го доби Фајзер, вклучи податоци од испитувања врз 44 илјади луѓе. Според овој извештај, вакцината наречена „комирнати“ е 91 процент ефективна во превенција на болеста ковид-19.

Комесарот на Американската агенција за храна и лекови, Џенет Вудкок, рече дека јавноста може да е исклучително сигурна дека вакцината ги исполнува највисоките стандарди на безбедност, ефективност и високи стандарди во начинот на нејзиното производство.

И кога имаше дозвола само за итна употреба, вакцината на „Фајзер“ не беше неиспитана! Напротив, дозволата за итна употреба беше издадена врз основа на клинички тестирања, кои покажаа дека е 94 проценти ефикасна кај повозрасните од 56 години, 95 проценти ефективна кај луѓето со барем еден коморбидитет, кој ги прави поподложни да развијат тешка клиничка слика од ковид-19 и е 96 проценти ефективна кај лица со висока телесна тежина, состојба што прави да се поподложни на последиците од ковид-19. А, документот кој го покажува тоа погледнете го на овој линк.

Тестирање на вакцините

Во првата фаза, вакцината на „Фајзер“ беше дадена кај мал број здрави луѓе и постепено се зголемуваше дозата за да се осигури дека е добро толерирана. Првата фаза определи колкава треба да е идеалната доза. Втората фаза од клиничките студии на фајзеровата вакцина вклучи повеќе волонтери со различни здравствени состојби, не само тие што се целосно здрави. Во оваа фаза резултатите од вакцината беа споредени со резултатите од плацебото.

Не се појавија проблеми, па клиничкото тестирање премина на фаза три. Илјадници волонтери, случајно избрани, во оваа фаза примија или вакцина или плацебо. Оваа фаза им помогна на истражувачите на Фајзер да го измерат ефектот на вакцината.

Дополнително, за да добие дозвола за употреба во итна состојба, вакцината мора да биде тестирана кај над 3 илјади испитаници и барем половината од нив да се следат повеќе од 2 месеци после втората доза. 

ЕМА (Европска агенција за лекови) ги има одобрено вакцините на „Модерна“, „АстраЗенека“ и „Џенсен“, како што може да се види од официјалната страница на ЕМА.

Светската здравствена организација објаснува дека вакцините пред употреба минуваат низ повеќе фази на клинички испитувања, а нивната безбедност продолжува да се следи и по пуштањето во употреба. Тоа е објаснето во официјалниот материјал на СЗО за безбедноста на вакцините.

За ковид-вакцините конкретно, СЗО наведува дека одобрените вакцини биле внимателно тестирани и дека нивната безбедност продолжува да се следи.

Европската агенција за лекови (EMA), исто така, врши континуирано следење на безбедноста на вакцините против ковид-19. Според EMA, достапните податоци од стотици милиони вакцинирани лица покажуваат дека вакцините одобрени во ЕУ имаат „многу уверлив“ безбедносен профил, при што сериозните несакани реакции се многу ретки.

Оттука, може да се расправа за тоа дали конкретни мерки за вакцинација биле оправдани, пропорционални или законски, но не може да се тврди дека вакцините биле употребувани без претходна научна и регулаторна проценка.

Пријавена смрт по вакцинација не значи смрт предизвикана од вакцина

Ова е клучната разлика која ја прескокнува објавата која ја анализираме.

СЗО јасно објаснува дека „несакан настан по имунизација“ (AEFI) е секој медицински настан што се случува по вакцинацијата и дека самото временско следење не докажува дека вакцината го предизвикала настанот. За тоа е потребна дополнителна медицинска и научна проценка.

Истото го нагласува и Европската агенција за лекови. EMA наведува дека кога некој ќе има медицински проблем или ќе почине по вакцинација, тоа автоматски не значи дека вакцината е причината. Можни се и други фактори, вклучително и основни заболувања, а причинската врска може да се процени само преку научна анализа.

Затоа, бројката на луѓе кои починале по вакцинација не може автоматски да се претвори во бројка на луѓе кои починале од вакцинацијата.

Регулаторните институции идентификуваа ретки сериозни несакани реакции поврзани со одредени ковид-вакцините. Тоа е една од причините зошто безбедноста продолжи да се следи и по нивното одобрување.

EMA наведува дека сериозните несакани ефекти се можни, но се многу ретки, и дека пријавите за смрт по вакцинација сами по себе не докажуваат причинска врска.

СЗО, исто така, наведува дека вакцините може да предизвикаат несакани реакции и дека сериозните реакции се исклучително ретки, поради што постојат системи за нивно континуирано следење.

Значи, неточно е да се каже дека вакцините биле целосно без ризик, но исто така е неточно да се каже дека секоја смрт што се случила по вакцинација била предизвикана од вакцината.

Клучното тврдење за „илјадници смртни случаи“ нема научна основа

Најсериозниот дел од објавата е тврдењето дека во Македонија вакцините предизвикале илјадници смртни случаи.

За да се потврди такво тврдење, не е доволно да се соберат пријави за смрт по вакцинација. Потребно е да се утврди причинско-последична врска преку медицинска документација, обдукции каде што се релевантни, анализи на ризик-фактори, временска поврзаност, очекувана стапка на смртност и епидемиолошки студии.

EMA токму затоа предупредува дека податоците за пријавени несакани реакции не треба да се толкуваат како докази дека вакцината ги предизвикала сите пријавени настани.

На европско ниво, до декември 2023 година биле дадени околу 1 милијарда дози во земјите на ЕУ/ЕЕА, при што биле регистрирани околу 12.000 спонтани пријави со смртен исход. Но EMA изречно нагласува дека овие пријави не значат дека вакцините ги предизвикале тие смртни случаи.

Овој принцип е важен и за Северна Македонија: ако некој починал по вакцинација, тоа е податок што може да биде предмет на фармаковигиланца и медицинска истрага, но не е автоматски доказ дека починал поради вакцината.

Друг важен факт е дека вакцинацијата била воведена со цел да се намалат тешките форми на ковид-19 и смртните исходи од инфекцијата.

СЗО денес наведува дека реалните податоци од употребата на вакцините покажуваат дека ковид-вакцините се ефикасни во намалување на тешката болест и смртта од ковид-19.

Тоа не значи дека вакциниран човек не можел да се зарази, да биде хоспитализиран или да почине од ковид-19. Вакцините не обезбедуваа апсолутна заштита. Но статистичкиот ефект врз ризикот од тешка болест и смрт е различно прашање од тврдењето дека вакцините предизвикале „илјадници смртни случаи“.

Вакцините против ковид не се поврзани со смртни случаи, откри една обемна американска студија. Истражувачите ги разгледаа „несаканите настани“ од речиси 300 милиони дози на вакцини дадени во САД помеѓу декември 2020 година и јуни 2021 година.

Резултатите од студијата се објавени во медицинското списание Лансет:

Од податоците на ВАЕРС, ЦДЦ прими повеќе од 340.000 извештаи за несакани настани по вакцинацијата, при што 92 отсто се регистрирани како благи. Најчести несакани ефекти биле главоболки, замор и треска. Од повеќе од 22.000 настани евидентирани како сериозни, најчест е отежнато дишење.

Што е со „илјадниците смртни случаи“ во Македонија

Во објавата не се наведува ниту еден конкретен официјален регистар, научна студија, обдукциски извештај или епидемиолошка анализа со која би се докажало дека вакцините предизвикале илјадници смртни случаи во Северна Македонија.

Без таков доказ, бројката „илјадници“ претставува непоткрепено тврдење, а не утврден факт.

Дополнително, Европската агенција за лекови во својот актуелен преглед наведува дека нема докази за зголемување на смртноста поврзано со вакцинацијата против ковид-19 во која било возрасна група.

Тврдењето дека притисокот за вакцинација во Северна Македонија довел до „илјадници смртни случаи како последица од вакцините“ е неточно и непоткрепено со достапните научни докази.
Ковид-вакцините не биле пуштени во употреба без научна и регулаторна проценка. Нивната безбедност била и останала предмет на континуирано следење од страна на националните и меѓународните регулаторни тела.

Вакцините имаат одредени ризици, но биле регистрирани ретки сериозни несакани реакции. Клучната разлика е следната: „починал по вакцинација“ не значи дека „починал од вакцинацијата“. За второто е потребен доказ за причинско-последична врска.

Таков доказ за илјадници смртни случаи во Северна Македонија не е презентиран во тврдењето, ниту е поткрепен со релевантните официјални извори на СЗО и EMA.

Оттука, повикот од авторите на објавата одредени политичари да бидат нарекувани „масовни убијци“ не произлегува од докажаната медицинска каузалност, туку претставува политички став и сериозна квалификација за која би биле потребни дополнителни конкретни докази.

Поради сето ова, објавата која ја анализираме, ја оценуваме како невистина.

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар