Охрид не доби современ зелен пазар – темелите допрва ќе се удираат

Од Тео Блажевски On Apr 20, 2017 0

Охрид, трети април 2017, покриен пазар сè уште нема. Фото ФБ страница на ЈП Градски пазар - Охрид

Проект: Изградба на затворен современ зелен пазар на местото на досегашниот

Опис: Конечно, ќе го надминеме проблемот со несоодветните услови на градскиот пазар, кој не прилега на Охрид како туристички центар. Новоизградениот пазар ќе ги исполнува сите хигиенско-технички услови и ќе овозможува продажба на безбедни земјоделски производи и храна. (Средства: 50.000.000,00 денари Извори на финансирање: Буџет на Општината Рок 2013-2016)

ОБРАЗЛОЖЕНИЕ:

Ова ветување е наведено во програмата на партијата ВМРО-ДПМНЕ и на тогашниот кандидат, а сегашен градоначалник Никола Бакрачески за локалните избори во 2013 година (стр.36) и досега (20.04.2017) не е исполнето.

Зелениот пазар во Охрид е доста фреквентно место особено во летниот период, кога градот е дополнително полн со гости од земјата и странство и затоа тогашниот кандидат за градоначалник не случајно го има понудено како иден проект, доколку биде избран. Во ветувањето е даден и рок за завршување, а тој е крајот на 2016 година.

„Вистиномер“ на почетокот на 2016 направи проверка на ветувањето и тогаш е оценето дека проектот е во тек. Оценката е дадена врз основа на тоа што некои активности биле започнати, пред сè тендерска постапка на која бил избран партнерот за реализација преку јавно-приватно партнерство во 2015 г. и постапката за издавање градежна дозвола за активностите за изградба во 2016 година. Иако, сè уште актуелниот градоначалник, тогаш изразил уверување дека изградбата ќе започне уште во мај-јуни лани (2016), тоа не се случило.

Сегашната проверка потврди дека граѓаните не добија современ покриен зелен пазар во дадениот рок, од 2013 до крајот на 2016 година. Дури на почетокот на април (03.04.2017 г), била извршена дислокација на тезгите од сегашниот зелен пазар, а на 18 април, е започнат ископот на асфалтот, за да може да се ископа дупка за подземната гаража и да се удрат темелите на идниот пазар. Ова се потврдува и од самото јавно претпријатие, кое овие информации ги пласира и на својата фан страна на Фејсбук.

Оттука, иако веќе има започанато и градежни активности (на 18.04.2017), оценуваме дека ветувањето е неисполнето, бидејќи, ем е надминат рокот, но и уште поважно, мандатот на градоначалникот на Охрид е пред самиот крај, односно треба да заврши наредниот месец – мај 2017.

ИЗВОРИ:

(2013) Изборна Програма на ВМРО ДПМНЕ – Општина ОХРИД 2013-2017 – Никола Бакрачески – [Проверено на 20.04.2017]
(31.05. 016) Вистиномер – Охриѓани уште го чекаат новиот затворен пазар – [Проверено на 20.04.2017]
(18.04.2017) Охридденес – Се расчистува теренот за изградба на новиот „Градски Пазар“– [Проверено на 20.04.2017]
(03.03.2017) ЈП Градски пазар Охрид\ФБ – Зелениот пазар од денес, на нова привремена локација – на паркингот на ЈП Градски Пазар! – [Проверено на 20.04.2017]

Оцени: Тео Блажевски

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy) и Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States), иницијатива која поддржува демократија, добро владеење и евро-атлантски интеграции во Југо-источна Европа. Содржината на рецензијата е одговорност на авторот и не ги одразува ставовите на Метаморфозис, National Endowment for Democracy, The Balkan Trust for Democracy, проект на Германскиот Маршалов фонд на САД, или нивните партнери.