Ни трага ни глас од најавените пет базени на Јакимовски

Фото: Колаж од официјална Фејсбук страна на Стевчо Јакимовски и Artem Verbo од Unsplash

За време на кампањата на последните локални избори градоначалникот на Општина Карпош, Стевчо Јакимовски вети изградба на базени во склоп на пет основни училишта низ општината. Три години подоцна, нема ниту план за изградбата на базените во основните училишта: ООУ „Петар Поп Арсов“, ОУ „Војдан Чернодрински“,  ОУ „Владо Тасевски“, ООУ „Димо Хаџи Димов“, како и ОУ „Аврам Писевски“

За време на кампањата на последните локални избори градоначалникот на Општина Карпош, Стевчо Јакимовски вети изградба на базени во склоп на пет основни училишта низ општината. Три години подоцна, нема ниту план за изградбата на базените во основните училишта: ООУ „Петар Поп Арсов“, ОУ „Војдан Чернодрински“,  ОУ „Владо Тасевски“, ООУ „Димо Хаџи Димов“, како и ОУ „Аврам Писевски“ 

 

Ветување: Спорт и рекреација: Базени за пливање во неколку основни училишта (стр. 7)

Изградба на затворен пливачки базен во ООУ „Петар Поп Арсов“ (стр. 14)

Затворен пливачки базен во ОУ „Војдан Чернодрински“ (стр. 16)

Затворен пливачки базен во ОУ „Владо Тасевски“ (стр. 24)

Изградба на затворен базен во ООУ „Димо Хаџи Димов“ (стр. 30)

Изградба на затворен пливачки базен за деца во ОУ „Аврам Писевски“ (стр. 34).

[Извор: Програма на Стевчо ЈакимовскиМоќен сојуз. Јас и Вие!“; датум – 13.10.2021]

 

Образложение

„Таткото“ на Општина Карпош, Стевчо Јакимовски, во својата предизборна програма: „Моќен сојуз. Јас и Вие!“ вети дека ќе изгради пет затворени пливачки базени во склоп на пет основни училишта низ  општината – ООУ „Петар Поп Арсов“, ОУ „Војдан Чернодрински“,  ОУ „Владо Тасевски“, ООУ „Димо Хаџи Димов“, како и ОУ „Аврам Писевски“. Со оглед на тоа што досега (26.11.2024) не е најавено започнување на изградбата на ниту еден од базените, ова ветување го оценуваме како неисполнето.

Откако Јакимовски повторно победи на локалните избори во 2021 година и стана по четврти пат градоначалник на општината, не може да се најде ниту една вест или објава во која се најавува започнувањето на изградбата на базените. Таква информација нема ниту на прелистувачот Гугл (тука, тука, тука, тука и тука).

Сакајќи да потврдиме дали се започнати некакви активности околу изградбата на базените во петте општински училишта, телефонски се обративме до сите пет основни училишта. Од сите училишта одбија да ни одговорат дали во нивното училиште е започната изградбата на базените, дали е планирано да се гради ваков објект и дали воопшто се дискутирало за ова прашање?

Неофицијално дознавме дека во изминатите 3 години ниту еднаш не било споменато такво нешто, а камо ли да биде започната изградбата.

Вистиномер на терен, при посета на споменатите училиштата се увери дека таму нема изградено нови или некакви доградени објекти во кои би можело да се сместат затворени пливачки базени.

Дополнително, при теренската посета на училиштата разговаравме со родители чии деца ги посетуваат училиштата, како и жители од населбите во кои се сместени училиштата. Сите ни потврдија, дури некои и со потсмев, дека базени нема. 

Се обративме и во самата Општина да ги прашаме до каде е реализацијата на ветениот проект, односно планот за изградба на базените. Но, до објавување на текстот, оттаму сè уште немаме добиено одговор. 

Според сето изнесено погоре, можеме да заклучиме дека предизборното ветување на градоначалникот Стевчо Јакимовски за изградба на пет базени во пет општински основни училишта, досега (26.11.2024) не е исполнето.

 

Извори:

 

Оцени: Матеј Тројачанец

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Оставете реакција