Радмила Шекеринска: За време на ВМРО-ДПМНЕ долгот пораснал од 24,3% на 35,9% од БДП

Еве ги документите од Народна банка. И тие велат вака, кога премиерот кутар дошол на власт долгот во споредба со бруто домашниот производ не бил 38%, не бил ни 32% како што еднаш изјави Ставревски туку бил замислете 24,3 %. Знаете колку е голема таа лага?

Ако го пресметате бруто домашниот производ, а не е така тешко и го зголемите за проекција која владата си ја даде, еве ви ја математиката. Ќе се види дека во моментов и тој долг малку што се покажува без дополнителните обврски, патишта, фонд за здравство не исплатени обврски. Знаете колку изнесува? Веќе 36%. И сега погледнете со што се фали и какви лаги кажува премиерот на оваа држава. Погледнете како за само еден мандат долгот паднал од 43% на 24, а како во следните години вмроовска влада пораснал од 24 на 35,9%. И кај ќе ни биде крајот ако на ваков начин се лаже за долгот?

Образложение:

Според податоците од Државниот завод за статистика на Р. Македонија, во 2006 година, кога власта ја превзема партијата ВМРО-ДПМНЕ, државниот долг во споредба со БДП, изнесувал 32%. Долгот од 24,2% кој го споменува во својата изјава пратеничката Радмила Шекеринска, се однесува на 2007 година, кога на власт е партијата ВМРО-ДПМНЕ.

Што се однесува на вкупниот долг на централната влада на крајот од 2013 година, заклучно со месец декември 2013 година тој изнесува 34,3%.

Податоците од Државниот завод за статистика, покажуваат дека во 2002 година кога СДСМ доаѓа на власт, владиниот долг изнесувал 42,9 %, и истиот се намалил на 32%, во текот на владеењето на партијата СДСМ, односно пред почетокот на мандатот на ВМРО-ДПМНЕ.

Во текот на владеењето на ВМРО-ДПМНЕ, тој се зголемил на 34,3% како последен официјален податок за тоа колку изнесува долгот во 2013 година.

Од овие податоци може да се заклучи дека владиниот долг на Р. Македонија, бележи раст во периодот кога на власт е ВМРО-ДПМНЕ, споредено со долгот кога на власт е СДСМ, но не со толкава разлика како што е презентирано во изјавата.

Линкови:

• Плус инфо (29.01.2014): ВИДЕО Шекеринска: Долговите и лагите на Груевски одат заедно [Пристапено на: 10.03.2014]
• Министерство за финансии на Р. Македонија: Долг на Централна Влада (консолидиран) заклучно со 31.12.2013 година [Пристапено на: 10.03.2014]
• Утрински весник (02.01.2014): ЗА 11 МЕСЕЦИ ДОЛГОТ НА ДРЖАВАТА 183 МИЛИОНИ ЕВРА  [Пристапено на: 10.03.2014]
• Радио Слободна Европа (04.02.2014): Македонија со најголем државен долг во последните 8 години [Пристапено на: 10.03.2014]

Оценето од: Марија Теговска

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар