Рецензија: Аналитичари: Нема ништо лошо ако Македонија стане даночен рај!

Ако Македонија стане зона на оф-шор банкарство, кај нас би се отвориле нови работни места за правници и економисти, сметководители и слични професии кои би давале услуги на тој сектор. Значи со предлогот на Владата низ уставни измени да се формираат слободни економски зони, се вели во овој напис, кој се повикува на аналитичари, со што во голема мерка би се решил проблемот со прекубројните кадри од економските правните факултети. И уште во стартот ве удира шок – дали сме ние првите или можеби десеттите во светот кои без реперкусии сме се соочиле со некакво „еурека“ во атарот на финансиската власт, која во рамките на своите активности се сеќава на уште едно спасоносно решение за нашата економија без да се наруши рејтингот на македонската економија во светски рамки.

Линк до оригиналниот напис: Аналитичари: Нема ништо лошо ако Македонија стане даночен рај!

Датум и време на објавување: 17.07.2014 10:10

Датум на рецензирање: 24.07.2014

Рецензент: Љубомир Костовски

„И покрај тоа што за овој предлог, за кој во Собранието деновиве се дискутираше, се уште нема доволно детали, финансиски аналитичари со меѓународно искуство за Телеграф велат дека идејата е позитивна“.

Медиумот при тоа се повикува на мислењето на Џон Јоновски, финансиски аналитичар, кој во Македонија гледа даночна оаза (во превод – парите што влегуваат и нивниот обрт не би се оданочувал, а месното граѓанство ќе дава само услуги). Јоновски беше првото име, со Тео Вајгел, што тимот на Груевски го повика во 2006 да му помага со совети на Владата, пред сѐ, во привлекување на странски инвестиции. Не е јасно зошто тој тим тогаш не предложи ваква спасоносна идеја!? Напротив, тој спасот го гледаше во легалниот бизнис – туризмот, текстилот и органската храна (види тука). Јоновски беше и советник на Бучковски во периодот 2005-2006 . Тој во овој текст се залага Македонија да го следи кипарскиот пример, а не оној софистицираниот кој го спомна и премиерот!

Но, како екссовентик во неколку влади Јоновски треба да знае дека една од опасностите со кои се соочуваат земјите во развој и транзиција е, покрај класичните слабости за странските инвеститори, токму оф шор работењето и перењето на парите и тоа е влезено во основната азбука на економската наука (види на пример тука).

Впрочем, кипарскиот пример со оф-шор банкаството покажа дека земјите кои го имаат не се имуни од банкротства. Во тој контекст, Австрија потегна иницијатива за борба против британскиот систем – до кој се држи нашиот премиер – како недозволив за Унијата(!). На оваа иницијатива, секако, ЕУ ќе мора да одговори соодветно ако сака да има заеднички основи на водењето на економијата (види тука).

Вториот аналитичар, повикан од медиумот, директорот на КБ Публикум инвест, Горан Марковски, се оградува од можните констатации за предлогот, бидејќи никој не го видел законскиот текст, иако гледа позитивно на сѐ што ќе значи вработување во земјава.

Текстот накусо се осврнува на противењето на пратеникот Павле Трајанов на иницијативата со зборовите и дека оваа иницијатива ќе значи милошевизација на капиталот во земјата, по примерот на релациите Белград – Никозија.

Со едно цело мислење како поддршка, едно воздржано и едно против (ама редуцирано) доаѓаме до констатација дека идејата на двоецот Груевски–Ставревски е добра и дури можеби спасоносна за нашата економија, без најпрвин да им се објасни на читателите во неколку основни поими што е тоа оф-шор банкарство, потоа да се провери дали ние не сме потписници на некои меѓународни протоколи кои значат борба против ваквите „оази“, каков е потоа предметот на работа на Агенцијата за борба против перење на пари кај нас, освен ако таа не била формирана формално (што можеби не го сфатил сега уапсениот поранешен директор на истата Ване Цветанов!).

Ќе посочиме само еден текст, вистинска анализа на оваа тема каде проф. Узуновски се прашува дали тоа ние правиме „финансиска зона или финансиска депонија“? Ова чисто само како доказ дека текстот како да имал само за цел да обезбеди „јавно мислење“ во корист на идеја за која тешко дека некој политичар од сериозна држава би се јавил со јавна поддршка.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар