Погрешна споредба меѓу Арктикот и Антарктикот во контекст на глобалното затоплување

Тврдењето дека „Арктикот се топи, а Антарктикот не, затоа глобалното затоплување не е точно“ е погрешно и манипулативно. Податоците јасно покажуваат дека Арктикот губи морски мраз со децении. Антарктикот има сложена и варијабилна динамика, со неодамнешни знаци на намалување. Двата пола реагираат различно поради географски и климатски разлики, но и двата се дел од поширок глобален тренд на затоплување. Затоа, селективното користење на еден регион за да се негира глобален процес претставува погрешна интерпретација на научните податоци

 

Анализираме објава на социјалната мрежа Фејсбук која вели:

И, ако е глобално затоплување, како мразот на Северниит пол се топи, а на јужниот не?!

Или планетава е рерна каде горните грејачи работат а долните се расипани.

Тврдењето дека „глобалното затоплување не е реално“, бидејќи, наводно, мразот на Северниот Пол (Арктик) се топи, додека на Јужниот Пол (Антарктик) не се топи, е манипулативно. Арктикот (Северниот Пол) и Антарктикот (Јужниот Пол) се различни системи, и нивниот морски мраз не реагира исто на климатските промени. Но, тоа не значи дека глобалното затоплување не постои или дека не делува на двата пола.

Сателитските мерења јасно покажуваат дека Арктикот губи морски мраз со децении. Според НАСА, морскиот мраз на Арктикот има „значаен надолен тренд“ од почетокот на мерењата во 1979 година.

Дополнително, Националната управа за океани и атмосфера на САД НОАА наведува дека летниот минимум на арктичкиот мраз се намалува за околу 13% по деценија.

Ова претставува еден од најјасните и најследени климатски индикатори за глобалното затоплување.

За разлика од Арктикот, Антарктикот покажува покомплексно однесување. Долги години, дел од податоците за морскиот мраз покажуваа стабилност или дури благ пораст, што често се користи во дезинформациски наративи.

Сепак, американскиот Национален центар за податоци за снег и мраз, NSIDC, објаснува дека Антарктичкиот морски мраз има висока природна варијабилност и дека краткорочните трендови не ја отсликуваат целата слика.

Во последните години, пак, се регистрираат и рекордно ниски вредности на морски мраз околу Антарктикот, што укажува на промена на досегашната варијабилност.

Ова значи дека Антарктикот не е „имун“ на затоплување, туку реагира поинаку поради специфични географски и океанографски услови. Клучната грешка во тврдењето е претпоставката дека Арктикот и Антарктикот се „симетрични системи“.

Научните податоци покажуваат дека тие се фундаментално различни: Арктикот е океан опкружен со копно, што овозможува побрзо загревање и губење на мраз. Антарктикот е континент опкружен со океан, каде што силни ветрови, океански струи и слоеви на студена вода значително влијаат на динамиката на мразот.

НАСА истакнува дека поради овие разлики, Антарктикот има посложен и помалку директен одговор на глобалното затоплување.

Аргументот дека „само Северниот Пол се топи“ го игнорира поширокиот климатски контекст:

• Глобалните температури растат на сите континенти.
• Се намалува масата на големите ледени плочи (особено Гренланд и делови од Антарктикот).
• Океаните апсорбираат поголем дел од вишокот топлина.

Според Climate.gov, вкупниот глобален биланс на мраз покажува намалување, и покрај регионалните разлики.

Тврдењето дека „Арктикот се топи, а Антарктикот не, затоа глобалното затоплување не е точно“ е погрешно и манипулативно. Податоците јасно покажуваат дека Арктикот губи морски мраз со децении. Антарктикот има сложена и варијабилна динамика, со неодамнешни знаци на намалување. Двата пола реагираат различно поради географски и климатски разлики, но и двата се дел од поширок глобален тренд на затоплување. Затоа, селективното користење на еден регион за да се негира глобален процес претставува погрешна интерпретација на научните податоци.

Поради сето ова, објавата ја оценуваме како невистинита.

 

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар