Рецензија: Иванов по градови и села, Пендаровски во елитен ресторан

Уште со самиот влез во текстот се гледа во кој правец ќе носи приказната и како ќе се развива, ако може за тоа да стане збор. Причината е едноставна: текстот се состои само од два моменти за кои се имало желба да се нагласат. И тоа дека едниот кандидат е елитист и не е близок со народот, а другиот секојдневно црпи информации од граѓаните, а вториот момент е тоа кој како е избран за кандидат за претседател. Уште од самиот наслов се гледа интенцијата и намерата, а така нѐ води и целиот текст.

Линк до оригиналниот напис: Иванов по градови и села, Пендаровски во елитен ресторан

Датум и време на објавување: 05.03.2014, 23:31

Датум на рецензирање: 06.03.2014

Рецензент: Владо Ѓорчев

 

НАМЕРНО И ТЕНДЕНЦИОЗНО

И двата мометни се случиле. Едниот кандидат навистина седел во ресторан во центарот на Скопје, а другиот последниве денови е во посета на повеќе села низ Македонија. Ако се сакало да се информира најверојатно тука ќе запрел текстот и ќе се илустрирал со фотографија. Но, сепак, авторот се впуштил во коментирање, наводно барајќи ги аргументите за и против. Ова е пример како од еден текст, кој е обична информација, може да се направи мини портрет на личност – намерно и тенденциозно, без аргументи и факти. И, секако, според вториот момент повторно се сака да се наруши угледот на едниот кандидат, сакајќи да се прикаже како неспособен да собере потписи од граѓаните, туку на тоа се одлучил на полесниот начин, со канидирање од пратеници, за разлика од другиот кој наводно има целосна доверба од граѓаните.

Пендаровски и луѓето што го кандидираа се одлучија за полесниот начин, тој да не бара поддршка од 10.000 потписи туку кандидатурата да биде формализирана со 30 потписи од пратеничката група на СДСМ.

Текстот е направен од официјални настани и случувања. Напишан е како да се работи за авторски текст, но нема ниту редакциски, ниту потпис од авторот.

 

ЈА ИЗВРТУВА ВИСТИНАТА 

Текст без факти. Да се направи нешто без притоа да се нема ниту еден показател е навистина тешко. Инаку, како би можело да се смисли ваков пасус:

Очигледно Пендаровски не можел да се оттргне од своите навики како професор и кампањата ја почна со однесување кое што обичниот граѓанин најчесто го толкува како искажување на силна доза на елитизам.

Текстот не е објективен, ја извртува вистината и еден настан, обично седење со фамилијата во ресторан, го искористува за целосна манипулација на профилот на личноста. Притоа алудира дека канидадот така ќе се однесува и за време на кампањата, а и ако стане претседател на Македонија. Тој е пристрасен во голема мера. Интенцијата се гледа од авион исто како и намерата да се понижи едниот кандидат.

Целиот текст е со испреплетени коментирачки содржини, кои се ставени во функција на текстот. Не се одделени посебно, ниту, пак, се нагласени. Со тоа се создава привид дека е точно она што е напишано.

Насловот си е приказна за себе со „упорноста“ да се оквалификува нешто спротивно од вистината. Фотографија има од настаните кои се обработуваат. Тие се ставени само во функција на тесктот, инаку без текст немаат никаво значење повеќе отколку да биде фото вест.

Вакви текстови посебно последниве денови има на кило. Најверојатно и ќе ги има во иднина. Сепак, треба да се подразмисли кога пласираат вакви тези. Зашто не секој што ќе седне во ресторан е елитист, ниту, пак, секој што ќе шета по селата е близок до народот.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар