Рецензија: ФОТО: Со автомобилот се забил во дрво – ова момче загина во тешка сообраќајка

 

Некомплетна вест во која недостигаат неколку клучни елементи за добивање целосна слика за настанот. На публиката ѝ е пласирана „осакатена“ содржина, зачинета со несоодветен и со сензационалистички наслов. Пример за лош „копи-пејст“, намачкан со таблоидско жолтило.

Линк до оригиналниот напис: ФОТО: Со автомобилот се забил во дрво – ова момче загина во тешка сообраќајка

Датум и време на објавување: 19.01.2015, 10:14

Датум на рецензирање: 22.01.2015

Рецензент: Владимир Мирчески

 

ТРКАТА ПО „КЛИКОВИ“ ЈА УБИ ИНФОРМАЦИЈАТА

Имаме случај на дилетантско и некоректно преземање вест со трагичен епилог, која речиси е обезглавена поради отсуството на клучни информации. Прво е дека недостига „каде“, потоа нема „кога“, исто така не се забележува и „зошто“. Точно е дека има „кој“, ама и тука работата не е докрај јасна. Поточно, овде станува збор за преземена вест, без да се каже од каде, објавена под наслов од кој произлегува дека сообраќајката се случила во земјава, а не во Србија. Недозволиво!!! Зошто е тоа направено? – Претпоставувам само поради што е можно повеќе кликнувања. И тоа е недозволиво. Не може економскиот интерес да предничи пред основните професионални, а би дополнил и етички принципи, на кои треба да се темели секој новинарски производ.

Вистинитата приказна е дека несреќата се случила на пат во Србија, дека автомобилот со тројца патници излетал на еден свиок од патот кон Ивањица и дека загинало момчето кое управувало со автомобилот. Во преземениот текст сè е некако испревртено наопаку, освен смртта со „летање низ шофершајбната“, поради што и не може целосно да се пофаќаат конците на приказната. Плус, на написот му е накалемен наслов кој е апсолутно несоодветен бидејќи јасно упатува само на сензационалистичката компонента. Не знам која е потребата да се каже „Ова момче загина во тешка сообраќајка“ , како да е некој овдешен, тукашен човек, кој би го знаела публиката на која ѝ е наменето четивото. Всушност, тука и е „мамката“ за читателите – поведени од насловот да кликнат за потоа само да прочитаат дека е трагичен инцидент во соседството, а не во земјава. Секако, од новинарска гледна точка, не можам да прифатам буквално покажување со прст во стилот „еве кој загина“ за жртва на сообраќајка.

Начинот на информирање во случаи на несреќи, елементарни непогоди, војни, семејни трагедии, болести, судски постапки мора да биде ослободен од сензационализми – вели членот 8 од Кодексот на новинари.

Некомплетен, сензационалистички пристап, со селективност во пласирањето на информацијата по принципот „копи-пејст“ не се одлики на коректен новинарски материјал.

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар