Невистини за ЕУ, НАТО и Американската амбасада во пресрет на 8 Септември

Да, НАТО е алијанса на западните земји. Да, со исклучок на секуларна муслиманска Турција, НАТО е претежно алијанса на христијански земји. Секој декември НАТО во Брисел е осветлен со голема божиќна елка. Но, вредностите за кои се залага НАТО не се уникатно христијански. Вредностите што ги промовираме и браниме со нашиот ангажман се универзални. Правото на жените да одат во училиште е универзално право. Правото да ја изберете религијата во која ќе верувата и да не треба да се плашите од смртна казна поради изборот, е универзално право. Правото да ја изберете вашата демократска влада на слободни и фер избори е универзално право. Овие се вредностите што ги браниме од Балканот до Авганистан. За нив нема преговори. Но тие не се уникатно западни и не се уникатно христијански. Навистина верувам дека земјите од сите делови на светот и од сите поголеми вери, треба да се способни да се согласат за нив. Тие се вистинската основа за човековиот опстанок во 21 век, вели тој меѓу другото во говорот.

Според конвенцијата за заштита на правата на децата, во 34 точка се наведува тоа дека владите мора да ги заштитуваат децата од сексуална експлоатација и сексуална злоупотреба, вклучително и од луѓе кои ги принудуваат децата да имаат секс за пари, или ги фотографираат на неприкладен начин или ги снимаат. Детската порнографија се казнува и е кривично дело во цела Европа. Не постои ниту приближна иницијатива во ЕУ да се легализира педофилијата која се смета за кривично дело. Директивата за борба против сексуалната злоупотреба и сексуалната експлоатација на децата и против детска порнографија, е само еден документ кој ја претставува непоколебливата борба на ЕУ против криминалот со педофилијата.

На 27 март 2020 година, Северна Македонија стана триесетта земја членка на Алијансата. Определбата за евроатлантско интегрирање на земјата датира уште од 1993 година, кога Собранието усвои Резолуција во која се дефинирани надворешно политичките приоритети на земјата, а тоа се членството во НАТО и во ЕУ. Пристапот кон НАТО не е окупација, бидејќи НАТО сојузниците и членките на ЕУ ги делат истите вредности. НАТО и ЕУ играат комплементарна, кохерентна и меѓусебно зајакнувачка улога во поддршката на меѓународниот мир и безбедност. С. Македонија целосно го поддржува унапредувањето на стратешкото партнерство НАТО-ЕУ, зајакнатите политички консултации и зголемената соработка за прашања од заеднички интерес, како што се воената мобилност, отпорноста, влијанието на климатските промени врз безбедноста, новите и нарушувачки технологии, човековата безбедност, агендата за жени, мир и безбедност, како и борба против сајбер и хибридни закани.

 

Со тврдењето „Македонија има газдарица транвеститка од Кале“, јасно е дека се користи навредлив говор од најдолен вид кон Американската амбасада и се дезинформира дека амбасадата, односно во поширока смисла самите САД се газди на македонските домашни процеси, што е далеку од вистината. Амбасадата на САД досега во дезинформациски наративи беше обвинувана и за тоа дека наводно учествувала во внатрешни кривично-правни настани, без никаква основа и сосема клеветнички. Амбасадите не се мешаат во внатрешните прашања на земјите во кои се наоѓаат туку се задолжени за своите матични држави кои ги испраќаат во мисии. САД постојано инвестираат во подобрување на здравството, администрацијата, образованието и други сегменти во земјава, но тоа не е окупација туку стратешка соработка за унапредување.

Поради сите горенаведени факти објавата што ја рецензираме ја оценуваме како невистина.