Пропагандна објава против Украина зашто била „терористичка држава“

Не е точно наведеното во објавата дека Украина е „терористичка држава“. Украина е нападната држава од страна на Русија, која во февруари 2022 година, неиспровоцирано и без никаков напад или провокација, ја нападна територијата на суверена и демократска држава, која оттогаш е принудена да се брани. Нападот што го спроведе Русија врз Украина не е „специјална воена операција“, туку воена инвазија која прерасна во војна. Руската државна пропаганда примарно претставувана од претседателот Владимир Путин, постојано на почетокот на воената инвазија зборуваше за „специјална операција“, и покрај тоа што се работи за агресорска војна. Постојано Кремљ тврдеше дека „немало напад врз Украина“ .

Користејќи го тој еуфемизам „специјална операција“, тој создаде очекувања за акција што ќе биде ограничена во време и обем и нема да влијае на нормалниот живот на повеќето Руси. Тој, исто така, ги замолчи критиките за инвазијата и го направи кривично дело опишувањето на војната како војна со потпишување закони што предвидуваат долги затворски казни за „дискредитирање“ на вооружените сили или ширење „лажни информации“ за нив, пишува „Ројтерс“.

Следејќи го наративот на Кремљ, руските пропагандни медиуми ја покриваат инвазијата на Украина нарекувајќи ја „специјална воена операција“. Украинците се етикетираат како „бандеристи и неонацисти“ , додека териториите окупирани од руската армија се опишани како „ослободени територии“. Во почетната фаза од војната, руските медиуми често емитуваа коментари во кои цивилите им се заблагодаруваа на руските сили за нивното „ослободување“. Овие типови коментари беа искористени од Русија за да ја легитимираат својата инвазија на Украина.

Бидејќи едно од главните оправдувања на Путин за инвазијата на Украина беше таканаречената „денацификација на земјата“, руските извори ширеа разни манипулации за да ја поткрепат оваа нарација со „фактички докази“. На пример, циркулираше дигитално изменета верзија на извештај на Би-Би-Си , на која се гледа украински војник како носи нацистички ознаки. Меѓутоа, во автентичната верзија, војникот всушност го носи амблемот на Генералштабот на вооружените сили на Украина. Руската пропаганда, исто така, лажно го обвини поранешниот врховен командант на украинските вооружени сили, Валериј Залужни, дека носел нацистички симбол. Всушност, неговата нараквица содржеше скандинавски симбол , а не свастика. Дополнително, циркулираа дезинформации во кои се тврдеше дека ќерката на украинскиот претседател Володимир Зеленски , Олександра, избегала во Полска и го нарекла својот татко нацист и убиец на украинскиот народ. Пораките со ова тврдење вклучуваа фотографија од млада жена која плаче во автомобил. Сепак, жената на сликата не беше Олександра Зеленска, а снимката всушност е направена од видео објавено во 2017 година, посочуваат проверувачите на факти на „Мит Детектор“.

Баталјонот „Азов“ првично беше доброволна ултранационалистичка група основана во 2014 година, која учествуваше во војната во Донбас. Еден од нејзините основачи е Андриј Билецки, кој го напушти батаљонот откако Азов беше интегриран во вооружените сили на Украина.

 

Украина не е терористичка држава, бидејќи таа не го прекрши меѓународното право, туку стана жртва на неиспровоцирана воена инвазија, во обид на Русија да придобие нејзини територии. При ваквите напади загинаа бројни цивили, разрушена беше стратешката инфраструктура на Украина, на земјата ѝ беше прекинат вообичаениот тек, раст и развој при демократски избрана влада и раководство вклучително и претседател. Воената инвазија врз Украина, ја принуди државата да се брани, а западниот елемент кој е споменат во објавата што ја рецензираме се стави на страната на поддршката на правото на Украина да се брани. Тоа не ја прави Украина „слуга на западните интереси“ бидејќи западните држави немаше да има потреба да ја поддржуваат Украина во нејзиното право на самоодбрана доколку таа не беше првично нападната од Русија.

 

Според правото на ЕУ, терористичките кривични дела се дела извршени со цел сериозно заплашување на населението, прекумерно принудување на влада или меѓународна организација да изврши или да се воздржи од извршување на кое било дејствие, сериозно дестабилизирање или уништување на фундаменталните политички, уставни, економски или социјални структури на една земја или меѓународна организација. Украина нема направено ништо од горенаведеното.

На 1 јуни 2025 година Украина изврши успешна операција во која таргетираше  цели длабоко во Русија (операција „Пајажина“).  Украина соопшти дека над 40 бомбардери, или околу една третина од руската флота на стратешки бомбардери, биле оштетени или уништени во операцијата, иако Москва соопшти дека биле погодени само неколку авиони. Стратешките бомбардери на Русија се користеа за лансирање балистички и крстосувачки ракети од рускиот воздушен простор за да се погодат цели низ Украина, предизвикувајќи големи штети и цивилни жртви.

Поради сите горенаведени факти објавата што ја рецензираме ја оценуваме како невистина.