Објава тенденциозно и преку лажни тврдења сака погрешно да ги претстави вредностите на ЕУ

Очигледно е дека станува збор за тенденциозна медиумска објава која има за цел да се омаловажи и дискредитира Мишел, а со тоа и вредностите на Европската Унија како заедница, да предизвика лавина негативни коментари со што се врши манипулација со јавноста. Главните вредности и темели на Европската Унија (ЕУ) се утврдени во Договорот за Европската Унија, особено во член 2 и тие немаат никаква врска со она што објавата го споделува

Анализираме објава на социјалната мрежа Фејсбук која вели:

Вредностите на Европа.

Објавата споделува и две фотографии. На едната е прикажан поранешниот претседател на Европскиот совет Шарл Мишел, а на другата е прикажан маж облечен во сукња и потпетици и за истиот се тврди дека е Мишел. Двете фотографии се поврзани со текстот: „Ова е тој што ги советуваше денес“.

Нашата проверка покажа дека мажот во сукња не е Шарл Мишел.

Вистината е дека фотографијата е направена на 1 јули 2021 година, за време на модната недела наменета за мажи Пити Уомо во Фиренца и прикажува еден од учесниците на настанот. Заедно со другите слики, таа беше споделена на Фејсбук страницата на Пити Уомо со наслов: „Во живо од Pitti Uomo 100“. Сликата не го открива идентитетот на прикажаното лице.

Може да се забележи дека фотографијата која е споделена на Фејсбук објавата што е предмет на оваа рецензија, е со многу послаб квалитет од оригиналната. Ова е намерно направено за да се добие впечаток на фотографијата е Шарл Мишел, а всушност на оригиналната фотографија која е со добар квалитет повеќе од очигледно е дека не станува збор за претседателот на Европскиот совет.

Освен тоа, формата на брадата, како и бојата на косата на Шарл Мишел и личноста прикажана на сликата се различни.

Ваква слична дезинформација била објавена и во јули 2021 година на Фејсбук профилот „Единство за Грузија“ при што била дебанкирана од „Myth detector“.

Очигледно е дека станува збор за тенденциозна медиумска објава чија цел е да се омаловажи и дискредитира Мишел, а со тоа и вредностите на Европската Унија како заедница, да предизвика лавина негативни коментари со што се врши манипулација со јавноста.

Главните вредности и темели на Европската Унија (ЕУ) се утврдени во Договорот за Европската Унија, особено во член 2.

ЕУ се темели на:

– Почитување на човековото достоинство – секој човек има вродено достоинство и права.
– Слобода – слобода на мислење, изразување, движење, вероисповед и избор.
– Демократија – граѓаните учествуваат во изборот на своите претставници и во демократските процеси.
– Еднаквост – сите граѓани се еднакви пред законот и имаат еднакви можности.
– Владеење на правото – законите важат еднакво за сите, а институциите работат во согласност со правото.
– Почитување на човековите права – вклучувајќи ги правата на припадниците на малцинствата.

Поради сето ова, објавата која ја анализираме, ја оценуваме како невистина.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар