Нема графен оксид во вакцините против ковид

Фото: commons.wikimedia.org

Не е вистина дека вакцините против ковид содржат состојка графен оксид. Овој материјал не е наведен во составот на ниту една вакцина, самата компанија „Фајзер“ го негира неговото присуство во вакцината, а истражувањето посочено како извор во постот, е некредибилно и од него се дистанцира универзитетот Алмериа во Шпанија. Оваа дезинформација е побиена повеќепати досега, но сепак таа и натаму се шири на интернет просторот

Не е вистина дека вакцините против ковид содржат состојка графен оксид. Овој материјал не е наведен во составот на ниту една вакцина, самата компанија „Фајзер“ го негира неговото присуство во вакцината, а истражувањето посочено како извор во постот, е некредибилно и од него се дистанцира универзитетот Алмериа во Шпанија. Оваа дезинформација е побиена повеќепати досега, но сепак таа и натаму се шири на интернет просторот

 

 

Рецензираме пост на Фејсбук во којшто се тврди дека шпански доктори откриле графен оксид во вакцините против ковид. Во постот не се наведува ниту на кои доктори се мисли, ниту на кои вакцини се однесува тврдењето.

Митот дека студија објавена на Универзитетот Алмериа во Шпанија покажала дека вакцината на „Фајзер“ е 99 проценти графен оксид, веќе неколку месеци се провлекува во дигиталниот простор. Иако повеќепати оваа информација е побиена, сепак лагата тешко изумира на интернет просторот.

Графен оксид е материјал кој настанува со оксидација на графен. Графен е единечен слој на графит (меката супстанца која ја има во врвот од моливите за пишување). Графен оксидот има потенцијална употреба во електрониката, оптиката, хемијата, складирањето енергија и биологијата,  е објаснето во напис  објавен во журналот „Фронтиерс оф Физикс“ во јануари 2019 година,

  • „Асошиејтед прес“ во јули годинава извести дека и покрај тоа што имало истражувања за тоа дали се користел графен оксид во некои вакцини (во количества кои за човекот не би биле токсични), материјалот не е на листата на состојки на фајзеровата вакцина или која било друга вакцина.

    Не е на листата на состојки и нема никакви шанси да е присутен, изјави Ален Мајерсон, професор по хемиски инженеринг на Институтот за технологија Масачусетс.

    Портпаролката на „Фајзер“,  Џерика Питс за „Политифакт“ во јули годинава изјави дека компанијата не користела графен оксид во нивната вакцина.

    Според напис од јули 2021 од „Лид Сторис“ потеклото на тврдењето дека во вакцината има графен оксид, е од анализа што под микроскоп ја спровел Пабло Кампра. Кампра е професор по хемиски науки на Универзитетот Алмериа во Шпанија. „Лид Сторис“ тогаш извести, дека со студијата која не е прегледана од медицинската заедница, поврзан бил и Ричард Делегадо, самоопишан борец против ,,тиранијата на ковид 19″. Делегадо го води шпанскиот сајт „Ла Квинта Колумна“.

    Во твит од 2 јуни, Универзитетот Алмериа, негираше дека ги поддржува сознанијата до кои дошол Кампра, посочувајќи дека студијата е ,,неофицијален извештај од примерок за којшто не е познато каков е, односно од каде потекнува”. Со други зборови, не се знае што точно под микроскоп испитувал Кампра.

    Кит Лонгли, менаџер за наука во „Фајзер,“ за „Асошиејтед прес“ изјавил дека оваа состојка во нивната вакцина не постои.

     

    Доктор Амеш Адаџа специјалист за инфективни болести од „Џонс Хопкинс“, тврди дека имало истражувања за потенцијалното користење на графен оксидот во други вакцини, но количините не биле во доволно големи дози за да предизвикаат токсичен ефект.

    Експертот за вакцини, Пол Офит, од детската болница во Филаделфија, додал дека ова тврдење (дека вакцините содржат графен оксид) е чиста глупост.

    И на официјалната веб-страница за вакцинација во земјава, каде се наведени состојките на сите вакцини кои се администрираат во Северна Македонија, се геледа дека во нивниот состав нема графен оксид.

    Документот, односно истражувањето, не дава убедливи научни докази дека овластените вакцини против ковид-19 содржат графен, или графен оксид, како што е наведено во текстот што го анализираме. Авторот на извештајот споредува фотографии добиени од електронска микроскопија. Едната од нив е од примерок од графен оксид, а другата од течност што, според документот, може да биде вакцината на „Фајзер-Бионтек“, иако потеклото и фактот од каде доаѓа производот не се познати.

    Како што може да се прочита на неговите страници, станува збор за „привремен извештај“ чија цел е „микроскопска идентификација на деривати на графен“ во наводен примерок од вакцината „Фајзер-Бионтек“. За да го направите ова, сликите на примерокот, добиени преку техниката на електронска микроскопија, се споредуваат со сликите на „намален графен оксид“ земени од научната литература.

    Како што е наведено во публикацијата, фотографиите претставуваат „голема сличност“ едни со други. Затоа, од оваа споредба, се заклучува дека „микроскопската студија на примерокот обезбедува солиден доказ за веројатно присуство на деривати на графен“.

    Сепак, авторот признава дека „микроскопијата не дава убедливи докази“ и дека „анализите во овој извештај се за еден ограничен примерок“.

    Оттука, оценуваме дека не е вистина оти вакцините против ковид содржат состојка графен оксид. Состојката не е наведена во составот на ниту една вакцина, самата компанија „Фајзер“ го негира нејзиното присуство на графен оксид во вакцината, а истражувањето посочено како извор во постот, е некредибилно и од него се дистанцира универзитетот Алмериа.

     

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Оставете реакција