Пропаганда: Српски актери прикажани како воени херои во војната во Украина

Од Љубомир Костовски 0
Фото: Принтскрин колаж

Користењето на српски и југословенски дела наменети за големиот и мал екран е една од пошокантите пропагандни трикови во паралелната битка за Украина. Темата ја отвора „Би-Би-Си“, ја пренесуваат српски медиуми, а потоа и домашните медиуми

Користењето на српски и југословенски дела наменети за големиот и мал екран е една од пошокантите пропагандни трикови во паралелната битка за Украина. Темата ја отвора „Би-би-си“, ја пренесуваат српски медиуми, а потоа и домашните медиуми

 

Пишува: Љубомир Костовски

 

Како што јавува наш извор на вести, на пропагандата во војната што се води во Украина навистина ѝ нема крај. Се работи за очевидно користење на секвенци од филмови и ТВ-серии за да се претстават „храбрите борци“ во разни акциони ситуации, а во два случаја и „злите руски офицери“, кои наводно уживаат во горењето украински села додека пијат пиво!

Објавата на следната фотографија (твитот е во меѓувреме избришан) оди со легенда: „Руски окупаторски војници пијат пиво откако го запалиле селото. „Европската цивилизација исчезнува во пламен“. Всушност, се работи за секвенца од филмот „Убавите села, убаво горат“, а клучниот актер е никој друг, туку Драган Бјелогрлиќ.

Фото: Принтскрин

Овој филм воопшто не е обичен. Да потсетиме –  беше кандидат за „Оскар“ (1996) за најдобар филм од неанглиско говорно подрачје и се смета за едно од култните дела на српската кинематографија. Снимен е во 1996 година и говори за вистински настан од крвавите воени дејства во Босна (1992 г.). Филмот, пред сè, е со антивоена порака, а во конкретниот случај е злоупотребен за пропагандни цели.

Но, тоа не е сè. Во пропагандни цели е искористен и кадар од филмот „Небесна јадица“ со Никола Којо, кој стои пред отворен прозорец додека зад него стојат изрушени згради. Филмот, инаку, говори за бомбардирањето на Белград во 1999 година, а делото исто така беше кандидат за „Оскар“ (2000) во категорија на дела од неанглиско подрачје. Во пропагандните објави на „Твитер“, пак, Кољо е претставен  како херој од Украина, извесен генерал-водник Николај Којченко, кој „низ прозорец гледа во разурнатиот Киев“.

За пропаганда е искористен и ликот на актерот Ненад Окановиќ (кај нас познат од серијата  – „Селото гори, бабата се чешла“), кој е прикажан како херој на отпорот во Украина. На „Твитер“ е споделена фотографија од српскиот актер заедно со пораката:

Ова е војник од Украина, кој го урна мостот во Харков и херојски загина. Се вика Олексиј Степаненко Оканович

Веста за користените српски актери и дела, всушност е пренесена од „Би-би-си“ на српски, откако овој угледен извор налетал на твитот на поранешниот австриски народен пратеник Лео Колбауер, кој  напишал дека на прикажаната фотографија не е украински воен херој, туку српскиот актер Ненад Окановиќ.

Во групата имитирани српски „воени херои“ искористен е и српскиот актер Радош Бајиќ од серијата „Село гори, баба се чешла“ , кој е претставен како „Духот на Киев“ кој соборил дури 16 руски биорбени авиони!

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Слични артикли

Оставете реакција

Јазици MK SQ EN