Парламентот донесе Закон за стечајните работници
РЕШЕНИЕ НА ПРОБЛЕМОТ НА СТЕЧАЈЦИТЕ
Во првите 180 дена од мандатот, ќе го донесеме законот за материјално обезбедување на невработени лица поради приватизација на претпријатија со општествена и државна сопственост. Законот ќе ги опфаќа работниците:
на кои им престанал работниот однос по основ на стечај, ликвидација или технолошки вишок поради приватизација на претпријатија со општествена и државна сопстевност;
кои ќе имаат најмалку 15 години стаж и старост од 52 години за жени и 55 години за мажи во моментот на стапување на сила на законот;
на кои работниот однос им престанал со добивање на решение од стечаен управник, решение од АВРМ како невработено лице и технолошки вишок со решение од работодавач заклучно 31.12.2013 година.
Сите тие ќе можат да добијат паричен надоместок во износ од 30% од просечно исплатена месечна нето плата во претходната година (околу 6600 денари).
ОБРАЗЛОЖЕНИЕ:
На 19 септември 2017 година пратениците во Собранието го изгласаа Законот за материјалното обесштетување на стечајните работници. Ова е исполнето ветување на социјалдемократите дадено во нивната изборна програма: „План за живот во Македонија“(стр.52) со која излегоа на предвремените парламентарни избори во декември 2016 година.
Медиумите ја пренесоа информацијата дека ова законско решение кое се однесува на стечајните работници, е донесено едногласно со 82 гласа „за“, без ниту еден против и воздржан.
По гласањето ,следуваше аплауз во салата од страна на пратениците од парламентарното мнозинство. Претходно, тие побараа поддршка од опозицијата тврдејќи дека законот не е популистички, туку исправање грешка од минатото нанесена на група граѓани. Пратениците на ВМРО-ДПМНЕ го поддржаа законот, иако имаа забелешки дека стечајците со него не се во целост опфатени.
Како што беше соопштено
Со овој закон, се овозможува околу 3.000 лица да добиваат месечен надомест од по 8.356 денари, односно 34 проценти од просечно исплатената месечна нето-плата минатата година. Годишно за таа намена од буџетот на Агенцијата за вработување ќе бидат обезбедени 300.816.000 денари.
Невработените лица опфатени со законот треба да имаат најмалку 15 години стаж во претпријатија со доминантна сопственост на државата, а таму работниот однос да им престанал врз основа на стечај, ликвидација или технолошки вишок, заклучно со 30 јуни годинава.
На денот на стапување на сила на законот, тие треба да се на возраст од најмалку 52 години, за жени, односно 55 години за мажи.
Предлог – законот за материјално обезбедување на невработени лица поради приватизација на претпријатија со доминантна сопственост на државата, во јавноста познат како ,,Закон за стечајци”, Владата го усвои на седницата на 31 јули, по што беше пуштен во собраниска процедура.
ИЗВОРИ:
- Изборна програма на СДСМ: План за живот во Македонија (стр.52) [Пристапено: 26.09.2017]
- Тајм.мк ( 19.09.2017): Шeесетина стечајци од Емо ќе бидат материјално обезбедени со новиот Закон за стечајци [Пристапено: 26.09.2017]
- Мета (19.09.2019): Собранието го донесе законот за стечајни работници [Пристапено: 26.09.2017]
- Точка (19.09.2017): Собранието едногласно го донесе Законот за стечајните работници [Пристапено: 26.09.2017]
- Тајм.мк (01.08.2017): 3000 стечајци ќе добиваат по 120 евра месечно според предлог-законот усвоен од Владата [Пристапено: 26.09.2017]
- Академик (01.08.2017): МТСП: Усвоен е предлог-законот за стечајци со кој 3.000 лица ќе бидат материјално обезбедени [Пристапено: 26.09.2017]
Оцени: Оливера Војновска
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар