Сатирична објава за Еди Рама се пренесува како сериозна вест

Aвторот на објавата не забележал дека, всушност, се работи за сатирична вест. Аналитичарката Сузана Стариков во неколку наврати реагираше на Твитер дека станува збор за првоаприлска шега и дека медиумите треба да престанат да ја пласираат како сериозна вест

 

 

Пост на Фејсбук, повикувајќи се на германски аналитичар, пласира вест дека албанскиот премиер Еди Рама ќе биде нов генерален секретар на НАТО Алијансата. Оваа вест не е точна.

Постот споделува медиумски напис со наслов: Рама наместо Столтенберг на чело на НАТО? Германски аналитичар за изборот на нов шеф на Алијансата.

Германската аналитичарка Сузана Стариков изјави дека Јенс Столтенберг на местото генерален секретар на НАТО би можел да биде заменет од премиерот на Албанија Еди Рама. Таа на Твитер напиша дека САД особено инсистирале на изборот следниот генерален секретар на НАТО да се бара меѓу новите членки на НАТО. Кандидати беа премиерот на Естонија Каја Калас и премиерот на Албанија Еди Рама, напиша Стариков, пренесе Косова онлајн, се вели во написот.

Притоа, во текстот се нагласува дека за ваквата информација нема никаква потврда, ниту реакција од Рама.

И сето тоа ќе беше во ред ако веста не беше првоаприлска шега. Имено, авторот на објавата не ја проверил убаво веста, ниту, пак, го отворил Твитер профилот на аналитичарката Стариков, така што не забележал дека, всушност, станува збор за сатирична вест.

Проблематично е и што не е споделен линк од Твитер, за да можат читателите да ја прочитаат целата објава и да разберат дека станува збор за шега.

Edi Rama will succeed Jens Stoltenberg as #NATO Secretary General. The US in particular is said to have insisted on electing the next NATO Secretary General among the new NATO members. The candidates were 🇪🇪PM Katja Kalas and🇦🇱Prime Minister Edi Rama. Who will be the next🇦🇱PM? pic.twitter.com/CQzwxnoq2m

— Suzana Starikov (@Intetyst) April 1, 2022

Еј, луѓе, навистина е лудо како некои српски и албански медиуми без никакво истражување ја пренесуваат мојата априлска шега како сериозна вест. Но, зошто го прават ова? Можеби затоа што мојата шега е нивна пуста желба? @Novossti, тоа беше само мојот првоаприлски трик, ништо друго, напиша Стариков на Твитер.

Hej, folks, it’s really crazy how some Serbian and Albanian media, without any research, spread my April joke as serious news. But why are they doing this? Maybe because my joke is a wishful thought on their part? @Novossti, that was just my April fool’s trick, nothing else. pic.twitter.com/32Dummqp9o

— Suzana Starikov (@Intetyst) April 1, 2022

Таа потоа уште еднаш реагираше дека нејзината шега продолжува да се пласира како сериозна вест.

И покрај тоа што објавив овде на Твитер, дека ова е моја шега, првоаприлска финта, нема да престанат да ја објавуваат како сериозна вест. Тоа е лудо, полудо, најлудо. ШЕГА е, избришете го ве молам, не сакам да бидам извор на лажни вести.

Despite having announced here in twitter, that this was a joke of mine, an April fool’s trick, they won’t stop publishing it as a serious news. That’s crazy, crazier, the craziest. It’s a JOKE, Delete this please, I don’t want to be a source for fake news. https://t.co/cnT5ocrQpf pic.twitter.com/U43m0xZSoe

— Suzana Starikov (@Intetyst) April 1, 2022

Кога станува збор за објавување сатирична содржина, тоа треба да биде јасно и видливо нагласено инаку се создава впечаток дека е вистинита, со што се врши манипулација врз јавноста.

Сатирата често се користи и во политички пресметки или пресметки со јавни личности. Затоа пред инстантно да се поверува во било што објавено на социјалните мрежи, треба да се провери од неколку извори дали тоа е вистина.

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар