Рецензија: Фото: Вака се протестира во Русија
Непотребна и сосема погрешна аналогија е направена со констатацијата додадена на информација пренесена од други медиуми. Главната вест е објективно, но не и целосно пренесена во написот. Не е јасно што го инспирирало авторот да направи споредба со протестите, коишто цели две години беа организирани во македонскиот главен град, по повод убиството на Мартин Нешковски, а случајот беше затворен со судска завршница.
Линк до оригиналниот напис: Фото: Вака се протестира во Русија
Датум и време на објавување: 15.10.2013
Датум на рецензирање: 19.10.2013
Рецензент: Тони Димков
Вистинитост: Фактите пренесени во главната вест се точни и нивната веродостојност може лесно да се провери, бидејќи информациите за протестите се пренесени во голем број светски медиуми.
Извори на информации: Авторот на текстот не наведува ниту еден извор од кој е преземена информацијата. Покрај веродостојноста на фактите, останува нејасно дали истите се преведени од странски или пренесени од домашен медиум.
Содржајност: Написот во „кратки црти“ известува за настан на кој во светските новински агенции и електронски медиуми му е даден многу поголем простор. Минималното ниво на сеопфатност е задржано, а акцентот е ставен на галеријата со фотографии од настанот. Збунува последниот пасус со кој се прави аналогија со случај кој две години беше во фокусот на интересот на јавноста во Македонија. Забелешката на авторот ѝ дава сосема друг контекст на објавената вест.
Коментирање: Коментаторските елементи се конкретната причина за анализа на објавениот напис. Како заклучок авторот на написот констатира дека:
Оваа непријатна случка потсетува на убиството на Мартин Нешковски кај нас и протестите кои се случуваа во главниот град.
Од информацијата и фотографиите за случувањата во Русија станува очигледно дека се работи за протести кои прераснале во жестоки немири и директен судир со полицијата. Протестите во македонскиот главен град беа мирни и во ниту еден миг не прераснаа во насилство. Иако и во двата случаи станува збор за убиство на младо момче, во македонскиот случај момчето беше убиено од страна на припадник на полициските специјалци во текот на партиска прослава по изборите во 2011 година. Во случајот во Русија момчето е убиено од непознат сторител за кој се претпоставува дека е имигрант од северен Кавказ, што на целиот настан му дава и националистичка димензија. Во скопскиот случај немаше национализам, туку напротив, граѓани со различно етничко потекло учествуваа во протестите. Барањата за задоволување на правдата се присутни во двата случаи, но поставени се на сосема различни основи. Оттаму, останува нејасно врз која основа авторот на написот прави аналогија меѓу протестите во Русија и во Македонија.
Оригиналност/Плагијат: Написот е делумна копија од агенциска вест, но не може да се одреди од каде е преземен. Авторот на написот е потпишан со иницијали.
Квалитет на насловот: Не може да се определи дали со насловот ненамерно или, можеби, свесно, се упатува порака чија смисла треба да се толкува со „читање меѓу редови“. Дилемата дали намерата со насловот била да се потенцира како се протестира во Русија, или, имајќи ја предвид аналогијата со скопскиот случај, да упати како треба да се протестира, останува отворена за толкување.
Фотографија: Написот е проследен со галерија од 12 фотографии кои ја илустрираат содржината на информацијата. Фотографиите се преземени од некој од светските сервиси, но не е наведено нивното авторство.
Заклучок: Пренесувањето на вестите од светските новински агенции или од домашните медиуми треба да биде што е можно поверно и попрецизно. Фактите секогаш треба да бидат издвоени од мислењата, а вестите од коментарот. Во овој случај за констатацијата на крајот од текстот сметаме дека е ставена каде што не и е местото, бидејќи демонстрациите во Русија се сосема различни од скопските протести.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар