Рецензија: Заев и Шеќеринска на отчет кај Филе поради бојкотот на изборните резултати

Прилогот насловен: „ Заев и Шеќеринска на отчет кај Филе поради бојкотот на изборните резултати“, со нагласена тенденциозност ја најавува средбата на лидерскиот двоец на СДСМ со еврокомесарот за проширување. Според начинот на кој е конципиран и пласиран овој материјал, се добива впечаток како едвај да се чекало да се соопшти „спектакуларната вест“ дека авторитетите во  Брисел ќе ја критукуваат опозицијата поради неприфаќањето на пратеничките мандати. И, веројатно, со таа водилка е направен и изборот на аналитичарот, кој е еден од оние исти експерти кои постојано се „вртат“ на одредени медиуми и чии ставови се поклопуваат со оние на владејачката партија.

Линк до оригиналниот напис: Заев и Шеќеринска на отчет кај Филе поради бојкотот на изборните резултати

Датум и време на објавување: 4.06.2014, 17:53

Датум на рецензирање: 6.06.2014

Рецензент: Оливера Војновска

 

ТЕНДЕНЦИОЗНОСТ

Повод за прилогот е  посетата на врвот на СДСМ на Брисел.  Сепак, идејата не е да се пренесе една коректна информација  дека ќе се случи таков настан, за кој социјалдемократите информираа преку соопштение. Материјалот што го рецензираме  воопшто и не го споменува соопштението (што не е спорно, тоа е проценка на медиумот), туку се повикува на „извори од Брисел“  и прозвучува како како да блика од радост, обзнанувајќи ѝ на јавноста дека „опозиционерите ќе одат на отчет кај Филе“!

„Во ЕУ постоел гнев од постојаното интервенирање во Македонија, по веќе четвртиот бојкот  за само една година од страна на опозицијата. Па затоа еврокомесарот решил да ги повика во европската престолнина челниците на опозицијата и да им одржи сериозна лекција“!

Иако не е новина дека меѓународниот фактор не поддржува бојкот на институциите и вонпарламентарно дејствување, па не беше ни тешко да се претпостави дека опозицијата повторно ќе биде повикана да се врати во Собранието.  Но, очигледно, некому му било многу важно ова да се каже пред споменатата посета и тоа со огромна доза на тенденциозност.

Во тој контекст фино се вклопува и изјавата на експертот:

„Гестот со постизборниот бојкот не води никаде и е на директна штета на државата, бидејќи тоа покажува дека немаме функционална демократија, а еден од условите за понатамошно придвижување на државата е токму таа функционална демокартија“

Што, всушност, е добро познат став кој оди на линија на тоа вината за политичката криза да се префрли во опозицискиот двор, со цел власта целосно да се амнестира од одговорност за евентуалното губење на препораката за почеток на преговорите за членство во ЕУ.

 

ЗРАЧИ СО ПРИСТРАСНОСТ

Овој едностран новинарски производ со претенциозен наслов и зачинет со коментаторски елементи просто зрачи со пристрасност. Тој е крајно непрофесионален, со очигледен мотив да ја дискредитира опозицијата.

Паѓа во очи  и тоа што пред средбата на двоецот Заев-Шеќеринска со еврокомесарот Филе,  авторот на прилогот бил брифиран само за „лекцијата“ која треба  да ја добие опозицијата.  Упатените „извори од  Брисел“ не му кажале, на пример, ниту збор за тоа дали и какви  пораки  ќе бидат испратени на адреса на Владата. Настрана,  што  немало ниту потреба од брзање „екслкузивно“ да се најават „поентите“ од средбата,  уште пред таа да се случи. Некако, пологично е најнапред да се сочека да се одржи состанокот, па потоа да се излезе со целосна информација.

За волја на вистината,  во соопштението од Кабинетот на  еврокомесарот издадено по средбата, приоритетно место имаат пораките кои се однесуваат на Владата, а во кои се вели дека „новата Влада има јасна одговорност за решавање на недостатоцте  што се повторуваат во препораките на ОБСЕ/ОДИХР  и во извештаите на Европската комисија за напредокот на земјата, и тоа како прашање на итност“

Но, ете,  авторот  не бил брифиран за нив, па не можел да ги најави, како што тоа го стори со „укорот“ за опозицијата!

Така што,  при правењето на прилогот, за жал не се успеало или, можеби, не се сакало да се изгради дистанца од политичките субјекти. И на тој начин (не)свесно се прекршени востановените принципи на  добрата новинарска практика. 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар