Просечната плата не достигна 30.000 денари
Гарантираме повисоки плати. Просечна плата до 30.000 денари. Во семејство со двајца вработени, тоа се 1.000 евра. Ќе има и за храна, и за сметки, и за одмор.
[Извор: Изборна програма на СДСМ (2016) „План за живот во Македонија“ (стр.3) , датум: декември 2016]
ОБРАЗЛОЖЕНИЕ:
СДСМ не го исполни ветувањето за просечна плата од 30.000 денари. Ова е првото од петте клучни ветувања кои ги дадоа социјалдемократите во „Планот за живот во Македонија“(стр.3), изборната програма со која ја бараа довербата од граѓаните во 2016 година.
Ова го ветуваше и лидерот на СДСМ, Зоран Заев од партиските митинзи на кои „гарантираше дека просечната плата ќе биде 500 евра“ , доколку СДСМ ја добие довребата на предвремените парламентарни избори.
Слушнте ме, држете ме за збор, просечната плата во Македонија ќе биде 30.000 денари (од 0,14 до ,20 минута од видеото) – порача Заев на 29.11.2016 година од митингот во Кавадарци.
Истата порака тој ја испрати и од митингот во Берово. А за тоа говореше и во периодот по изборите, кога на трибини и тркалезни маси ја презентираше програмата на идната влада предводена од СДСМ, притоа достигнувањето просечна плата од 30.000 денари го маркираше како приоритетна задача:
30 илјади денари просечна плата е еден од врвните приоритети во програмата на новата Влада на Република Македонија. Јас сум убеден дека таа цел е достижна и се надевам дека во текот на идниот мандат на владата ќе биде достижна, не за идниот премиер, идното владино мнозинство, да се фалат за тоа. Туку да се фалат граѓаните. Да го почувствува секој во своето семејство, како просечно примање од 30 илјади денари, во Република Македонија – изјави Заев на 10.03.2017 година.
Ветувањето за просечна плата од 30.000 денари беше дел и од Програмата за работа на Владата ( стр.4) предводена од СДСМ, избрана на 31 мај 2017 година.
Сепак, досега (07.07.2020) ова не се случи. Според последните податоци објавени од Заводот за статистика, висината на просечната плата по вработен е 25.830 денари.
Па, имајќи го предвид сето ова, клучното ветување на СДСМ за просечна плата од 30.000 денари го оценуваме како неисполнето.
ИЗВОРИ:
- Програма на СДСМ за парламентарни иабори 2016 година „План за живот во Македонија“, (стр.3) [Пристапено:07.07.2020]
- Веб-страница на Владата: Програма за работа на Влада(стр.4) [Пристапено: 07.07.2020]
- Веб-страница на Владата (01.06.2016): Избрана новата Влада на Република Македонија [Пристапено: 07.07.2020]
- А1 ОН (29.11.2016): Заев: Гарантирам, просечната плата ќе биде 30.000 денари, носам живот![Пристапено: 07.07.2020]
- ЈуТјуб (29.11.2016): Заев: Гарантирам, просечната плата ќе биде 30.000 денари, носам живот![Пристапено: 07.07.2020]
- А1 ОН (01.12.2016): (ВИДЕО) Заев: Ќе има просечна плата од 30.000 денари [Пристапено:07. 07.2020]
- Алсат М (10.03.2017): Заев: Просечна плата во висина од 30,000 денари е приоритет на новата влада [Пристапено:07.07.2020]
- Веб-страница на Државен завод за стстистика: Соопштение: Просечна месечна исплатена нето-плата по вработен [Пристапено:07.07.2020]
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар