Реконструкцијата на булевартот „Метрополит Теодосиј Гологанов“, наместо 60 чинеше 92,6 милиони денари

Од Оливера Војновска 0
Со проширувањето оваа ссобраќајница доби четири коловозни ленти Фото: Принтскрин

Ќе се продолжи со реконструкција и со проширување на булеварот „Метрополит Теодосиј Гологанов“. ( Вредност на изведба: 60 мил. денари. Рок: 2013-2014 година)

ОБРАЗЛОЖЕНИЕ:

Реконструкцијата на третиот дел од булеварот „Митрополит Теодосиј Гологанов“,  е завршена во мај 2015 година, кога и официјално беше пуштен за сообраќај потегот од крстосницата со булеварот „8 Септември“ до улицата „Московска“.

Проектот: ДОИЗГРАДБА НА БУЛЕВАР „МИТРОПОЛИТ ТЕОДОСИЈ ГОЛОГАНОВ“, е исполнето ветување на градоначалникот на Скопје,  Коце Трајановски,  кое тој го даде  во Изборната програма ( во делот Урбанизам, булевари, мостови, стр. 56) со којашто излезе на локалните избори во 2013 година. Овој проект е реализиран пет месеци подоцна од крајниот рок (2014) и за него се потрошени многу повеќе пари (92,6 милиони денари) отколку предвидениот износ (60 милиони денари) во Изборната програма на Трајановски.

Во ноември 2013 година Трајановски најави дека проширувањето на булеварот „Митрополит Теодосиј Гологанов”, од крстосницата со булевар „8 Септември” до студентскиот дом „Гоце Делчев”, ќе стартува во 2014 година.

На 31 јануари 2014 година започна третата фаза од проширувањето и реконструкцијата на оваа сообраќајница, а тогашниот премиер, лидерот на ВМРО-ДПМНЕ Никола Груевски и градоначалникот  Трајановски, го означија стартот на градежните работи.

Скопскиот градоначалник соопшти  дека за овој проект од скопскиот буџет се одвоени 81 милион денари.

Со проширувањето, оваа тесна сообраќајница ќе добие четири коловозни ленти. Коловозот ќе биде асфалтиран со завршен слој асфалт- Сплит Мастикс од еруптивно потекло и полимер, на вкупна површина од 19.500 квадратни метри, рече Трајановски.

Груевски  во оваа пригода кажа дека:

Скопје станува град што може да одговори на потребите на своите граѓани. Како од еден од најбрзорастечките градови во регионот, Скопје забрзано се претвора во град со динамична демографија и континуирана урбана експанзија (Груевски)

Тогаш беше  најавено дека градежните активности на овој проект ќе се одвиват во временски период од околу шест месеци, а дека за изведувач на работите е избрана компанијата „Трансмет“ од Скопје. Исто така, беше кажано дека булеварот „Митрополит Теодосиј Гологанов“ ќе добие и ново улично осветлување за кое ќе се потрошат 11,6 милиони денари.

Наспроти ваквите прогнози, реконструкцијата  на булеварот,  наместо во јули 2014 година,  заврши во мај 2015 година. Оваа трета делница од  булеварот свечено беше пуштена во употреба на  26 мај 2015 година, а на отворањето присуствуваа  Груевски,  Трајановски, советници од Град Скопје, како и голем број на јавни личности.

За овој проект  во Отчетот (стр.4) на градоначалник Трајановски  за минатата година (2015) меѓу другото, пишува:

Со проширувањето, на оваа делница од булеварот, долга 1.600 метри, се формирани 4 коловозни ленти по две во секоја насока.  Од двете страни на проширениот коловоз се изградени тротоари, покриени со павер-елементи. Градежните работи беа искористени за да се постави нова атмосферска канализација со вкупна должина од 1.493 метри и да се изврши реконструкција на постојната фекална мрежа. Градот Скопје за градежните работи на оваа делница потроши околу 81 милион денари. Третиот дел од проширениот булевар Митрополит Теодосиј Гологанов го осветлуваат 82 столба за улично осветлување на коишто се поставени 108 светилки, а за овој зафат Градот Скопје одвои околу 11,6 милиони денари. Со тоа, вкупната вредност на проектот за проширување и реконструкција на третиот дел од булеварот Митрополит Теодосиј Гологанов изнесува 92,6  милиони денари.

Се забележува дека  вредноста  на реализираниот проект значително ја надминува  изборната проекција од 60 милиони. денари. И тоа, за 21 милион денари повеќе  во однос на сумата потрошена  за градежните работи (81 милион денари), а за 32,6 милини денари во однос на вкупната вредност (92,6 милини денари), што е за 50 отсто повеќе од првично планираните средства.

 

ЛИНКОВИ:

 

Оценето од: Оливера Војновска

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy) и Балканскиот фонд за демократија (BTD – The Balkan Trust for Democracy), иницијатива која поддржува демократија, добро владеење и евро-атлантски интеграции во Југо-источна Европа. Содржината на рецензијата е одговорност на авторот и не ги одразува ставовите на Метаморфозис, NED или BTD.
Слични артикли

Оставете реакција

Јазици MK SQ EN