Нема каузалност меѓу примањето на ковид вакцината и падот на наталитетот

Од Екипа на Вистиномер On Jul 15, 2025 0

Вакцини против ковид-19 на АстраЗенека Фото: Whispyhistory, CC BY-SA 4.0, via Wikimedia Commons

Тоа што вакцинираните жени против ковид имале „драматичен пад на наталитетот“ не покажува каузална врска со вакцинацијата. Можно е тој пад на наталитетот да е поврзан со други нивни медицински причини, економски причини, социјални причини, или пак, тоа што не се обидуваат да имаат дете

Тоа што вакцинираните жени против ковид имале „драматичен пад на наталитетот“ не покажува каузална врска со вакцинацијата. Можно е тој пад на наталитетот да е поврзан со други нивни медицински причини, економски причини, социјални причини, или пак, тоа што не се обидуваат да имаат дете

Рецензираме објава на социјалната мрежа Фејсбук во која пишува:

Европа во неволја: Драматичен пад на стапките на наталитет кај жените вакцинирани против Ковид. Официјалните податоци од Европа предизвикуваат сериозна загриженост – раѓањата на бебиња се во нагло опаѓање, но само кај жените кои примиле „вакцини“ со мРНК против Ковид…

Она на коешто се фокусира објавата е неодамнешна студија од Чешка, којашто го поставува прашањето – дали жените кои се вакцинирани против ковид имаат помали шанси да забременат? Истражувачите позади студијата анализирале податоци од повеќе од 1 милион жени на возраст од 18 до 39 години. Тие ги споредувале стапките на успешни забременувања (бремености кои резултирале со живородени бебиња) меѓу оние жени што биле вакцинирани пред зачнувањето. Резултатите покажаа нешто неочекувано. Почнувајќи во средината на 2021 година, стапките на зачнување биле пониски кај жените што примиле ковид вакцина пред зачнувањето. Ова може да звучи алармантно. Но, пред да се избрзува со заклучоци како што тоа го направија некои антивакцинални движења, есенцијално е да се испитаат методологијата на студијата и нејзините ограничувања.

Истражувачите користеа национални податоци, што е голема силна страна. Наместо да се потпираат на мали групи волонтери, тие имаа досег до информации за речиси секоја жена во државата. Друга силна страна е тоа што мерени се јасни и едноставни исходи – живородени бебиња.

Но, еве ја замката – студијата не ги следи жени како индивидуи и не им поставува лични прашања за нивното здравје, дали се обидувале да забременат или за нивната медицинска историја. Наспроти тоа, студијата ги гледа групите на луѓе базирано на нивниот вакцинален статус и исход на раѓање. Ова е студија што научниците ја нарекуваат „еколошка“ студија, и може да ја покаже големата слика, но не може да покаже причина и последица!

Има неколку можни објаснувања зошто вакцинираните жени имале пониска стапка на раѓање. На пример, жените кои планирале да останат бремени, можеби одлучиле да ја одложат вакцинацијата или да ја прескокнат. Од друга страна, можеби некои жени се вакцинирале и потоа решиле да чекаат пред да забременат. Студијата не собира вакви лични информации, така што не знаеме кои индивидуални причини или здравствени медицински причини придонеле кон исходот. Друг фактор е што пандемијата со ковид-19 и стресот од пандемијата, пореметија голем дел од животите на луѓето. Некои можеби одложиле да имаат деца поради нестабилност со работните места, здравствени грижи или загуба на осигурувањето. Ако вакцинираните жени имаа поголеми шанси да работат во образование или здравство, можеби го одложиле забременувањето повеќе отколку другите, не поради вакцината, туку поради животните околности.

Самите истражувачи во студијата се внимателни да потенцираат дека нивните сознанија не докажуваат штета. Тие ги опишуваат резултатите како такви што „генерираат хипотеза“, што значи дека отвораат прашања за следни истражувања, но не обезбедуваат цврсти одговори.

Други студии особено оние што ги следат индивидуалните случаи подолго време, не покажуваат поврзаност меѓу вакцините против ковид-19 и намалена плодност. Всушност, многу професионални организации како Американскиот колеџ на гинеколози и акушерки продолжува да ја поддржува вакцинацијата за време на репродуктивните години и за време на бременоста. Овие препораки се базирани на зголемено ниво на докази од висококвалитетни студии кои водат сметка за личните здравствени фактори и времето на зачнувањето.

Така што конкретната студија за Чешка, сугерира дека се потребни подетални испитувања, дека следењето на националните трендови е корисно, но недоволно. И потсетува колку е важно да се поставуваат вистинските прашања кога се работи за здравјето, особено за нешто толку сензитивно и лично како плодноста.

Универзитетот за медицински науки „Браун“ специјализиран за гинекологија и акушерство, исто така, продолжува да ја поддржува вакцинацијата против ковид за време на бременоста.

Доказите покажуваат дека вакцината е безбедна и ефикасна во бременоста и дека бенефитите од вакцинација против ковид-19, далекусежно ги надминуваат потенцијалните ризици од вакцинација за време на бременоста. Бремените жени имаат исти несакани ефекти како и генералната популација што се вакцинира против ковид-19. Една студија најде дека бремените имаат наклонетост кон тоа да развиваат полокализирани реакции, како болка во раката и местото на боцкањето. Исто така, се забележува и мало покачување на телесната температура. Факт е дека доколку мајката има температура после вакцинацијата тоа не е штетно ниту за бебето, ниту за бременоста и може да се третира со ацетаминофен за да се намали температурата, пишува на сајтот на Универзитетот „Браун“.

Поради сите горенаведени факти објавата што ја рецензираме ја оценуваме како објава во која се пропушта контекстот. Тоа што вакцинираните жени против ковид имале „драматичен пад на наталитетот“ не покажува каузална врска со вакцинацијата. Можно е тој пад на наталитетот да е поврзан со други нивни медицински причини, економски причини, социјални причини, или пак, тоа што не се обидуваат да имаат дете.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар